قصة ضياعي بالصمان "4" والآخيرة

طبعاً قلنا في الجزء الأول أني :
أني كنت في ثالث أبتدائي وناجح وطلعت للمخيم مع اهلي ويوم وصلت رحت أقضي حاجتي وغديت [ضعت]

وقلنا في الجزء الثاني أني :
الجو كان ضبابي وكنت متجه لجهة الشمال وانا أمشي قاعد أسولف على نفسي ويوم جاء العصر قعدت أحطب لأهلي لأني كنت متوقع أنهم قدامي وطاح مني من آثار التعب والجوع وكان لي آنين بس ما بكيت إلى الآن وتفاجئت ببيت شعر معترض قدامي واكتشفت أن الغنم بالوحش حقها [السوداني] متجهه للمراح وبغاني السوداني للفطور وفكني الله منه و يوم غابت الشمس بدأ البكاء الفعلي وحصلت سيارة هايلكس تمشي على الردمية ووقفت قدامه ويوم وقف طحت جنب موترة



وقلنا في الجزء الثالث أني :
أن صاحب الهايلكس مستغرب كان يتوقع ان البيت الشعر لنا و راح وخلاني ومع غياب الشمس رجعت مع نفس طريقي يعني بإتجاه البيت الشعر اللي فيه السوداني وفيه...<< بعد شوي تعرفون من كان فيه
وحصلت سيارة كنت أتوقع أنها تجربع <<يجربعون وقت الفطور ..ماتجي لأني فاصل وقتها ولاتنسون توني بزر ههه
ورحمني ربي وجاء نور السيارة على ثوبي وانطلقت السيارة ولا وقفت إلا عندي آثاريهم اللحوات الغانمة هههه ورمشت عين وانا عند اهلي
بس وشلون البنت عرفت مخيمنا ..؟



في هذا الجزء الرابع و الأخير تعرفون كيف ..!

طبعاً كانت أمي وأخوي ماجد على الددسن الغمارة ويحصلون هالعجوز و البنت
<< اللي عسى الله يزوجني بوحدتن مثلها عند أبل أبوها ومدرسة و من قبيلة عريقة
وأساساً البنت تدور على الأبل ضايعة طبعاً الساعة اللحين 9ص

قالت أمي : يابنتي مالقيتي لنا وليدٍ ضايع << وهي تبكي اللحين
قالت البنت : ولد ضايع في ذا المنطقة..!!
قالت أمي : ترى مواصفاته كذا كذا كذا
قالت البنت : ياخالة والله ما تذوق النوم عيني إلا لين ألقى ولدك
قالت أمي : يابنتي وانتي تدورين على أبلكم إن لقيتيه تراه ولدنا وذاك مخيمنا
قالت البنت : الأبل ماهي همّ ...الأنسان أغلى من الحيوان وأنا ياخالة أبي أكسب فرحتك ..إن شاء الله إني بلقاه

وراحت البنت و أمي وأخوي ماجد أستكملوا عملية التمشيط , من غير البقية من أخواني وأخواتي كلن يبحث اللي على موتر واللي على رجليه حتى صبيان أبوي 3 يبحثون كمان مع أهلي
ويوم جاء المغرب البنت رجعت لمخيم أبوها << هو نفسه بيت الشعر اللي مريت عليه أثناء الضياع


وقعدت تعلم أبوها بالسالفة وسبب تأخرها من طلعتها الصبح طبعاً بيت الشعر يوم أمر من عنده كان فيه شايب وأنا مادريت والبنت رايحه على الموتر ,الشايب على طول نادى السوداني وقال أنت اليوم العصير من انت تحكي عليه
ويعلمهم بالسالفة ونفس مواصفاتي والبنت تصعق ..!

قالت : وين راح له
قال : أتعداني من هنا ولا ادري وين راح وانا جاي اصلح الفطور والقهوة كنت خايف منه توقعته جني مع غياب الشمس

وتشغل موترها وامها معها من الصبح وتدور علي لين جاء نور السيارة علي وجتني و ودتني لمخيم اهلي
وبعدها بأسبوعين يجينا المهندس فراج ومعه أثنين من أعيال عمي ونعلمهم بالسالفة ويسلمون علي مره ثانية << من الفرحة

أسأل الله العلي القدير أن يطيل في أعمارنا على طاعته

أسأل الله العلي القدير أن لايرينا مكروهاً في أقاربنا وأحبابنا وأغلى مانملك

أسأل الله العلي القدير أن يطيل بعمر والدينا ويرحمهم ويمتعهم بالصحة والعافية ويغمس بإرواحهم في الجنة ويعيشهم عيش السعداء ومرافقة الأنبياء ويوسع في قبورنا وقبورهم
وآخر دعوانا أن الحمد لله رب العالمين

:180635az0tjyzk mo:

~ هذه القصة حقيقة لا خيال ~
وإن كان بها من المبالغة فهو بنسبة 9% فقط << مجرد بهارات
حصلت لمحدثكم قبل 14 سنة تقريباً
والحمد لله أن كتب لي حياةً جديدة
وهذا أكبر دليل على ان الطفل لاينسى الأمور الذي تواجهة في حياته وهو صغير

	وفي منتهى القصة لي عندكم طلب بسيط من كل من قرأ القصة كاملة أن يعطيني ماذا استفاد منها ويعطيني إنطباعة عن الحادثة بشكل عام وليعلم الجميع أنني لن أزعل من أي تعليق يليق بشخصه بالعكس إنه يمثل صاحب التعليق لايمثلني

وها هو ذيبان يودعكم بدموع ذكرياته

قصه راااائعه جدا جدا جدا
تنيسق جميل وسرد احداث راائع
الف شكر ذيبان ""

قصه رائعه ياذيبان
وماشاء الله عليك مابعد نسيها
وعشان تدري ان القصه معجبتني لك احلى تقييييييم

ذيبان

عزالله انك على اسمك ذيبان

رااائع جدا

اخوي ذيبان
من جمال سردك للقصه عيشتنا جو القصه فعليآ وكانا مشاركين معك ما شاء الله عليك وربي يوفقك
اعجبتنا جميع الاجزاء بكل حرف فيها
وتم التصويت لجميع الاجزاء بمتياز