فر قلبي فرة اللي بالهوى مفترة = مايوردها علياني ولا جفالي
كونكورد صمموها صانعين الذرة = واستعدت تطوي الامتار والاميالي
واستلمها كبتن تصميمها ماغرة = يتفنن في قيادتها بدون اشكالي
فرها فوق المدرج مرتين ومرة = لين عرض جنبها صفق الهبوب العالي
وجر قلبي جر قوس في يد اللي جره = يوم جاز له اللحن والراس ماهو خالي
مايشوف من السما لوكان كبر الذرة = نايشه ضيم الزمان وفاقد له غالي
الفراق اكبر مصيبة والجفية مرة = تهدم الظن الكبر وتوجع الرجالي
مثل ماشفت الجفا في عيونة المحمرة = مثل قوله روح في فالك وانا في فالي
لاتذكّرني لا احرقك الزمان بحره = وانس حتى سنترال البيت والجوالي
وانس فزعات توجع خاطرك وتسره = يوم تنخاني وطوح غترتي وعقالي
هب ياهذا الزمان الله يكافي شره = بعد كان البرق برقي والخيال خيالي