ورد الغرام

يالضمير العذب في عسرك معاي ولينك=ما يشيّد بيت حبّ الا .. تحتـه اعمـاده

ايه خايف من فراقك يـا بعـد مغلينـك=دام قلبك سارقٍ قلبي ..؟ وهو فـإمهاده

والله ان احلى سنين العمر هيّ . إسنينـك=انت يا طبّ الجروح اللّي بدون إعيـاده

الحزن فيني غدا بيـن الحيـاه وبينـك=من طموحٍ معلنٍ عنـد الزمـان إجهـاده

كود لا حطيـت كفّينـي علـى خدّينـك=مات حزني والسعد فينـي بـدا ميـلاده

خـلّ كفّينـي عليـك وفوقهـا يدّينـك=دامها فالخاطر الضايق .؟ سبيل إسعـاده

كلّ مـرّه نلتقـي فيهـا تزيـد بزينـك=كنّ وجهك فيه .. تغيير الملامـح عـاده

وان تجمّعنا .؟ سريت وضعت في ليلينك=ما يقدّينـي بهـا . ألا نـارك الوقّـاده

فيك حاجه من شعر راسك .؟ ليا رجلينك=يطمع إبها من يشوفك . لو وراه احفـاده

مير لا تومي بعينك لـيّ . لبّـا عينـك=اقعد اسوّي لـي اشيـا والعـرب نقّـاده

ما نبت ورد الغرام ألا . علـى كفّينـك=يا بعد جور الزمـان وموقفـه وإعنـاده

ويق .. من عيني على قلبي وقلّي وينـك=كلّ لحظه مرتبة حبّك .. تزيـد زيـاده

قام دمّي فـي شراييـن المقـام يعينـك=لين صرت بداخله .؟ سيده وسيد اسيـاده

كان ديني في رقبتي في رقبتـك دينـك=كلّ منّا عـارفٍ وش غايتـه وإمـراده

والغلا حبل المشاعر .. والجفا سكّينـك=والعهد بيني وبينك ما وصـل ميعـاده