| |
14-01-2007, 02:43 PM
| |||||||||
| |||||||||
ياحظ البنات حظاه واللي ماجازلها تقاومني وازيدها!!!
[SIZE="3"][CENTER]بسم الله الرحمن الرحيم والحمد لله على هذا النعيم والعقل السليم في منتدى مجالس الرويضه العظيم والله يقلع بعض الحريم  >> اه يا لئيمارحبووووووووووو اقلط انت وياه الله يمسيه بالخير الوالد ويرفعه بالعافيه كان يقول اللي يلعب مع البنات يقلبه ربي بنت هذي النصيحه مسكت معي وطبقتها بحذافيرها حتى اني احيانا اذا كلمتني الوالده برضوه الله يمسيها بالخير يضيق صدري واروح لأي مكان(ن) صاد واتفقد نفسي المس صدري عسى ماكبر  اه يامنول كنت شايف (ن ) رويحتي واقول من قدك انت بتكبر وتطلع رجال لك شنبات واقول في نفسي ياربيه مسكينه امي مسكينات اخواتي بلاهن حريم مهب رجاجيل زينا ياحظي حظااااه ويوم كبرت وشفت الدنيا لقيت ان الوالد غلطان في نصيحته لي وتحسفت اني مالعبت مع البنيات مهوب على شان اللي في بالكم لا والف لا بلاي يا الربع اكتشفت الحقيقه المره اكتشفت الحقيقه الغايبه عن اعين الناس كل هذيك السنين اللي راحت نعم اكتشفت ان المرأه افضل من الرجال بمليون مره وان جيتو للحق اصلا مافيه مقارنه بينهم البته البته البته لأن الفرق شاسع وان جيت اقارن بس على شانكم اقول لكم من وين ابدأ بس ابدأ بالشات مثلا رح ادخل الشات مره باسم ولد وادخل مره ثانيه باسم بنت وانت تشوف الفرق رح امش في الشارع ادخل المحلات وشف وش لون يعاملونك وشف وش لون يعاملون البنت انا مره جيت للصرافه ابدخل مضروف ولاقدرت اشوف الشاشه من الشمس لأنها كانت ساطعه فيها انا رحت وناديت رجل الامن وجبته معي ويوم وصلنا الا وتجي ذيك البنت الزريقا المتنقبه والظاهر انها متروشة ب20 غرشة عطر الا والموظف يزلبني ويقعد يعلم البنيه ويضحك معها عينك عينك ويوم خلصت يلقيني قفاه ويروح قلت هيه وين رايح انا اللي جايبك قال مانيب فاضي لك انا عندي شغل قلت اخس ياخي انا اوسم منها اوعلى شانها ؟ شف نفسك وانت واقف عند الاشاره وملتفت يسار وطاقها هواجيس ماتدري الا وذا اللي ناشب (ن) في حلدزك يقول لك ماتستحي على وجهك ؟ ماعندك اخوات؟ وخذ من هالهواش يحسبك تناظر محارمه >> الله واكبر ياهالجمال شف لو انها هي اللي كانت تهوجس هل بيصير نفس الرد ؟ لوتدخل بنك او مخبز تاكل تبن ومالك الا انك تمسك سرى يردف سرى واه ياحمزه وخل ام عباة تجي شف وش يسوون لا ويمكن يحاسبون عنها شف فواتير جوالك كم تاصل اما البنت بكلمه وحده يشحنون لها من ذا اللين تقول بس حتى بنك بانثر عجز يقطع الشارع من كثر السيارت المسرعه اما المرأه وقف الشارع كله عن بكرة لأجل ان تقطعه هذه المرأه >> ونعم الدليل حتى الوالده الله يمسيها بالخير شف وشلون تقومك لصلاة الفجر نسأل الله الإخلاص قم الله ينزع عمرك تراهم بيطلعون من الصلاة ماقمت قم يا الطيطا وانواع التقبيص واحيانا يصل الوضع الى درجة العض وشف امك وشلون تقوم اختك تقول لها (قومي يابنيتي الله يسخر لتس وليد الحلال قومي لاتطلع الشمس ) واذاقامت صلت في غرفتها ورجعت تكمل نومها لاويمكن ماخذه إجازه ومحد يقومها وتكملها نومه اللين الظهر ومحد يقول لها شي شف انت تقوم الصبح بتروح للمدرسه طبعا لازم تصحصح زين لأنك بتسوق في