بن وهق ، وأهل الرويضة

الصدر واحد والروابع ملايين = قامت تناهش فيه مثل الذيابه
ياليت لي بدل لساني لسانين = انظم ويمنايه تجيد الكتابه
ياهل الرويضه كانكم مستعدين = انا على منبر قصيد وخطابه
ابتمثل بينكم يالميامين = وانا حضوري وقفةٍ وإنقلابه
بقول في هالمحفل الزين بيتين = والهاجس ليا جاد ماينتجابه
وصلتني الدعوه وجوك الغزاوين = عزمتهم يابن وهق بالنيابه
قالو تمون وبكره العصر ماشين = لابن وهق حتى نقف عند بابه
حنّا يدٍ وحده ولا هي بثنتين = لا وصلنا المندوب يامرحبا به
كلمه وأنصيها العقيد احمر العين = راعي المكارم والصطر والمهابه
عبدالله اللي يسمع الهرج ذالحين = نعم الاماره والظفر والذرابه
ابن وهق ذخري زبون المخلين = ليثٍ المواقف زاهب الاستجابه
قبل امس جرّبناه فالموقف الشين = سيفٍ حدب واهل الرويضه نصابه
واليا نسلته شفت فعل ابو حدّين = ياسعد من وقت اللوازم غزا به
وقت القشر كنه صعوط المجانين = ووقت الرخا كله قبول وحبابه
قال انتو الرصعان مانتو رخيصين = وتناوش حزامه وطق العصابه
ياليت مثله فالقبيله لو اثنين = بالعون ياحتى الخطر ما نهابه
وليت العمر يهدى ونهدي له سنين = ونبذل من الارواح فدوة شبابه
ماينكر المعروف غير الرديّين = عساك ماتحتاجنا في طلابه
ولا احتجتنا جيناك مثل السراحين = يجيك واحدنا وروحه زهابه
اضرب بنا صعب الجلاميد ويلين = إنطوّعه لو كان كنّه زعابه

وسلامتكم

سعود بن عبدالمحسن الغزواني