|
| ||||||||
أجمل حكاية أجمل حكاية (1) لسة حسة بيكِ جنبى مالْيَه بيتِك .. مالْيَه قلبى إنتِ غبتِ عن عينىَّ بس لا .. عمرِك ما غبتِ المكان و الله فاكرِك و الحيطان تحكى حكايتِك لمّا ضحيتى بشبابِك و الجمال كان رأس مالِك بعتِ أيامِك عشاننا قلتِ نارنا أحلى جنة كنتِ بينا و كنا بيكِ قبل ما تفارق عينيكِ كنتِ جنتنا الجميلة لمّا كنا بين إيديكِ بتراعينا .. بتشيلينا تدعى لينا .. و تداوينا و بحنانِك تحضنينا لسة حسَّاكِ معايا رغم إنك مش معايا بس تأثيرِك ح يفضل يتحكى أجمل حكاية
|
| ||||||||
رد: أجمل حكاية أجمل حكاية (2) لسة حاسس قلبى حبِّك لسة دفيانة بحضنِك كل ركن تروح له عينى ألقى فيه مرسومة صورتِك ترجع الذكرى لخيالى و افتكر أيام حنانِك و افتكر أحلى كلامِك لمّا كنتِ بتنصحينى و تقوليلى " خللى بالِك " مين يعوضنى ده كله ؟ لو تعبت .. مين ح ييجى جنبى و يطبطب علىَّ ؟ لو زعِلْت .. مهما أشكى هو مين ح يحس بىَّ ؟ هو مين ح يقوللى " مالك " حتى لو بِكْيِت عينىَّ ؟ لأ .. مافيش من بعدك انتِ حد تانى يخاف علىَّ إنتِ كنتِ كل حاجة كنتِ أبويا و كنتِ أمى ياللى كنتِ أحلى صورة و أحلى صوت بينادى إسمى كلمة طول عمرى باقولها أحلى كلمة لسانى قالها لمّا كنت باقول " يا أمى " لسة حسَّاكِ معايا رغم إنك مش معايا بس تأثيرِك ح يفضل يتحكى أجمل حكاية |
| ||||||||
رد: أجمل حكاية أجمل حكاية (3) لسة فاكرة لمّا كنتِ شمعة بتنوَّر ولادها إدتينا نور شموعِك و انتِ خدتِ كل نارها إدتينا سنين جميلة كنتِ إنتِ أَوْلَى بيها و الحياة نادت عليكِ تحضنيها و تعيشيها بس من خوفِك علينا لَلحياة تلهيكِ فيها قلتِ لا .. تِحرَم علىَّ الحياة و احرَم عليها الحياة هىَّ ولادى و السعادة لمّا اشوفهم يكبروا قدام عينىَّ يبقوا حاجة عظيمة تِفْرِح قلبى و تعوض علىَّ اللى قاسيته فى حياتى جايزتى م الدنيا هىَّ إن لمّا الناس تشوفهم يفخروا بيهم و بىَّ يا سلام .. و الله ده انتِ مش كفاية عليكِ جنة ده اللى زيك يتفرش له ألف نهر و ألف جنة ياللى كنتِ أحلى شمعة نورِت لينا حياتنا لسة حسَّاكِ معايا رغم إنك مش معايا بس تأثيرِك ح يفضل يتحكى أجمل حكاية آخر تعديل عين المها يوم
19-10-2007 في 01:45 AM. |
| ||||||||
رد: أجمل حكاية أجمل حكاية (4) لسة بابكى و لسة ح ابكى مهما طال العمر بىَّ كل ما افتكرِك يا أمى الدموع تعصر عينىَّ قد ايه من بعدِك انتِ شفت قسوة كتير علىَّ م اللى بيقولوا شقايق بس لا .. و الله لا القلوب مش هىَّ هىَّ كل واحد لمّا غبتِ اشترى لنفسه مراية إشترى أنانيته بِذُل نفسى و بشقاىَ و ابتدى الحرمان يصاحب وحدتى ما بقيتش عارفة ايه نهاية غربتى ؟!!! القسوة زادت عن حدودها و اشتكيت ربى اللى عارف شكوتى من غير ما اقولها .. إنما قلبى معاه راضى بنصيبه و قسمته حرمانى منك هو عارف حكمته و انا لو حزِنْت أو بكيت عمرى ما اقدَّر نعمته هو اللى صَبَّرنى و رَبَط على فؤادى و ثَبِّتُه و لولاه ما عشت دقيقة واحدة بعدِك انتِ يا أغلى حاجة ياللى مالقيتش لحنانِك شىء يعوض أى حاجة ياللى حسَّاكِ معايا رغم إنك مش معايا بس تأثيرِك ح يفضل يتحكى أجمل حكاية |
| |||||||||||
رد: أجمل حكاية
كلمات جميـــلة عيـــن المها يعطيك العافية تقبلي مروري / \ روحــ تحبك ــي
|
مواقع النشر (المفضلة) |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
هل تعرف حكاية البنطلون الجينز .......؟ | محمد | الأزياء و الأناقه | 16 | 16-03-2009 07:26 PM |
حكاية فانوس رمضان | شيخة الصبايا | روحانيات | 12 | 29-09-2008 05:52 PM |
حكاية اسمها ماجدونا لم تنتهي | ابو نـــmkـــواف | الرياضة والشباب | 8 | 01-06-2008 08:42 PM |
حكاية امرأة في وقت داوود عليه السلام | hellen | روحانيات | 7 | 06-10-2007 02:15 PM |
::+::حكاية دفتر عتيق::+:: | عازف | نشيد الروح | 14 | 18-03-2007 04:31 PM |