|
رد: يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ في البداية .. للأسف كنت أعتقد ان شيكا خادمة ...! وأتمنى أن معهدك ذااللي تروحين له متخصص في القطاع الصحي لأن كذا والله معاناة من البزران لـ أمهم وأنتي والله جاك حقك من الإرهاق والتعب والسهر والإزعاج .. أحتسبي الآجر عند الله بالنية يتحول هذا العراك الجهدي إلى عبادة بإذن الله وأتمنى لكي نوماً هادئً في هذه الليلة بلا همتاروا بلا هم بصراحة عطيتيني إعاز حتى أكتب يومي..أنتظروا |
رد: يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ هلابك اخوي ذيبان اما خدامه وتجلس علي الكيبورد تطق طق هذا ياطويل العمر اختي وموجوده كمان معنا في المنتدي اماعن المعهد ايه نعم هو معهد صحي والله الحمد مابقي شي وانتهي منه امين الله يكتب لاجر لنا ولهم شااكره لك اخويي وانتظر يوومك واياامكم |
رد: يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ تحبون العلوم الطيبة << أحري بها هع هع طبعاً البارح كنت من بعد صلاة المغرب وأنا في حفل منتديات مجالس السهول لـ تكريم عضو مجالسنا الدكتور فهاد بن سعد بن هملان أنا ومديرنا ابوهلا طلعت من الحفل تقريباً 11:40م وكنت على موعد مع سواق جديد طبعاً أنا اخواني يالله لا تبلانا متشتتين في كل ديره تحصل واحد ..قولوا ماشاء الله *الكبير طبعاً مهندس عنده مؤتمر في المانيا وأبشركم جاء يوم الخميس الصبح والمغرب وهو يمشي للجبيل لإنجاز أعماله *اللي بعده طالع دراسة في بريطانيا << يوم شاب ودوه الكتاب عمره تقريباً 45 سنة ومن زين الطبوع موصيني على بيته *اللي بعده بخميس مشيط نقيب في الجيش *اللي بعده والله ياجماعة زين أن شفته في الشهر مره يعمل بالطيران ويصبح في ديره ويمسي في ديرة *اللي بعده ... الا أقول وش جاب طاري أخواني اللحين يوووه أيه أخوي اللي ببريطانيا وصاني على أعياله وأهله طبعاً السواق الدريول مسافر وتآخر ماجاء والمدارس بدت اليوم والكلام امس والله وقابلت رجال عاقل وسواقته موزونة الله يالدنيا << انا كنت غشيم وآعتقد إلا الآن هههههه الوكاد الرجال صلح لي وصلت له طبعاً لا يخفاكم أنه يماني متخلف يعني لا إقامة ولا رخصة يعني إذا كان سروق سرق السيارة زي السلام عليكم هذا إذا ماسرق السيارة بالبزران بعد..! عموماً أتفقت معه بالراتب وعطيته مفتاح غرفته وعطيته مفتاح السيارة وقلت انت اللحين نام وباكر 6:45ص تكون السيارة حامية وماشاء الله تبارك الله سألت عنه اليوم يمدحونه ويقولون أنه مغسل السيارة ومسقي المزرعة وأمورة تمام طبعاً البارح قابلت ولد عمي بالحفل جاي من الشرقية وكنت مستغرب مع أنه ماله ومال الشبكة العنكبوتية والله أجلس معاه أنا :هلا أبوناصر وش ذا المفاجآة الحلوة أبوناصر : سيبك من المفاجاآت أنا أبيك ضروري <<ماينتفاهم معه أنا : سم وش تامرني فيه طال عمرك أبوناصر :أبي وزارة المالية وين صايرة أنا : بس وزارة المالية سهالات أدلها وش عندك أبوناصر : عندي شغل فض نفسك باكر نروح لهم من الفجر انا : أبشر يابوناصر باللي تبي ابوناصر : يالله تبي شي أنا بمشي أدور لي سويت بنام وباكر بينا ألو لاتخلي الجوال سايلنت (صامت) أنتبة أنا : والله العضيم