الســـــ ســــــيـفــــ ـــــــهلي

يالله يا كاتب جميع المقادير = ياعالم بإسرار مخفين الأسرار
تحفظ وطنا والعيال المناعير = اللي على الجبهه يبيعون الأعمار
دون الوطن ومشكلين الطوابير = تحت الأوامر للتصدي عن الدار
بقيادة المحبوب قايد هل الخير =فهد العرب فهد الوطن فهد الأخيار
ياقف بوقت الضيق وقفات تقدير =دون الوطن والشعب والضيف والجار
زعيمنا اللي له على الكل تأثير= له ما قف مازعزعه هرج ثرثار
وله هيبة يامن بها صغير وكبير= وله سطوة تصغر بها كل الاشبار
هذا فهدنا ما حصل منه تقصير = يسعى على جمع العرب بين الاقطار
وأخوه عبدالله حكيم التدابير =عضد الفهد رجل الشرف نسل الاحرار
ولي عهدنا سار في الخير ويسير = منهاج أبوه وزود الشعب مقدار
ويعيش منه طور الجيش تطوير = درع الوطن عن كل طامع وغدار
نرخص دمانا للوطن دون تفكير =في ساعة تصغر بها كل الافكار
هذا الوطن ما عنه صده وتبرير = ولا خير في نفس توحى للاقدار
ويا مفكر في الدار مالك نواصير = حنا هل التوحيد وافين الاشبار
ستر الوطن ستر البني والغنادير = قمع العدا والمعتدي وين ما صار
حنا سعوديين دين وتكبير = سجل لنا التاريخ صفحات وشعار
شعار حق ومجد مهوب تزوير= رفرف علمنا فوق واشرق بالانوار
ويا مملكة تصعب علينا التعابير = عن فضلك المعطى وحلوات الاثمار
عهد علينا لو تطول المشاوير = نحمي ثراك ونسقي عداك الامرار
حنا عيالك مانحسب المخاسير = نموت موتة حق ما نلبس العار
واللي يهددنا عرفناه خنزير = خنزير ما يسوى له اليوم دينار
خان العهود ودمر السلم تدمير = بافعاله البشعه وغزوه على الجار
صدام يامفجر قوى العرب تفجير = فاسق وجاحد للجمايل ونكار
حربك ثمان سنين روس الجماهير= وسحبت جيشك واصبح الجيش منهار
نحذرك ياناقص العقل تحذير = مالك ومال أهل المروات والكار
بنباء العرب ونباء الدول والتقارير = منفي ولا لك من جرايمك مظهار
في المجتمع منبوذ محقور وصغير= وان مت يالله جعل وجهك على النار
ودولتك ياجابر لها يوم تحرير = من زمرة غارت بها وقت الاسحار
ابشر بيوم يبهج الصدر ويصير = بسمة على شعبك ونصر للاحرار