الدراما الخليجيه الي اين

طرا على بالي أتكلم معاكم بهالموضوع خصوصاً أن في وايد ناس يتهمون الدراما الخليجية بأنها تسيء للمجتمع الخليجي
أنا بأقول وجهة نظري و بأتناقش معاكم فيها و انتوا تردون علي بس كل واحد يقول وجهة نظره بدون اهانة و تجريح
نحن نتكلم عن مضمون قصص المسلسلات مو عن المشاهد
أنا بصراحة ما أشوف الدراما الخليجية تشوه صورة المجتمع الخليجي
كل مجتمع له عاداته و تقاليده و في نفس الوقت كل مجتمع عنده مشاكل و قضايا يبي يحلها و الدراما الخليجية من وجهة نظري تتكلم عن القضايا و المشاكل اللي عندنا و ما جابوا شي من عندهم
بأسألكم مجتمعنا ما يعاني من مشكلة المخدرات؟!
مجتمعنا ما يعاني بسبب الطلاق؟!
مجتمعنا ما فيه شي اسمه عقوق الوالدين؟!
و الاغتصاب و الخيانة الزوجية و غيرها من المشاكل الموجودة بالمجتمع غير الجرايم اللي كل يوم نقرا عنها بالجرايد
انتوا تقولون أن المسلسلات الخليجية تبالغ في تصويرها و تصورنا مجتمع ما عنده أخلاق
اسمحوا لي ما أتفق معاكم مجتمعنا فيه الزين و الشين و نحن نتكلم عن مشاكل موجودة في مجتمعنا و الجرايم الموجودة بالجرايد اللي تشيب الراس أكبر دليل على كلامي
نحن مو شياطين و في نفس الوقت نحن مو ملائكة و نحن نتكلم عن بعض النماذج الموجودة في المجتمع و ما نعمم فيها
و اذا كان المسلسل يتكلم عن قضية معينة مو معقولة يطلعون القضية بدون ما تطلع مشاهد توحي بها
بأسألكم معقولة مسلسل يتكلم عن المخدرات و ما يكون فيه مدمن مخدرات واحد على الأقل؟!
معقولة في مسلسل يتكلم عن الإغتصاب و ما فيه بنت لها علاقة بشاب؟!
طبعاً مو معقولة لازم تكون هالأشياء موجودة عشان المشاهد يقتنع و هي في النهاية موجودة
و العام اللي طاف صارت سالفة على مسلسل بنات الثانوية و منعوه من العرض و صار عليه شد و جذب و لما انعرض على قناة دبي ما شفت فيه شي يستاهل أنهم يمنعونه
رغم أنكم بعد سويتوا له سالفة لما قلتوا بنات صايعات بنت تطلع مع رفيج اخوها و يشردون من المدرسة
أوكي في سالفة تطلع مع رفيج أخوها معاكم حق
بس حسيتكم كبرتوا السالفة بخصوص لما شردوا من المدرسة
أدري اللي سووه غلط بس انتوا ليش مكبرين السالفة هاذي تقدرون تسمونها شطانة بنات مراهقة طيش و كل واحد يمر بهالمرحلة سواء كان ولد أو بنت و بعدين تصير ذكريات و سوالف و الكل يسولف فيها
و بخصوص الجرائم انتوا ما شاء الله ما قصرتوا في مسلسل سيدة البيت سويتوا سالفة بخصوص الجريمتين اللي صاروا بالمسلسل و قلتوا في مبالغة
أي مبالغة الله يهداكم؟!
كل مجتمع فيه جرائم و الجرائم اللي نسمع عنها تشيب الراس
كل يوم نقرا عن الجرايم واحد يذبح بنته و اغتصاب
هذا رايي و قلته أترك لكم الباقي