مرثية للشاعر سيف بن محمد السهلي

السلام عليكم ورحمة الله وبركاته

هذه مرثية سيف بن محمد السهلي في اخيه ورفيق عمره و فقيد الرويضة

محمد بن عبدالله السهلي الذي وافته المنية يوم السبت الموافق 29/1/1428 هـ

اثر حادث مروري . رحمه الله واسكنه فسيح جناته

يالله يــارب المخـالـيـق يالله = رحمتك يالمولى عزيـز الجلالـي
ارحم محمد واجعل الخلـد مثـواه =أمين يا منشـي غزيـر الخيالـي
وتقبلـه بالعفـو واغفـر خطايـاه = واوسع عليه القبر مع كـل جالـي
ومن الجحيم وفتنة القبـر تحمـاه = ومن رحمتك تضفي عليه الظلالـي
انت الإله المعتلـي وانـت مـولاه = عطفك ولطفك يا مجيب السؤالـي
والموت حق وكل نفس (ن) تحـراه = ونهايـة الدنيـا تراهـا الزوالـي
ورفيق عمري غيبت بـه منايـاه = لا والله الا فرقتـنـا اللـيـالـي
اقفـى مـن الدنيـا وحنـا بنقفـاه = عزي لمن مثلي فقد شوف غالـي
ماعاد لي من شوفته غيـر ذكـراه = يهرج معي ويمرني فـي خيالـي
متصور(ن) لي يا عرب كيف بانساه = لانيب لا دالـه ولا نيـب سالـي
على الوفا والطيب والحـب مبـداه = رفقة شرف ماهيب رفقـة هزالـي
مخلص معي بالفعل والسر ينصـاه = صندوق للأسـرار مالـه مثالـي
وفي غيبتي لا غبت ما زاد بحكـاه = في شذبة العرقوب ما لـه مجالـي
أبكي عليه بصدق ماهـي مـراواه = لا ذقت لا راحة ولا ارتاح بالـي
شي(ن) بصدري ما قدرت اتحاشاه = يالله يا المعبـود تلطـف بحالـي
يا كبر مقداره ويـا كبـر فرقـاه = السبت بعد الظهر شـد الرحالـي
ذقت الفراق اللي سمعنـا بطريـاه = مؤمن على رب العروش اتكالـي
والله ثــــــم والله والله والله = إنه علـى قلبـي يسـاوي عيالـي
لكن حكم الله على الخلق وامضـاه = عمره كتبـه الله ولا لـه محالـي
راضين بالمكتوب شـره وحسنـاه = وإيمانـا بالله عزيـز الجـلالـي

الشاعر سيف بن محمد السهلي

الرويضة بالعرض

الاحد 7/2/1428 هـ

تغمد الله الفقيد بواسع رحمته

وصح لسان الشاعر سيف بن محمد

ويعطيك العافيه أخوي ابونواف

على أطلاعنا على المرثية


دمت بخير

نسأل الله ان يغفر للفقيد وان يرحمه

فهو فقيد الجميع ولكن هذا قضاء الله وقدره

ونشكر الشاعر سيف السهلي على هذه المرثية الجميلة

والتي تبين مدى الحب والعلاقة التي كانت تربطه بالفقيد ,,,,

	المشاركة الأصلية كتبت بواسطة الطيب

	نسأل الله ان يغفر للفقيد وان يرحمه فهو فقيد الجميع ولكن هذا قضاء الله وقدره ونشكر الشاعر سيف السهلي على هذه المرثية الجميلة والتي تبين مدى الحب والعلاقة التي كانت تربطه بالفقيد ,,,,

الطيب شاعرنا ابو محمد تربطه صلة قرابة مع المرحوم

قبل ان يصير صديق

مشكور الطيب على مرورك

الله يغفر لمحمد الغطاس ويرحمه ويسكنه الجنة,,,

وصح لسان شاعرنا الكبير أبو محمد,,,,

ومشكور يابو نواف على إتحافنا بهذه المرثية,,,