مجالس الرويضة لكل العرب - يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ ـو

حياكم الله خلوني عاد أعطيكم نشرة جدولي اليومي من يوم الثلاثاء حتى الآن

صليت العصر ورجعت بسرعة كان عندي إجتماع عـ الأيميل مع أحد الأشخاص الطيبين أن شاء الله
والله أنتظرته وتآخر علي ومسجل عندي بالنوتة موعد أسنان لأهلي قلت ورى ما اوديهم بدري وآخلص والله خذيتهم وأنا رايح للمستوصف جاني اتصال من زميل لي يقول أن عندنا موعد بعد المغرب قلت والله يافلان ما آذكر بس وش الموضوع ويقعد يفصفص لي الموضوع وآخيراً تذكرت قلت خلاص على موعدنا إن شاء الله
ويوم خلصت من المستوصف وأنا طالع ويجيني إتصال من آغلى ناسي << تراه عضو معنا
قال : انا عازم الشباب في ذاك المحل [ الخرارة ] ونبي خوتك
قلت : وآهدى << يعني تم إن شاء الله
<< طبعاً نسيت موعدي مع زميلي , لأني ما سجلت الموعد بالنوتة

والله وأنزل أهلي بالبيت وأحرك واصلي المغرب بالطريق وأكلم واحد من اعيال عمي اللي لهم بالعين رحمه
<< بإذن الله أعطيكم سالفته بس بعدين لأنها تضيق الخاطر

واكلمه بالجوال..
قلت : وينك
قال : عند جدي << جده طاعن في السن وطريح الفراش
قلت : انا معزوم عند أخوياي وأبيك تخاويني
قال : عطني 10 دقايق
قلت : أنا بالطريق ولا تتآخر علي تكفى
قال : طيب طيب أنا بكلمك << عنده خواله وجدانه ومستحي يتكلم قدامهم

ويوم خذيت لي شوي ويدق علي وأواعده عند ذا المكان ويجيني ويلبق سيارته ويركب معي ويوم وصلنا طريق الملك فهد ويدق علي المعزب
قال : وينك
قلت : مقبل على طريق التخصصي
قال : يالله انا وراكم << أمحق معزب هع هع

ونسولف أنا ورفيقي ولا حنا مسرعين نمشي على مهلنا ويجيني إتصال من أحد المدعوين للكشته

قال : وينك
قلت : أبد توني متعدي الجسر المعلق
قال : طيب ممكن طلب
قلت : آمر
قال : أرجع لي في أم الحمام << على أن ذا الحي نآيم بس في الغآلين
قلت : عيوني لك من عندي غيرك بس
قال : تسلم أنا بإنتظارك
قلت : مسافة الطريق

والله ونرجع ونصلي العشاء بمسجد الشيخ راشد السهلي ونطلع للشباب وناخذ آثنين منهم << كلهم اعضاء عندنا

ونروح ونتعشى ونعين من الله خير ولا رجعنا إلا الساعة 1:30 بعد منتصف الليل
وآرجع لأم الحمام وأنزل الحبايب وأروح لـ حي المروج وأنزل واحد نفر وأروح طريق خريص وأنزل صديقي عند سيارته << صرت مناحي على غفله

وآغط لي غطه حتى آذن الفجر وأصلي ويطير النوم وأجلس بالمجلس و على النت لمآ الساعة 8:30ص طبعاً قد أفطرت وعينت من الله خير وبدأ راسي يلعب بوووش << دايخ أبي أنوم

والله واروح لـ غرفتي وأسدحها نومـــه حتى آذان الظهر وأقوم وأصلي وأروح عندي أجتماع مع مسئول في حي الملك فهد ولا طلعت منه إلا 1:45م طبعاً دايركت على مستشفى قوى الآمن عندي كمان أوراق في المبنى الإداري ولا حصلت رفيقي اللي أبيه << يوم أربعاء ليش مايفرك من الدوام

وأرجع للبيت قبل آذان العصر بنصف ساعة أتغدى وآغير ملابسي وألبس جواتي المشي وأروح للساحة البلدية وأخذ لي كذا لفه تقريباً 6كيلو وبصراحة تعبت وقلت خلني آجلش شوي وبعدين أكمل المشي وآجلس بالأرض ومتكي على الضغط العالي << كيبل كهرباء
واسمع ذيك الحرمة اللي تلعب ولدها وتبي تصورة صورة حلوة كيوت على قولتها
وأرفع راسي أقعد أناظر في الولد وينحاش الولد من أمه مدري أخته ويوقف بيني وبين ذا الحرمة وتقعد تصورة طبعاً أنا بصراحة بديت أشكّ هي تصور ولدها ولا تصورني بس بصراحة الولد حبوب ومملوح تقول أمه سمآآيل ويقعد يتشقق ضحك وبعد الصورة يقول لأمه ماما كيووووت صح وعاد انا دوروني ميت ضحك على ذا الولد وأقوم أكمل المشي ولا قدرت أكمل قلت اخاف تصورني بعد ماني ناقص بروز إعلامي

