| |
03-05-2009, 09:29 AM
| |||||||||
| |||||||||
رحله الى مزرعتنا الحبيبه.. بسم الله الرحمن الرحيم.. مديرتي الفاضله معلماتي العزيزات اخواتي الطالبات ..<<مضيعه احسب اني في الطابور الصباحي..هع..هع .. المهم .. جايه هنا وناويه ابطح ملخص روحتنا للمزرعه التي لا تخلو من الضحك والتسليه وكل شي المهم..>>مافيه اسلوب هع..هع.. قبل الرحله بيوم..كنا قد اتينا من الشرقيه انااوخالديه كووول وخالديه حدي والبنات الباقين..على طول لبيت بنت كول عشان نقهرها ونغيظها بالسفره واللي صار فيها ..المهم وفيما نحن نقص لها وش صار في المزرعه..دخل جدي علينا وقال: متى جيتو من السفر.. قلنا:قبل شوي..قال :وش الطاري جيتو هنا على طول..قلنا: عشانا مشتاقين لبنت كول.. بنت كول:لا تراهم جايين يقهروني<<تمزح كانت..جدي قال:ابدا والله ما يقهرونك تبين نروح المزرعه بكره..حنا طارت بوهتنا ..بنت كول :ايه وهي غير مصدقه البته..جدي:بكره الصبح نمشي كلنا هاه عساك فرحتي ..بنت كول خنقتها العبره..وقالت :آآآآآآآآآيه..ط بعا جدي راح يبلغ عماني بس بعد مطخات على راسه من قبلنا نحن الشله السعيده.. وبعدها على طول للسوبر ماركت... وتفرقنا بعد ما جهزنا اغراض الروحه من خرابيط القرض المسليه.. المهم جدا.. يوم الاربعاء السادسه والنصف صباحا تجمعنا عند جدي للانطلاق المزرعه..ووردنا الخبر الاتي ان خالديه حدي موب رايحه لاسباب غامضه جدا على طول عزيناها بسبب اللي بيفوتها من كل شي..وطبعا وكالعاده قرروا الاهل التحريك وزي كل مره في الرحلات اننا نمشي العصر عشان يروقون.. تحركنا نحن الشله الموقره واثقين لسيارة عمي الاعزب كالعاده وبعد ما وصلنا لها..تفاجاءنا؟؟ ؟؟؟...شلة ((البيبسي))فيها ..>>بيسبسي لانهم طايشين ... المهم..فتحت الباب وقلت بكل احترام انزلوا بسرعه بنركب.. اجاب الطايش(بيبسي دايت):لااااااا اليوم مو يومك ياشلة المغارير..بنت كول:انزلوا لاقول لعمي ينزلكم وتتفشلون.. رد الطايش(بيبسي عائله):اللي عندكم سووه.. انا هنا قلت :بنروح للعمي وبنشوف من اللي بيمشي معه ياشلة (الكاريه)>>نسبة لقصه شعورهم..ومشينا لعمي الا ونسمع ضحك المراهقين.. ركضنا فازعين لعمي وقلنا له..بس كان رد عمي:والله اعذروني هم قايلين لي من امس بيركبون معي حتى هم خلوا سيارتهم في البيت يعني ما اقدر اخليهم..جدي قاطعه:بنياتي امشوا اركبوا معي وخلو المراهقين مع عمكم.. انا:جدي بس سيارتك فيها المراهقات وشغالاتك وحنا ما نبي احد..جدي:ابد بفرق المراهقات والشغالات في سيارات عيالي..حنا وافقنا بسرعه لان سيارت جدي توسع الصدر مره وهو في الطريق فله.. اتجهنا لسيارة جدي بعد تفريغها من اللي فيها وما بقى الاجدتي ويوم شافتنا بنركب قالت:بتجون انتم هنا بدالهم قلنا: ايه..قالت :اسمحولي بلحقهم واعدتهم بعلوم وسواليف في الطريق.. اجل بركب عندهم..حنا قلنا:لا تكفين نبيك معنا..جت المراهقه اخت الهنوف وقالت جدتي وين الوعد لا تجحدين..هنا جدتي قالت:لاااا جيتكم..