| |
  |
 |
| |||||||
| احتواء ما لا يحتوى للمواضيع التي لاتندرج تحت اي قسم |
 |
| | LinkBack | أدوات الموضوع | إبحث في الموضوع | تقييم الموضوع | انواع عرض الموضوع |
04-02-2009, 02:10 PM
| |||||||||
| |||||||||
يوميــــــــات مواطن غــــــــــزاوي في الحــــــــــرب
الحمد لله خلصت الحرب وانتصرت المقاومة متل ما الكل عارف ، واحتفالا بانصر وعارف انو الجماعة ما بيتابعو اخبار حبيت انقل الكم صورة عن الوضع اللي كان يعيشو المواطن الفلسطيني ( الغزاوي ) بهالاربعة وعشرين يوم من ايام الحرب ............... .... واجا اليوم التنين والعشرين.. وكل يوم بنقول هادة أقوى يوم.. وأعنف يوم .. لا بس بجد.. اليوم أعنف وأقوى يوم شفناه.. كنا نشوف أغلب القصف على التلفزيون .. هلقيت صار قدامنا مباشر.. طول الليل الدنيا تضوي وتطفي.. زي الألعاب النارية.. بس العالم الألعاب النارية عندها من الأرض للسما.. إلا في غزة.. من السما للأرض.. هيهم وصلوا تل الهوى.. يعني بشيكل بكونوا عنا.. مش بشيكل ونص حتى.. أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم .. تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار.. مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي.. ما علينا.. الحلو في الموضوع انه (شلومو ) بتبين حنيته في وقت الحرب .. بقولك حفاظاً على رفاهية الشعب.. اعطونا تلات ساعات تهدئة في اليوم.. الواحد يعمل فيهم اللي بده اياه.. وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة.. وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة.. والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا.. اليوم قعدت أفكر أفكر ايش أعمل.. لقيت احسن اشي أعمله اني أنام .. عشان الجو بكون هدوء وفش صوت قصف (نسبياً) .. لأنه طول الليل صوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح .. طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها.. مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد).. طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده .. شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني.. الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ .. بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة انو الغسيل اللي عالسطح بأثر عالزنانات (طائرة الاستطلاع وتستعمل للقصف ايضا ).. دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها".. بس هالمقولة بتنطبقش عالصواريخ.. ولا ايش رأيكم..؟ أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية .. كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي .. ويطلع الشب بحزرك انه يكون عندك سلاح.. أو تتعامل مع واحد من المقاومة.. بس اليوم حسيت انه فش إلا تلفونا بكل غزة.. مسكتش وهوة يرن.. - ألو السلام عليكم... - وعليكم السلام.. - معك فلانة من ليبيا.. الله معكم.. الله ينصركم.. الله يقويكم.. - تسلمي يا حجة.. إدعولنا.. - الله ينصركم ويحفظكم.. - يلا سلام عليكم.. - وعليكم السلام.. هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه.. ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم.. لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور.. بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار .. حيصير اللي يشوفك يقولك منور ياحج.. الله يلطف فينا.. طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة .. وهية رياضة براميل الميا.. أول ما أفتح عنيا على طول بمارس الرياضة اليومية.. بطلع على سطح الدار بتفقد براميل الميا.. وقديش ضايل ميا.. طبعاً عن طريق الدقدقة على البرميل.. الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه.. أنا لقيت حالي لهلقيت عايش قلت أكتبلكم أحكيلكم عن وضعنا .. بكرة يمكن أكون عايش بس مش قادر أكتب .. أو مش عايش من أصلو .. إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل.. ونشوفكم على خير..  |
|
04-02-2009, 02:40 PM
| |||||||||
| |||||||||
رد: يوميــــــــات مواطن غــــــــــزاوي في الحــــــــــرب بحر الاحزان : هل نقلت الموضوع ام انت من عايش الوضع ؟ دمت بخير
|
|
04-02-2009, 02:44 PM
| ||||||||||||
| ||||||||||||
|
رد: يوميــــــــات مواطن غــــــــــزاوي في الحــــــــــرب تسلم الايادي اخي الكريم بتعرف المثل اللي بيحكي هم يضحك وهم يبكي صدقني هيك صار فيا هاليوميات اللي عاشوها اهلنا بغزة حقيقة صحيح بس هما اقوى منا بكتيييير شافوا وصبروا وتحملوا ومن كتر ما تحملوا صارت عندهم الروح الرياضية والفكاهية غير التصور الحمد لله على كل حال ربنا بصبرهم باشياء ما بتخطر على بال اي شخص خارج القطاع او خارج مجال هالحرب ومرقت على خير وربنا نصرهم لكن بعد الدماااااار والموت يعني على قولة المثل كمان موت وخربان ديار بس اللي من الله على العين والراس ( قل لن يصيبنا الا ما كتب الله لنا ) تسلم اخي الكريم على اليوميات المفرحة المحزنة لا تحرمنامن جديدك المميز |
|
04-02-2009, 03:13 PM
| |||||||||||
| |||||||||||
|
رد: يوميــــــــات مواطن غــــــــــزاوي في الحــــــــــرب
شــــكرا اختي عطر على مشاركتك الطيبة
|
|
04-02-2009, 03:45 PM
| |||||||||||
| |||||||||||
|
رد: يوميــــــــات مواطن غــــــــــزاوي في الحــــــــــرب
مع انو انا مش فاهم شو الغرض من سؤالك اخوي محمد بس راح اجاوبك اه اخوي محمد انا عايشت الوضع بغزة ايام الحرب وايام الانتفاضة الثانية والانتفاضة الاولى يعني انا مقيم هناك يا اخوي وبعدين على اموضوع ازا كان منقول او لا فهادي مش نقطة خلاف والسبب متل ما قالت الاخت عطر انو احنا شعب عندو روح رياضية بشكل مش طبيعي والسبب بذالك انو احنا شعب بنحب الحياة وبعدين الاحداث اللي ذكرتها باليوميات هاي احداث حقيقة حدثت معي شخصيا مثلما حدثت مع غير من سكان القطاع سواء اسم المناطق او المكالمات الخارجية او حتى نكتة ( منور يا حج ) ارجو ان اكون اخي محمد قد جاوبت على استفسارك بارك الله فيك ويـــــــــــــ ـــــــــن باقي الردود يا جماعة |
|
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| منزل مواطن كهف | السفير | احتواء ما لا يحتوى | 8 | 19-08-2009 12:24 AM |
| معاناة مواطن منع الجمارك | محمد السهلي | احتواء ما لا يحتوى | 8 | 02-06-2009 11:54 PM |
| مواطن يبحث عن وطن | متواضع | احتواء ما لا يحتوى | 3 | 30-05-2008 06:45 PM |
| سيارة مواطن خسر في الأسهم | سلطان القباني | لُغَة الصور .. والكاريكاتير الساخِر | 14 | 12-03-2007 07:36 AM |
 |  |
العرض العادي
