حريمنا والفلوس ..!!!

احبتي الغالين أخواني وأخواتي ..


في الغالب أن لكل واحد منا زوجة أو أماً أو أختاً أو خالة أو قريبه تعمل موظفة في سلك التدريس أو غيرة ..

المهم ياحبابي الراتب ..


المصيبه ان ( ها الرويتب ) ما يبقى منه إلا الفتات آخر الشهر ...!!

وإذا دققنا وين يروح لقيناه يصرف على آلاف العاملين في الدول المصدرة لمستلزمات ( حريمنا وبزارينهم ) .

قلم روج بـ 100 ريال ,, وفستان بـ 500 ريال وشنطه على لون الحذاء بـ 600 ريال,, و غير الحفايل والطلايع والنزايل وغير ذلك ..

أقول : لنسائنا الموظفات وغير الموظفات ترى الطفره انتهت وقضت والرجال عقلو .. وما عاد يفصلون في السنه إلا ثوبين ... حتى بشت العرس يتسلفونه ..

لذا اصبحت مصروفات نسائنا ثاني أكبر مصدر لخروج العمله للخارج ..!

متى تتغير سلوكيات نسائنا في أمور الصرف لا اقصد صرف اللغة ولكن صرف الدراهم.. ؟

ومتى تتوقف النساء عن شراء الملابس والهدايا الباهضة في كل مناسبه ؟
ومتى ومتى ؟؟


حتى لا يفهم كلامي هذا على أنه تعميم لسلوكيات الصرف النسائي لدينا استثني نسبه منهن الاتي يساهمن في الصرف على بيوتهن وبيوت أهاليهن.

الله يهدي جميع نسائنا ونساء المسلمين من كل شر

وشكلي بروح فيها ياعبدالله العصيمي ويا محمد السهلي



للجميع تقديري وحترامي



أبوعبدالمجيد

ابو عبد المجيد :

الموت مع الجماعة رحمه

وانا اخوك خلنا تجمع على هالحريــّم وعسانا نسلم ماعندهن الا ّ الهواش ومسك الشوش واحمد ربك انت وانا نكتب من خلف الشاشة والا طيــّروا غبرتنا كيد النساء عظيم وكيد الشيطان ضعيف!!

ومع ذلك سأدلي بدلوي وانت السبب ربي يعيننا مع ان المعادلة هالايام بين الرجل والمرأة صارت صعبة !!

ارجع لموضوعك وأبصم بالعشرة لو صرفت الموظفة من راتبها على نفسها وكفــّاها راتبها عن جيب الزوج وراتبه الشهري لصرنا تجــّار .

الموظفة السعودية وخصوصا المعلمات بخيلات بخيلات بخيلات الوحده اذا استلمت راتبها على طول يالبنك بحسابها او عطته امها احفظيه يايمه !!

ولأن الأم طيبة بشكل عام تقول لا والله يا بنيتي ما يصير راتبك لك ولزوجك .

ترد عليها بلهجة المصارع أندريه العملاق وهو يشق الطريق بين الجماهير الى حلبة المصارعة وكأنه جمل هائج اسمعيني يا يمه انا ما تزوجته الا علشان يصرف علي وعلى عياله ماهوب أصرف عليه في الطقاق اللي يطقه.
ابو عبد المجيد : صدقني فيه موظفات تتصل على زوجها وهو برّى المدينة بينه وبينها مئات الكيلو مترات ولا تستحي تطلب منه (حمودي خلصت حفايظه او حليبه )!!!

ولأنه خابزها وعارف عرق ابو حضرم فيها يسكت ويتصل على احد اقاربه او البقالة اذا كان يعرف راعيها وصــّل للبيت الفلاني هالاغراض !!

صدقني ماعاد يستحون حريمنا الموظفات الاّ القلــّة كل شيء ولا تصرف من جيبها قرش حتى لو تتفرش الارض وتتلحف السماء .

ابو عبد المجيد : متى سألت زوج أحد الموظفات يااخي حظك زوجتك موظفة تسلم من الصرف عليها

صدقني يجر ونة الاّ ونــّات وبحرقة مرددا (يقوله اللي مايدري ) ياخوي ليتنا سالمين من هالوظيفة مالي منها الا التعب فلوسها لأمها او اهلها اما مصاريفها من راتبي وهذا شر البلية .

ابو عبد المجيد : نعم انا زوجها ومسئول عن الصرف عليها بس لا تفقع راسي كل ماطرى لها قالت (الزواج شراكة ) !! وين شراكة وانتي شريكة بدون رأس مال .

الحل : نتحد ولا نعطي زوجاتنا الموظفات اي مصروف يخصها ولمدة شهرين وصدقني يقفلون العمالة محلاتهم ويرحلون لبلادهم وتبقى فلوسنا عند امهات او اهل زوجاتنا وعلى الاقل نحافظ على جيوبنا .

الزوجات عندهم مرض لوجستنفسي هههههههه حاولي يصير زوجك على الحديدة علشان مايتزوج عليك ترى اذا جمع كم قرش بياخذ الثانية يا خبله خليه على البلاطه .

اّه لو اناّ سالمين من نظريتهن الخاطئة والقاصرة كان صرنا مثلهن لنا حسابات وخزنات امانة في البنوك بدال ماتكون حساباتنا عالزيرو ومندوبي فيزا يطاردوننا .

متى تجد إمرأة كريمة ؟

فقط غير الموظفات اما الموظفه ابخل من جحا .

دمتم بخير واربطوا الاحزمه

الله يعين الحريم قسم بالله انهم ضعوف
ألحين هي موظفة !! طيب راتبها كيفها لو تحرقة انتو ايش حارق رزكم هههه
تصرف على نفسها وعلى عيالها وبيتها واذا مو على الرجال بعد < لاتنكرون
انا اذا تزوجت << برا
ماراح اعطية ولا ريال رجال على الفاضي.. ممكن من باب المساعدة
لكن سالفة اصرف عليه معصي.
في الوقت الحاضر المرأة هي اللي تتكفل بمصاريف البيت
والسؤال اللي يطرح نفسة دراهمكم انتو يا الشباب وين تروح !!
شششكرا ابو عبدالمجيد احس طلعت حرتي بموضوعك

ابو عبدالمجيد

موضوع ساخن جدا

لي رجعة

ابوعبدالمجيد انت يمكن تلاحظ فئه معينه

لكن الي أعرفه أغلب الموظفات عندهم عماير وبيوت ومحلات مع ان راتبها نصف راتبنا
الله يرزقهم وما شاء الله عليهم وحنا برواتبنا باليالله نطلع قيمة ارض والا بيت والقروض والاقساط فوق راسنا

اما الفئه القليله الي انت ملاحظها اكيد كانت محرومه وعندها كبت من اشياء حابتها في الصغر طلعت كل الي بخاطرها بالراتب

وعلى فكره حنا لا استلمنا الراتب كل واحد في جهه يا الكويت يا دبي مسوين بطره وحنا من جمبها او نصرفها على شيء ما تسوى