حنا ركبنا وحركنا ووقفنا عند محطه للتعبئه<<اوخص.. وحركوا كل عماني منها الا احنا وقال جدي :وش تبون من البقاله..احنا:م ا نبي شي جايبين خرابيط تكفينا سنه..قال: لازم اجيب ..قلنا :على كيفك..بعد ما جا جدي من البقاله جايب لنا اشياء من زمان عنها بسكوت مينو وابو ولد والعسل وحلاو بقر وعصير الربيع برتقال حار..>>هذي مقاضي جدي من يومنا اصغار ما غيرها..المهم ..الطريق مع جدي كان روعه مررره سوالف وضحك..وكان سايق جدي اسمه (اكبر) هو يشتغل عند جدي من 9 سنوات..وقعد يسولف علينا وعن بلده الهند وياما من الخرط والافلام الهنديه..يقول انه قد لحقه سمك القرش وانه اسرع واحد وان ولده دكتور ... قبل ما نوصل المزرعه جدي نزلنا شوي عند الطعوس وقال : شوي باتلين(يعني يلين عظامه) وانتم لا تبعدون..حنا تمشينا وتدربينا واستانسنا مرررره..وما ركبنا الا وكلنا مغبرين وشهب.. يوم وصلنا للمزرعه بعد صلاةالعشاء لقينا شلة البيبسي يسالون وش اللي اخركم ..احنا كانت اجاباتنا لا شيء خخخ عشان ينقهرون.. رحنا نتفرج عليها بحكم اننا من سنه تقريبا ما زرناها نحن الشله الموقره بسبب انشغالنا في وقت روحتهم للمزرعه كم مره..والله وتغيرت المزرعه وكبرت واحلوت وزانت <<لو انها بنت خطبتها لاخوي..خخخ وقعدنا في دكتنا وقررنا نسوي حفلة باربيكيو أي شواء وصينا شلة بنات ستي(يعني الخدامات) بتتبيل الدجاج والباقي من امور الشواء..وعلمنا الحريم اننا مناب متعشين معهم ..عشانا بيصير من صنع يدينا..هع هع>>نلعب على عمرنا اللي بنسويه بس اننا بنقلب الدجاج مره من فوق ومره من تحت ..والباقي على بنات ستي.. بعد ما زان الشوي اكلناه ولا عزمنا احد ..شوي وجانا بزر يقول :ترى بيبسي دايت يقول عطونا من الشوي..طبعا ما رجعنا البزر ويده فاضيه..وقلنا للبزر: قل لشلة البيبسي يشكرونا ..خخخخ ما عطينا هم الا المحترقات وعظمين ..هع هع..>>اذا كرهنا ما نرحم..خخخ.. ويوم جينا نطفي الجمر ..قلت لهم كبوه على التراب.. هم:؟؟؟؟ ليه وش بتسوين؟؟..انا:ا صبروا...>>كان عندي شروخ من بعد العيد كثيره ..جيت مسرعه عند الجمر وكبيت كيسة الشرووخ كلها فيه..وقلت لهم يالله ابعدوا خل نتفرج عليه.. كان اول شرخين فله..بس ما درينا الا ونفجرت الشروخ القويه اللي فيه وطاااااااع وبوووووم وانا تورطت اخر شي سمعته في اذني طووووووووووط..ت وقعت طبلتي انفجرت بس لو انها انفجرت احسن من الهواش اللي جانا من الرجال>>انا تورررطت مررره والبنات يضحكون..والله من الخرشه اللي فيني ناسيه ان نص شروخي قنابل وطعميه ومثلها كثير..اهم شي عدا الهواش على خير.. ذاك اليوم عدا بسرعه بس كان وناااااسه وافطرنا تحت العريش وكان الجو بارد وحلو وما نمنا الا بعد صلاة الظهر.. وبعدين جت صوله ولجه اللي تبي تنا واللمبه مولعه واللي تبي تنام وهي مطفيه واللي بردت من المكيف واللي احترت ومكانها ما جاه هوا ومن كثر الهواش فجاءه الكل انطم ونام.. نـــــمـــــنــ ـــاااااا..