رائعة السهلي في الامير سلطان بن محمد

سلام يا اميرٍ على الطيب مذكور = كلٍ ينعٌم كل ماجا مجاله
حرٍ ولد حرٍ مجرب ومشهور = ومعربٍ مابين جده وخاله
سلطان من روس السلاطين مذخور = والمدح في أهل المدح ما أوسع مقاله
تاريخ جده بالبطولات معمور = مروي السيوف الحدب رمز الشكاله
وابوه ابا الفزعات في حزة الجور = كم واحدٍ في النايبات ارتكا له
وكم واحد من جور الايام ممرور = وشكا لـ بو سلطان وارتاح باله
عسى الولي يضفي على قبره النور= رحمة ولي الكون منشي خياله
ويطوٌل عمر اللي في الأيام له دور = شيخٍ تسلسل من شيوخ العداله
شيخٍ على فعل الجميلات مامور = الله غرس في النفس طيب وجزاله
سلطان ابو نايف على الجهد مشكور = قام المزاين طيب الله فاله
مطلق حجاجه ما يجي يمٌه قصور = فيه الوفاء فيه الكرم والجماله
العز والناموس والحلم مبذور = في راس من رام الفخر واعتلا له
الطيب في سلطان له ساس وجذور = جده وابوه أوصوه واوصى عياله
المجد ميراثه من قرون وعصور = متربع بين الكرم والبساله
وان جوه في مبلي ضعيفٍ وماسور = تقدم بوجهه وقدم حلاله
كم واحد قدم المنيات مسمور = وسلطان بامر الله يفكك حباله
أمسى الأسير بهم والصبح مسرور = شاف الحياة وزاد فيها ابتهاله
سعى له اللي يحكم الرأي والشور = يرجي بها رحمة عزيزٍ جلاله
وسلطان من روس السلاطين مذخور = والمدح في أهل المدح ما أوسع مقاله