الـكـــل يـبـكـيــهـــا

#1 (**permalink**) 21-08-2009, 02:25 AM

قصيده كل بيت يدمي القلب من شدت معناه
احزني كثيرا وراق لي اتمني يروق

خايف عليها من الثرى غطاها ولاالحصى حافي اخاف اذاها
..
اكرم عليها بالكفن يامطوع بالبيت ظل فراشها وغطاها
..
اكرم عليها بالكفن هذي امي وأشهد عليها في ماعطت يمناها
..
هذي الضحى واليل يتحرونها هذي السماء ونجومه تنعاها
..
هذي السوالف مثلنا تبكيها هذي الارض تنشد عن اثر لخطاها
..
هذي الكبيره كبر هذي الدنيا هذي العظيمه جل من سواها
..
ابكي عليها مو نهار وليله ولاسنه تمشي وأعد قضاها
..
ابكي عليها كثر ماشالتني وكثر الحنين اللي اختلط بغناها
..
وكثر الاسامي وكثر من سموها وكثر النجوم وكثر من يرعاها
..
ابكي عليها من القهر يادنيا من لي انا من لي عقب فرقاها
..
من فتحت عيني ولاخلتني وشوفو ولدها بالقبر خلاها
..
هل التراب بوجها ماقصر شفتو ولدها كيف هو جازاها
..
لوانها مكاني ماسوتها لاكن اعز عيالها سواها
..
يادود يادود شفها ذابله جنبها انا ولدها وحاضر وافداها
..
قطعني هاك اللي تبي من جسمي بس الكريمه لاتجي بحذاها
..
وأوصيك امانه قل لها تعذرني وتكفى تروح تحب لي ماطاها
..
ابيها تغفر لي مثل ماكانت كل خمله منهي بطيبها ترفاها
..
يالله عساها بنعيم الخالد وعساها في جنة عدن سكناها
..
يافضو هاذا الكون ياهو خالي ياضيق هذي الدنياء يامقساها
..
يامر طعم فراقها يامره ماني مصدق ارجع وما ألقاها
..
وشلون اجي غرفتها ماهي فيها وش عذري لسبحتها ومصلاها
..
وش اقول انا لدولابها واذا سالني مشطها وحناها وعباتها
..
ومي زمزم ومصحفها والمبخره ورشوشها ودواها
..
الكل في غرفتها مفتقدها حتى الجدار متفطر ويرجاها
..
الكل يبكيها مهو ناسيها يالله صبرني وشلون انساها
..
ياليتها ياليتها ماراحت وخلتني او وسعت لي بالقبر وياها