>>نا منين عادي وش فيكم ..هع هع.. وكنا نايمين في امان الله ما قومنا الا هواش وصراخ وصياح ..>>خفت مره وجتني الصيحه احسب ان جاينا غزوا والا القيامه قامت شي من ها الامور. . بس ولا وحده تشجعت من البنات تفتح الباب وتشوف وش صاير كلنا نتفرج على بعض..لين قمت انا طال عمري ونقزت مثل الغزاله ولا ازين>>ايه هين.. وفتحت الباب ..وقعدت اضحك على طول جبت الجوال وقعدت اصور الكارثه اللي شفتها والبنات زيي واردى بعد..كانوا الشغالات يتضاربون وحرب بينهم ولا (داحس والغبارء)<عساني جبتها صووح..تخيلوا تونا قايمين وكل وحده فينا قاعده تصور وفاطسين ضحك..هع. خلوني اعرفكم بالمصارعات اللي في وسط الحلبه .. 1-فاطمه:شغالة بيت جدي-وهي من عرفت عمري وهي تشتغل عند جدي يعني من تقريبا 20 سنه -كل ثلاث سنوات تطل على اهلها وعيالها في اندونيسيا شهرين وترجع..وهي حاطه عمرها الكل في الكل... 2-جوان:شغالة بيت جدي الثانيه-فلبينيه –لها 3سنوات- وهذي لها قصه تضحك..هي من كثر ما تروح مع جدتي لمواعيده في المستشفى اعجب فيها عامل النظافه في المستشفى ودايم ما يعطيها نظرات حب واتوقع هي كانت تبادله نفس النظرات..بس كل هذا على حساب امراض جدتي اللي تجمعهم.. المهم من كثر ما شافته طقتها صداقه معه من غير علمنا ..احنا وش درانا في السالفه ..يجيكم العلم الطريف..مره من المرات في يوم من الايام كنا عند جدي وجاه ضيف مفاجئ بعد المغرب.. وكان الرجال سعودي ومعه واحد اجنبي وشكله هندي او باكستاني..جدي ضيفهم ومشى الامر وعماني يحسبونه جار جديد.. تكلم الرجال وقال انا جاي اخطب شغالتكم جوان للمكفول هذا واسمه محيي الدين... وان السالفه ...كذا وكذا.. وقاله وشلون تعرف عليها وانه يبي يتزوجها بالحلال..واني ما جيت الا بعد ما اصر واقلقني وقلت اجي واشوف طبعا الباكستاني من يوم جى وهو يوزع ابتسامات.. هنا عماني واللي معهم بضحكون وما توقعوا رد جدي اللي كان:اصبر بنسالها عن الموضوع وبنسال عنه ونرد لكم عقب يومين..>>>اللي في المجلس كلهم يضحكون بس على السايلنت والمجلس ينتفض من الضحك..المهم ان جدي وبعد عناء نقل كفالة محيي له وزوجه جوان بس بشرط يسكن في المزرعه وكل اربعه ايام يشوف جوان هم وافقوا على طول.. احم وبس.. الشغالتين هذولا كانوا مع بعض يصطرون 3 وهم.. 1-مريم-سرلنكيه-شغالة عمي.. 2-سلمى –سرلنكيه-شغالة عمتي .. 3-امينه- اندونيسيه -شغالة عمي... وكانوا اللي يحاولون يفكون بينهم فليبينيتين واندونوسيه وسرلنكيه<<كل هذولا جداد مالهم الا كم شهر فقط.. اهم شي حنا قاعدين نصور ولا فكيناهم ونتفرج الحجابات وطارت وكله ترجيف وبقوس وجزم طايره وعجه قويه حولهم واللي تحاول تفك تتصطر وما قواهم الا الدبا يا انها فقعت المعصقله السرلنكيه..هع ..ومرت ربع ساعه والبزران راحوا يعلمون الرجال ودرا محيي من البزران ان زوجته تنطق ..وراح علم جدي..جدي جا في موقع الحدث وما قال الا كلمه وحده بس لهم :على المكتب..