اشوف ناس(ن) على التشجيع ماموره = كل(ن) يشجع على الهامش وهوماشي
والله والله مشجع لاعب الكوره = تشجيعنا للحرس والجيش يا ناشي
اللي فشقهم ينومس في الدجا نوره = وفي المعركه يرخصون الروح ببلاشي
مخباطهم يضرب المجرم على زوره = مابه مواعيد يصطا خصمهم كاشي
الى اعلن الحرب صف الجيش طابوره = اللي براسه دجر من فعلهم شاشي
اجنود في المعركه تحت امر اخو نوره = ابناء الوطن مابهم كندي ولاطاشي

ياتل قلبي تل غرب المجاذيب = اللي يسقي عاليات الفروعي
غرب(ن) تتله بالرشا الفطر الشيب = من صفقة الجيلان غاد(ن) مزوعي
اسهر وكاثرت(ن) علي الدواليب = والليل عندي راح كنه سبوعي
وصدري تزايد فيه حر اللواهيب = والقلب كنه من محله يفوعي
والدمع من عيني تنثر على الجيب = ومن كثر عبراتي بكبدي فلوعي
كني وحيد(ن) شاف ربعه مصاويب = اقفي عيونه غرقة بالدموعي
مغير اوسع خاطري بالهناديب = يوم(ن) ماحولي من الربع دوعي
بعض المرار اقنب كما يقنب الذيب = وبعض المرار اصبر ولوني جزوعي
قلته وانا يم اليمن بين اجانيب = حضارم(ن) واشكال من كل نوعي
قالوا وشنت وقلت من منبع الطيب = انا من الاد الظهيري ربوعي
ربعي سهول(ن) ينطحون المواجيب = اهل السيوف اللي تقص الضلوعي
الي ثنوا من دون حرش العراقيب = تزاهمو والكل منهم قطوعي
حوض المنايا ياردونه الى هيب = يدلهم غمر(ن) عزوم(ن) بتوعي
الا قالت الخفرات ذي حزت الطيب = وقامت تصيح وتنتخي للفزوعي
ثم مزع(ن) جيوبه(ن) الرعابيب = باعوا لعينا كل عذرا فروعي
ورجالهم له بالملاقي مظاريب = ويهوي هواية صيرمي(ن) شلوعي
الصيرمي الي الىصاب ماصيب = حر(ن) على جول الحباري بتوعي

من راح مع مسفر شريت المنيحه من راح مع مسفر = من راح مع شالح ماشرى شين من راح مع شالح
قلبه تقل ميت عسى الله يبيحه قلبه تقل ميت = يمشي وهو نايم وهو وين انا وين يمشي وهو نايم
قال استمع مني بجيك بنصيحه قال استمع مني = ان شاف له فاطر يقول اشتر الزين الى شاف له فاطر
مافزع على الصايح الي وحيت صحية مافزع على الصايح = مناعتي بين القساوات واللين مناعتي
واثبت الاقدام عن شبه طيحه اثبت الاقدام = امشي بعقل وراي مسمع مشرين امشي بعقل وراي

يا سيف كفي من اللوعات طول الوقت قاسي = عساه مالحقني منقود من يم القساوه
الوقت قسى ايدي وحسني واظهر نحاسي = ويحوسني حدر وقتي كل ما اشفي بالعلاوه
والي يدينه رقاقه ما يجي قلبه حساسي = ماغير في البيت عند امه مكف(ن) الشقاوه
مقلد(ن) العذارى بالشعور وباللباسي = خلا دروب الرجال ونافس اخته في البناوه
ياليت ربي يخلس المرجله منه اختلاسي = ورجل(ن) يعاف الخشونه مال مرجلته ظراوه
الخشن في حزة الضيقات والخفات راسي = يرسي الي بانت الخلات في بعض الجباوه
جبو(ن) لحومه كبار(ن) من فعوله في التباسي = يكثر الهرج في المجلس بلا فعل وبراوه
الي يجيب السوالف واجدات بلا قياسي = هذاك عند الرجال العارفين اسمه العاوه
الرجل صندوق مال الناس في قفله عساسي = صندوق مأمون مالحد(ن) على فتحه جراوه

يقول ما ينهض الطير من الارض الا الجناحين = ومن دون جنحان لو هو حرهمت به عليه
وترى طرات الحياة الواجب الي بين الآخوين = قضي اللزوم ومحبة القلب دام النفس حيه
ولا بد من حفرة(ن) يرجد على الرجل بالطين = ويحط له سبع لبنات ويجيه محاسيبه
ويقوم اخوه يتمنى شوفته فالقبر بعدين = ويقول انا مدري احسب متعة الدنيا مديه
ويقول يا ليتني واخوي فالدنيا مد يمين = اوليتني مت معه وميتتي عندي هنيه
ما عادلي بالحياه اشوف تالي الوقت تغبين = الموت عندي هو احسن من حياة المحقريه
ويروح وقته وهو مابين تسجيم(ن) وتحزين = ويقول الا واعضيدي يذكره صبح وعشيه
قلته ما بيلي من احد(ن) شكر(ن) اعلم بالقوانين = قلبي سلوم(ن) على الجدان يوم الجاهليه
ولانيب ابي احد(ن) يساعدني ولا يقضي معي دين = ولانيب ابي احد(ن) على ما قال يعطيني عطيه
هذا كلامي وانا مالي هدف والناس دارين = لكن ابيها تجي الرفقه على الغايه طريه
وصلاة ربي عدد حجاج بيت الله الملبين = على نبينا تقدم بالرساله للبريه