|
مقناص ضبان يوم الاربعاء الخميس (( اهداء خاص لأبوطارق )) بسم الله الرحمن الرحيم السلام عليكم ورحة الله وبركاته وشلونكم يا جماعة الخير ان شاء الله مستانسين يا طويلين الاعمار تواعدنا انا وابوعايض وابومشعل نطلع نقنص ضبان يوم الاربعاء بدون ترتيب مسبق دق علي ابوعايض عصيرة الأربعاء يالله مشينا قدام اثر ابومشعل مهب معنا يقول بيلحقنا طبعا هو ابومشعل وانا ابومشعل 2000 هههههـ << سمونا كذا بالرحله حركنا وطلعنا لم حلال ابوعايض ودينا العلف ونلقط بعض الغريضات ما شاء الله المهم يالربع مشينا لمحل ميعادنا بمحطة البوعنين صلينا المغرب والعشاء و تقضينا الا وجانا ابومشعل ومعه ابوسعيد وابوعيد وعبينا توانكي الماء ونقول بسم الله مسكنا الخط وصلنا محلنا وشبينا الضو وعينا من الله خير وسوينا القهوه والشاهي وبعدها تعشينا أعذروني ما قدرت اصور ما مداني وحطينا راسنا ورقدنا اصبحنا وصلينا الفجر وسوينا القهوه والشاهي وخذينا العلوم وابوعايض ما قصر سوى القرص افطرنا والحمد لله وشدينا الرحال لموقع الصيد لا هنت يابوسعيد ماقصرت وهذا ممشانا منقسمين انا وابوعايض بالددسن والشباب ابومشعل وابوعيد وابوسعيد كلهم بالجيب هذا الجبل اسمه ابوطاقيه أول الغيث قطره وهذي بداية خير وبعدها صدنا الثاني ب ما لحقت اصور كنت مشغول في تنظيفه على قولة ابوعايض خرطناه خرط ههههـ وتشاورنا مع الربع قلنا نطلع بموتر واحد افضل وقفنا الددسن في مغاره وهذا ابوعيد يزهب مخزن البندق طلعنا بالجيب وصدنا الثالث والرابع والخامس الي بيدي هالصغير يا حليله ودرنا لما جانا عج اعوذ بالله قلنا أربعه تكفي لغدانا عودنا لأم عزيز هاذي تكيتنا سوينا القهوه والشاهي ومزمزنا على أصابع فوزيه ههههـ لحد يفهم غلط واحد من الربع جايب معمول ومكتوب عليه أصابع فوزيه بدينا بالجد وهذي صور الضبان نظفناها بالماء الحار كنت بصورلكم الباقي لكن جوالي طفا <<<مهب وقته الوكاد حطيناه بقدر وبه ماء وخلينا بيوضه على جمب وخليناه يطبخ على قدر عادي وبعدها شلناه وقمنا نشيل الجلد اليابس وقصينا يده ورجليه وحطيناه بقدر ضغط مع رز واكيد بيوضه وخليناه يطبخ يوم أستوى غرفناه حطينا الصفره يا طويلين الاعمار وطاصة بها ماء بارد وسمينا بعد الغدا قلنا يا الربع مشينا شلنا أغراضنا وصلينا الظهر والعصر وحولنا على ديارنا أعذروني على التصوير وقلة الصور والنقص الواضح ما كتمل تصويري يا أبوطارق اعوضها لك بالجايات ولا يهونون الاعضاء |
رد: مقناص ضبان يوم الاربعاء الخميس (( اهداء خاص لأبوطارق )) لاهنت يابو مشعل ع التقرير الحلو ماشاء الله عليكم بس سلمني على راعي القرص ولايهونون الباقين وتسلم ياعمر ’’’’’’’’’’’ |
رد: مقناص ضبان يوم الاربعاء الخميس (( اهداء خاص لأبوطارق )) ابو مشعل كفووووووووووووو وو نشامى وخوتكم تنشرى الله يعضكم الصيد والفيد لاهنت على التقرير |
رد: مقناص ضبان يوم الاربعاء الخميس (( اهداء خاص لأبوطارق )) ماشاءالله صايد وفايد صور رائعه وتقرير وافي >> العتب ع الجوال ومشكووووووووووو ووور على الاهداء |
رد: مقناص ضبان يوم الاربعاء الخميس (( اهداء خاص لأبوطارق )) اقتباس:
لا هنت ع الرد الرئع ابشر يبلغ السلام وابوعايض يستاهل كل خير منور اخوي الهواوي |
| الساعة الآن 12:38 PM. |
Powered by vBulletin® Version 3.8.7, Copyright ©2000 - 2024, Jelsoft Enterprises Ltd.
-
arab-line : Search Engine Friendly URLs by vBSEO 3.3.0 TranZ By
Almuhajir
... جميع الحقوق محفوظه لمجالس رويضة العرض لكل العرب ...
.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..