هنا هم اللي تصلح حجايها واللي تحك يدها واللي تمسح دميعتها..خافوا وراحو لجدتي يصيحون ويقولون بابا كبير يودي مكتب انا ما يبقا كلاس ما فيه يضروب كلاس ..جدتي ما تحملت الدميعات وراحت لجدي وقالت له وياله ياله وافق.. المهم رحنا وصلينا وجلسنا في الدكه والسعاده تغمرنا يعني اصبحنا على هوشه بس من برى المملكه وحصريه عندنا بس..المهم قعدنا نتفرج على التصوير وهات يا ضحك واللي فحمة واللي شرقت وكل وحده وتصويرها وكانت لمى بنت عمي من استهتارها وهي اتصور تقرب مررره على خشش الشغالات ومستهتره فيهم بس هفها كف وشيك بس تحمد ربها .. جلسنا وبعدين مرت علينا اختي قلت لها قولي لشغالات يجيبون الشاهي والفطاير للبنات في الدكه تراهم جايعين..جلسنا ننتظر ومادرينا الا بهجوم مباغت وغبار صراحه نحسبه البهايم اللي في المزرعه انطلقت نحونا بعدين اكتشفنا انهم الشغالات جاييين ومسوين يتنافسون علينا بس كل هذا في صالحنا اهم شي جتنا انواع الفطاير والمكسرات والشاهي والنعناع وكل شي.. اتصل اخوي البيبسي علي وقال:يقولون البزران انكم مصورين الهواش اللي صار عند الشغالات ..انا:ايه..قال: تكفين ارسليه لي بلوتوث تراني بجي ورى دكتكم .انا:لاااااا منيب مرسلته احلم..هو:قلت تكفين..انا:بااا ي..خخخخخ البنات شوي وجاهم اتصالات من اخوانهم البيباسي..بس طبعا رفض طلبهم لو كان بيشترونه بعد لاااااا..>>مافي ه حقدنا عليهم خلاص..هههههه.. بعدين خالديه كووول طلعت من شنطتها روجها الجديد اللي من ديور تورينا اياه وطبعا كل من مر عليها الروج دهنت بها فرتها ورجعته وعلى حظ الشغاله جوان العروسه جت في وسط العجه بالروج قعدت تناظرنا وتلمح تقول:هدا روج هيلوا ..وقعدت تناظر خالديه كووول وتقول: سوي انا ..حنا مافهمنا؟؟... اثر الاخت الشغاله تلمح تبيه ..حنا على طول قلنا لخالديه كووول عطيها اياه مناب فاضين تتقطع بريطماتنا بسبته ..خالديه كووول تناظرها بعدين تناظر الروج وتقول حرام توه جديد..استسلمت للامر وعطتها اياه.. وسرا ليلنا وحنا قرض وسوالف وضحك ..لين ما طلع الفجر ورحنا نتمشى ورى عند مسجد المزرعه وطلعوا عماني وجدي من الصلاه ومر علينا عمي الاعزب اللي قزنا من ورى الشجر..قال:وين مالكم حس..ولا ناديتوني.. لا تقولون زعلانين..بنت كول :لا شدعوه بس لهينا ..لانه من زمان عن المزرعه..قال :اهاااا طيب تبون شي...احنا :لا...هو مشى خطوتين بعدين رجع.. وقال فاضين..احنا: ايه.. هو:وش رايكم امشيكم هناك واشر عند مكان الاسطبل وهناك المراهقين الطايشين يقبعون دائما وما يتغير مكانهم..احنا:لا ما بعد صلينا..هو :عادي صلوا باستناكم..حنا شفناه ملزم وافقنا.. وبعدها رحنا معه ومرينا من عند المراهقين وكانوا لاهين موب يمنا كان كل واحد راكب له دباب..اشوا ..وجينا عند الخيول ..وععع ريحتها مخيسه شافت بنت كول واحد وقالت ابي اسوقه >>هع مضيعه.. حاولت فيها تهون ما عندها معزمه تركبه..نصحتها قلت ترى وجهه لا يبشر بخير شكله شايب وموب فاضي احد يمتطيه في ذا الصبحيه..