الزحمه والغثا اما المحروسة اختك اللي هي البنت نايمه في السياره وتشاخر وتاصل مدرستها او قل دوامها قبلك ومادرت عن الزحمه ولايحزنون ثم تروح لدوامك ودور لك ملبق وكل هذا ولاتبيك تتأخر وفي الاخير ماتلقى الا وجه منعقد يقول ليش متأخر عن الدوام تبون تقولون لي البنت تطبخ وتغسل اقول ايه هين يجيب الله مطر الدين ما اوجب عليها ذلك >> انبسطن يا الحريم والله هن عاد داريات عن اوجب ولا ما اوجب خالصين منها كلش في وجه الشغاله من طبيخ وغسل وكنيس >>زيدت الياء للموسيقى الاذنيه كذلك تلبيس البزران وعبودي يحب الحكاكه برضوه في وجه الشغاله لاخلا ولاعدم بل انظر الى حال بيتكم عندما يقترب موعد مغادرة قلبه النابض كيف يكون مختبصا رأسا على عقب كل هذا من اجل ان (الخديديمه) تبي تسافر ولاهيب راجعه او قصو لها تأشيرة خروج وعوده وقالوا ماش عسى ماتهون وتقول منيب راجعه خير ياطير البيت مليان بني ارداهن يمشي على زندها التيس ولكنهن غثاء كغثاء السيل يمكن تقولون لي الورث للذكر مثل حظ الانثيين اقول لكم انا مابي ورث العوض في المهر >> ومن يضمن لي ان الوالد مايصير مديون وحنا مادرينا ثم ياكلها الولد تسديد بعدين ام عباة ماعليها مصاريف يعني مهيب محتاجه فلوس الله حق مشكلة الحرمه انها تالد فعند احساسك بمغص شديد يستوجب ذهابك الى دورة المياه حينها تقول عزتي للمره هذا وهو مغص اجل لو هو طلق من طلوق الولاد؟ تقولون يمكن تطلع( شيينه) اقول مهيب مشكلة المثل يقول كل ساقط وله لاقط بعدين محد يقعد بدون عرس بالعكس وبحكم خبرتي الطويله في الملاعب اشوف البنت الزينة تاخذ واحد(ن) شين والعكس صحيح بعدين وش المشكله لو خذت شين أو (جعافه ) ترى من حظها خلها تمشي في السوق معه ومحد من البنات تطالع فيه يعني تحط في بطنها بطيخه صيفي وماعليها من البرتقاله >> ايا ذا البرتقاله اللي كل ماطق عود بعود قالوا برتقاله حتى في الحديث الشريف ما بداها على الرجل مرة وحده ولا اثنتين بل ثلاث "امك ثم امك ثم امك " وازيدكم من الطين بلكه البنت اذا اعرست جابت لاهلها وليد اطلق لاهلها من ولدهم والا الولد اذا اعرس اووووووووه نسى ان عنده اهل وااه ياحمزه وعقب هذا كله يقولون وين حقوق المرأه اقول ارحمونا وعطونا نصف ذا الحقوق ونقول مشكوووووورين الخلاصة من الموضوع ياحظ المرأه اذا تزوجت واحد كويس يعاملها معامله كويسه يعرف انها مخلوقه من ضلع اعوج يستمتع بها على حالتها الراهنه وما يطالبها بشيء مالاتطيقه ففي الحديث الشريف "خيركم خير لأهله؟ وياعزتي للمرأه اذا تزوجت واحد(ن) رخمة عند الناس( تسلب)مستسعر في بيته بخيل خلاص معد عقب البخل شيء 
 |
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ياحظ منهو لابغى يبكي على خله بكىّ | محمد | الأزياء و الأناقه | 12 | 11-02-2010 05:01 PM |
| امن يجيب المضطر اذا دعاه | متعب3 | روحانيات | 10 | 07-02-2010 11:38 AM |
| من يجيب المضطر اذا دعاه | عصوومه | روحانيات | 8 | 22-11-2009 04:35 PM |
| ياحظ عينك تنام الليل مرتاحه.. | محمد | الاثاث والديكورات | 9 | 20-11-2009 05:50 PM |
| جيب كلمة واللي بعدك يجمعها..... | محمد | مساحة للضحك والفرفشة | 420 | 24-06-2009 01:19 PM |
 |  |
العرض الشجري