ماتاخذ سويت ولايحزنون البيت فاضي ولا به إلا أنا وأنت أبوناصر : وش حقه أبوبندر ذا الحلف أنا ابي أرتاح بروحي انا : وفي البيت منت مرتاح ياعيني أبوناصر : لا بس اخاف يكون فيه إحراج ولا شي أنا : أقول لا يكثر بس ألحقني عـ البيت أبوناصر : ههههه صآآر واللحين جينا لهذا اليوم قمت على الفجر وعليها إلا اللحين بعد الصلاة شيكت على عده مواقع على عجالة أخذت غيار ورحت أسبح على الساعة 6:10ص وأنا بغرفتي قلت ورى ما آخذ غفوة على ماتجي الساعة 7:30ص والله قمت و ادق على أبوناصر ولا يرد قلت أوريك والله وألبس وأدخل عليه وأصحيه قال يامعود توني نايم وش حقه تصحيني << الرجال دآيخ يتوقع الساعة 2:00 الفجر قلت شف الساعة يالحبيب 7:35ص يالله خلنا نلحق على الوزراة قال مايحتاج وزارة خلني انام بس والله ما خذيت لـ هو ينقز من فراشة تأخرت يالله خلنا نمشي تآخرت << ذا وش يحس به هههه وأروح أجيب الفطور على مايغسل وادخل المجلس لا هو واقف ومعطيني ظهره قلت يالله أن تخلف عليك وش تصلي أنت << مصلي انا وياه بالمسجد بس انا نسيت ويلتفت علي قال أنا ما أصلي بس قاعد أقول اسبح ولا ما اسبح ولا أقولك خلنا نمشي حتى فطورك مانبيه تآخرنا وينقزز ويشغل السيارة وآطلع له ولا هو يسلم على أبوي توه يشوفه ثم مشينا يوم وصلنا الشارع الرئيسي ولا ذا ولد جارنا ولد ماشاء الله تبارك الله قمة في الأخلاق والأدب ومواظب على الصلوات وفيه خير مايعلمه إلا اللي خلقه قلت لـ أبوناصر خلنا نشيل الرجال نوديه على طريقنا قال متأخرين متأخرين قلت انت صاحي أنت تدري وين يبي ولا وين وزارة المالية عشان تحكم على الطريق قال أنت دليلتي وعسى ماتضيع بي قلت وقف عند الرجال ولا يكثر طبعاً أنا عارف وين هو رايح يدرس في معهد الإدارة تخصص إدارة مالية يقلدني ولا عندي إلا قوة حلف والله أن تركب والله ويركب معنا ونوصله للمعهد وإشارتين وحنا عند وزارة المالية وقفنا السيارة ونزلنا ويوم جينا عند المبنى ويوقف قال يوووووه نسيت تلفوني الثاني بالديوانية رقم الرجال فيه قلت قومك والله مطفوق وتنثر الغبوق قال وش قاعد تسولف انت ماني فاضي لك قلت خلاص أنا بتكي بالبراد وأتقهوى على ماتخلص قال أنزين أنت أجلس و أنا بتصرف ماخذى له دقيقتين ويجيني راجع قال أنا آخاف أضيع قلت على كبرك وضخامة جرمك تضيع ياكبرها قال يالله بسرعة أشرب قهوتك ومشينا قلت وين قال وين بعد بنروح بيتكم نجيب التلفون قلت والله ماتروح ..أنت صاحي قال أصحى منك قلت لو أنت صاحي كان مانسيت جوالك وآناظر في الرجال مو يمي يناظر في سيارة موقفه قال هذي سيارة وهذي لوحتها خلنا نقرب منها قلت رح أقرب منها ماني رايح معك بتقهوى قال والله أن تروح معي والله واروح معه وحصلنا لوحة في مكان سيارتة مكتوب عليها مدير إدارة ؟؟ مشفرة قلت خلاص تعال نروح نسأل عنه داخل المبنى ويحصل شخص موظف ويخش بعينه أبوناصر : ابي مدير إدارة ؟؟ الموظف: وش تبي فيه أبوناصر : أنا أبيه وبس الموظف:وش اسمك أنت وش موضوعك أبوناصر : تحقيق هي اخلص علينا تبي تعلمني وين مكتبه ولا سألت غيرك الموظف:وراك معصب كذا أنت تعرف المدير وش اسمه وقد قابلته أبوناصر : لا ماقابلته الموظف: أنا فلان الفلاني ومدير إدارة ؟؟ أبوناصر : والله آسف والله مادريت عنك اللي مايعرفك مايثمنك و قعد يرفع فيه شوي ويعطيه موعد في بداية السنة الجاية ويوم ركبنا السيارة أشب لكم عليه ماتعرف تتعامل مع الناس إلى متى وأنت أخلاقك تجارية واللي اعجبني فيه أنه أقر بالخطأ ويقول طبعتي كذا وساعة طلعنا من بوابة الوزارة قال الأحوال وين صايرة قلت أقول ماني رايق لك انت ومشاويرك قال والله مجرد استفسار عن معاملة بشوف وش صار عليها وافكر أوصف له ولا نروح نفطر ولا وش السوات ويطري علي واحد من أخوياي بالأحوال قلت يالله بنروح للأحوال وتكفى لاتلطعني ماني رايق للرياض وزحمته قال أبد ماعليك قلت ماعلي بس أنت عطني ورقتك وفهمني الموضوع ووشو بس وأقول له فيه رجال أعرفه قال يارجال مانبي منّة أحد قلت بكيفك أجل انا بتكي وأنت أمسك سرى ويدخل على الصادر و الوارد وياخذ منهم رقم ويجي رقمه 129 والرقم اللحين 103 ويجيني قال هاااه وين رفيقك << يبي الواسطة قلت أشوى أنك قضبت العلم وأروح لرجال ويرسلني على المدير وآجي مدير الإتصالات الإدارية ويخدمني دايرك ويرسلنا لـ صالة 4 ونعطيهم المعاملة وننتظر حول 10دقايق وينادون على أسم أبوناصر ويجيهم وياخذ معاملته وأنتهينا من الأحوال قلت الرقم معك قال ايه ليش قلت هاته العلم عندي وحنا طالعين آناظر في الرقم ولا هو توه 116 واحصل شايب ينتظر رقمه قلت ياعم كم رقمك << ابي اللي عند الله قال 240 تخيلو ياجماعة << متى يخلص قلت عطنيه قال امعصي..! قلت ابعطيك واحد أقرب منه قال لا لا تعطيني شي فكني منك بس..وعنده ولده ويفهمه وش أقصد قال الا عطنية وجزاك الله خير ..أحسبك تلعب علي وآخذ الرقم اللي معه وآروح لواحد أطرم وبالإشارة أنا وياه << ترى أعرف لغه الإشارة وفهم وش قصدي ويقمز ويحب راسي هو رقمه 249 يعني قدمته عن 9مراجعين ونطلع لـ البيت ونفطر ونعين من الله خير طبعاً اللحين الساعة 11:40 وقال انا بروح اسلم على عمتي وأسمح لي بتغدى عندهم قلت الله وياك الله يسمح دربك...آثاري التعبان تغدى عند عمته ومشى الشرقية مادريت عنه وأنتهينا بحمد الله وآسف إذا طولت عليكم |
رد: يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ ذيبان بدايه مشاء الله عليهم اخواني طبعاوالله يحفضكم والله يسعدك يوومك بنسبه لي شي صحيح مشااوير بس انك نشمي والله يشهد وراعي واجب واشيا كثيره يسعد اياامك بكل خير والله يكثر من امثالك |
رد: يــــــــــــــ ــــــــــــــو م في حيـــــــــــــ ـــــــــــــاه عضـــــــــــــ يسعد صباحكم بكل ووود طبعا اليوم فكرت وخططنا انا وووشيكا بخطه جديده توفر علي الجميع الراحه الا وهي نطبخ اليوم ونجهز امورنا وبكره باذن الله اذ رجعنا دفيناه لانه والمعرووف مانحب المطااعم واختي تعبانه وطبعا واكيد رتبنا البيت وبخرنا وخلصنا هذا خطه مبدايه تريح هاليومين غلانا والله يعين |
| الساعة الآن 08:50 PM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd.
-
arab-line : Search Engine Friendly URLs by vBSEO 3.3.0 TranZ By
Almuhajir
... جميع الحقوق محفوظه لمجالس رويضة العرض لكل العرب ...
.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..