بس بنت كول اصرت..وجا عمي وطلعه وركبت وما امداها تكمل ابتسامتها الا وتخبط على جنب خبطه توقعت على الاسعاف على طول ..بس الحمد لله قامت تدلك مكان الوجع وتقول ما يوجع عادي.. بعدي الهنوف والبنات اختارويركبون واحد لونه ابيض وصخ انا ما اعجبني..انا شفت واحد ينرحم وجهه كله ذباب كلت اكيد بينقهر منهم عشان كذا باختاره والصراحه توقعته بطيئ ورخمه..لكن صار العكس وهبل فيني ما امداني اجلس الا يحرك راسه يمين ويسار من زينه وععع نزلت بسرعه ..وكان عمي الاعزب معنا كنه الصعايده اللي على البحر يجرون حصان بعشره>>تشبيه بليغ ..بس يا اننا كرفناه.. وبعدها رحنا نتمشى في ربوع مزرعتنا الجميله والفسيحه ودخلنا بوابه عالم الحيوان هناك فيه الغنم والبط والدجاج والارانب..اول شي زرنا الدجاج بس كان فيه شي غريب كان فيه قطو بينهم ويتمشى بعد ولا يخافون منه..وكان فيه ديك جالس شكله اليوم دوره يرجن على البيض بدال الدجاجه ولا ان الدجاجه مدرسه وطالعه وهو عاطل وقاعد عن بيضه المهم الله يعلم..بعدين للغنم وكانوا يكحون ويعاطسون والله شي غريب .. والارانب متوزيه ندور ما يمدينا نقزها الا متوزيه..والبط صاير عصبي مررره مغير يبطبط .. وما طلعنا من عندهم الا متحمدين الله..كل المزرعه اعاقات.. ومشينا شوي وصالت بنت كول تقول ابي اركب دباب..قلت هذا وانتي مصابه فيك شر اقول اهجدي.. ورحنا للعريش واستنينا فطورنا اللي كان ولا اروع وكانوا الشغالات متحمسين مرررره يمكن كانت عندهم النهائيات وبيشوفون من يفوز..خخخخ.. وبعدها قررنا ما ننام الا في السياره عشان نقضي اكبر وقت في المزرعه..ورحنى عند الحريم وسوالف وسعة صدر وفلللللللله.. وبعدها رتبنا اغراضنا ورحنا ورى نتمشى وسوالفومعنا قرضتنا والخرابيط وقلنالهم اذا جتو تمشون علمونا نركب .. وكان فيه برج فيه خزان مويه انشال الخزان وبقى البرج ورقينا فيه نتفرج وكان الجو روعه..واحنا نتفرج من البرج كان يمدينا نشوف المعاريس جوان ومحيي ..وكانت جوان جايبه له الغدا وحاطه الغدا برى الغرفه هو قام راح يغسل وهي طلعت شي من جيبها وقامت تفرك به برطمها..بعدين اتضح لنا انه روج خالديه كووول المسكين..خخخخ.. وقالوا لنا بعد العصر يله بنحرك وكان عمي مسوي متصل يقول تعالوا معي لاني صرفت اللي كانوا معي... احنا على طول وافقنا لان ورانا شي هع هع..واول ما ركبنا مع عمي فـــخــينا ونـــمــنا خخخخخخخ... والحمد لله رجعنا سالمين غانمين معافيين.. وبس..+_^..
 |
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ماحكم قول الرجل للمراءة في المنتديات(اختي الغاليه,الحبيبه) او قول المراءة للرجل ذلك؟؟ | الواثقة بالله | روحانيات | 21 | 16-09-2008 04:55 AM |
| ( رحله بلا عوده ) | ( مشاعر بنوته ) | روحانيات | 14 | 09-04-2008 03:10 AM |
| هل انت خكري..او رخمه او عربجي؟ | عبدالرحمن سيف | مساحة للضحك والفرفشة | 10 | 27-01-2007 09:38 PM |
 |  |
العرض الشجري