واركب سيارتي وأطلع لـ البيت ويوم وصلت البيت وتدق علي أختي تبيني أجيبها عند أمي << هي في بيتها ولا جنب الساحة البلدية

والله وأرجع لها وأخذها وأنزلها عند أمي وأخذ شوور واصلي المغرب وبعد الصلاة جيت بدخل البيت ويدق علي واحدن موب مشبب

قال : وين دار الوكالات فيه
قلت : انت وينك
قال : أنا محرك بلحق على وكالة أكسيوم قبل مايسكرون
قلت : تمام آجل بروح أنا وياك عندي جهاز بوديه بعد
قال : اطلع عند الباب

هذا جوال بنت عمي سوني اريكسون w880 قاعده تشحنه وتجي لجين بنتها وتكب عليه كاس موية وبنت عمي مادرت عنه ويوم جت تفصله من الشاحن لـ الكاس منكب والجوال طافي وتسأل لجين
قالت لجين : أنا كبيته وترى انا ياماما آسفه
<< عاد أمها تقدر ذا الموديل ولا تبي نوع ثاني
وتنحاش لجين من أمها
قالت لجين : عمو أنا أحبك
قلت : أجل والله ما حد يلمسك دامك تحبيني يابنتي

وآخذت الجهاز وقلت والله مايصلحه إلا أنا << ويقعد عندي له 3أشهر ماصلحته ناسية والله

والله ونروح انا وخويي وندخل البقالة
قال : وش تبي آجيب لك
قلت : زيك
قال : أجيك لك عصير طماط
قلت : دامها كذا جب لي كيكه نحول قد ماتقدر
قال : والله نحول حلوة ...ونزل

ويوم رجع الولد
قال : والله مالقيت إلا حبه وحده وأخبرك نفسك عزيزة ومدري وشلون يبي ياكلها ذا الدوب
<< صارت الدعوى هياسة
قلت : خلاص أنت أركب وخلنا نلحق على الوكالة
قال : يالله مشينا
وحنا في الطريق قعد يسولف بالجوال و أنا طقني الطفش منه ومن سوالفه البايخة وأسحب الكيكة وآكلها بالعافية
ويوم خلص من المكالمة أشوف يده تلمس مكان الكيكة
قال : أنت ســـفـــيتها << يعني أكلتها
قلت : أدري أنك بتقول بالعافية صح
قال : إلا سمٍ هااااري .. يومك تاكلها ليه
قلت : أش ماتنفخ على عمك

ويختلط الحابل بالنابل والصوت ارتفع

طبعاً كلن زعل على الثاني وأنتم أحكموا عاد
وأنروح لـ للوكالة ونحصلها مسكرة انتهى الدوام ويناظر فيني وهو معصب خشمه كبر الدله
ويجيه إتصال من البيت ضروري اللي فهمته أن الرجال مستعجل

عاد اللحين أجتمعت زعل + حالة مستعصية + سرعة جنونية

وعاد انا ما اقدر أقول شي وأربط حزام الأمان وأتشهد وأخليه على كيفه حتى راحت سكنيتة
ويوقف يعبي بنزين وأنزل أجيب كيكة نحول وأحطها في مخباتي ويوم جاء يحاسب صاحب المحطة طلعت الكيكة وحطيتها مكان الأولى ويزمطها << يعني يزرطها << يعني يآكلها بسرعة << يعني بشفاحة هههههه

ويوم كلاها وألتفت عليه واقول لعنبو دارك اللي يزعلك كيكة واللي يرضيك كيكة .. أمحق رجال

وينزلني في البيت وأروح وأخليه والله إلا الآن و أنا شايل عليه

وطبعاً نمت على الساعة 10:30م << دايخ

وآصبح اليوم على الساعة 8:00ص وأفطر وأعين من الله خير وأروح للمكتب وأختم كذا ورقة وأرجع على الساعة 8:45ص
وآطلع لـ بيت عمي آخبر الشيبان عند كل صبح وأروح وأجلس عنده وسوالف حتى جاني إتصال على الساعة 10:12ص من مكتبة جرير يفيد بإنعقاد إجتماع بعد المغرب قلت لا انا جاي اللحين الموضوع ضروري طبعاً دخلت قاعة الإجتماع على الساعة 11:00ص وأنتهاء على الساعة 11:36ص وأتفقنا على إجتماع بأحد فروع المكتبة على الأسبوع القادم
طبعاً رجعت البيت وجلست مع أمي حتى آذن الظهر وأصلي وارجع وعلى النت حتى الآن .

وخلوني بعد اعطيكم وش عندي ذا الليل بعد صلاة العصر بودي اختي لـ السوق وبرجع أحمل آغراض مع اخوي طبعاً انا بنزل في معارض النسيم للسيارات وأخوي بيروح للمخيم << تونا حاطين مخيم في مرحلة التجهيز

وبعدها أعتقد ماعندي أي إرتباط إلا إن كاني ناسي بس النوتة فاضية من بعد المغرب

وهذه نشرة موجزة من يوم الثلاثاء بعد العصر حتى يومنا هذا الخميس قبل صلاة العصر بـ 16دقيقة حسب توقيت الرياض