عقب الغلا والحب

دنياي تكويني على ثومة الجوف= كية على كية تغير حياتي
كني مع العربان لااسمع ولا أشوف= اظلم سماي وتهت من غير ذاتي
والقلب من صكات الأيام ملهوف =على عنود(ن) مطابتها شفاتي
باسبابها قلبي عن البيض مصروف= ماله نظر في باقيات البناتي
راع اشقر(ن) من فوق الامتان ملفوف= يزيد حبه كل صبح ومباتي
لاهوب لا عجل(ن) ولاهوب ملقوف =سبحان خلاقه حسين الصفاتي
اقفى وقفينا صواديف وظروف= واسرارنا بالقلب متمكناتي
هذا القدر ماعنه صده ولا خوف= مكتوب والمكتوب شئ(ن) ثباتي
وقلبي مع سيد الغنادير مكتوف= ماله منافذ من جميع الجهاتي
يا صاحبي منتب عن القلب منذوف= اتعبتني واشقيتني في حياتي
اليا ذكرتك هلت العين مذروف= عقب الغلا والحب صرنا شتاتي