قصة سبب تسجيلي عندكم..

#1 (**permalink**) 23-11-2008, 11:22 PM

السلام عليكم ورحمةالله وبركاته ...

وش أخباركم ؟ .. إن شاء الله كلكم بخير..

هـــذا أول مــــوضـــوع لي عنــــدكم.. وحبيــت إنه يكون غير عن باقي المواضيــــع.. وحبيت انه يكون بقالب كوميدي..

....الـــــمـــ ـهــــــــم ...

موضـــــــــوعـ ــي راح يكون قصه حقيقيــــــــــ ـه .. >> بالعربي .. صارت لي انا وبنات عمي السبعــه ..

وهذي القصه هي سبب دخولنا وتسجيلنا معاكم في هالمنتدى..

على فكــــــــــره: : بنت كول وخالديه ماتهاب من بنـــــــات عمي..

المــــــــــــ ـــهم...

في عطلة الصيف اللي فاتت..قرروا أهالينا انهم يروحون لمكه ويجلسون هناك شهر>> الله يهديهم

بيجلسوننا في مكه شهر لا وبعد في الصيف..أنوااااا ااااع الحر والزحمه عاد انتم عارفين مكه مايحتاج ..

عمي االأعـــــزب >> ترى هذا

صديقنا.. الله يخليه لنا ويخلينا له خخخخخخخخخخخخ.. >>> انا اتوقع انه لو يقرا الموضوع ماراح يقول

امين خخخخخخخخخخخخخ .. مسكين بهذلناه كرفنااااااااااه .. خخخخخخخ وخاصه في هالرحله..

المهــــــم نرجع لساس البلا اللي هم اطفال العائله اللي لقبناهم " أطفــــــــال افتح يا سمسم" خخخخخخخخخخخخخخخ >>> يستاهلون هالتسميه..

المهـــــــــــ ـــم >>> ياكثر المهم في موضوعي خخخخخخخخخخخخخ..

اول مادرينا بموضوع الرحله .. اول شي سويناه.. اشتغلت الاتصالات بيننا .. واتفقنا انه يكون من بكره

اول طلعة سوق استعدادا للرحله.. والضحيه في السالفه عمي.. لانه هو اللي راح ينكرف.. وراح يمر البنات..

سوينا قائمه للي نبي نشتريه من السوق..

والقائمه راح اقولها الحين.. ::

1- لكل وحده فينا مجموعة شرابات " عشان اللي بنوطاه في الحرم>> اكيد عرفتوا اللي بنوطاه خخخخخخخخخخخ" ..
عشان كلما وطينا شي نشيله و نلبس اللي بعده خخخخخخخخخخخخخ..

2-شباشب عشان اذا جينا للحرم نفصخها عند الباب بشرط" ان تكون غير مغريه للسرقه" <<< معانين من السرق هناك..

3- 4- 5- 6- ......... الخ ..

17- عاد هذي قائمة الطريق.. " يعني البلعه اللي راح نبلعها في الطريق" ..<<< احنا معانين

من اللي يشترونه لنا في الطريق .. ما ادري ليش اذا وقفوا عند المحطه مايشترون الا مويه.. و عصير

للبزران وسفن لنا وعصير منجا للشغالات وكيك وكروسان لوزين بالجبن..

لذلك قررنا نشتري بلعتنا بنفسنا خخخخخخخخخخ ...

ومن بكره رحنا للسوق وخلصنا كل اللي نبيه ..

ونرجع للبيت.. كل وحده مننا جلست تجهز شنطتها استعدادا لبكره..

وخلصنا من ترتيب الشنطه ..

على فكره .. فيه شي سويناه بس لين الحين ما ندري ليش ..

اللي هو.. اننا اخذنا جوازاتنا معنا .. لا تسالوني ليش.. لان انا نفسي ما ادري.. وحتى ما ادري من اللي بيدري .. خخخخخخخخخخخخخخ

المهم ..

صحينا على اساس بنمشي الساعه 8 الصباح.. وماتوجهنا لبيت عمي الا بعد صلاة العصر ..

طبعا كالعاده .. يقولون هاااااه قوموا بدري ترى مانبي نتاخر.. واحنا نقوم ونصدقهم .. وهم .. يسحبون علينا ..

وفي سيارة عمي " ابو بنت كول" .. جدتي وزوجة عمي وبنات عمي الصغار والشغاله..

والشباب والمراهقين مع ولد عمي الكبير ..

وباقي عماني .. كل واحد مع عائلته في سيارته..

اما عمي الصغير .. طبعا ماراح نتركه لحاله..و تنافسنا احنا والشباب على الركوب معاه لانه انسان فله..وفي الاخير ركبنا احنا البنات معاه..

وابتدت الرحله.. وودعنا الرياض حبيبتنا << يالبى قلبها .. على امل اننا نجي بعد شهر ..

ومن يوم مشينا وهم كل شوي داقين على الجوال .. وقفوا في المحطه الجايه..

ونوقف واحنا مالنا داعي في المحطه..

وجدتي ماتبي تجمع الصلاة.. اذا اذن قالت وقفوا بي بانزل اصلي..

ونوقف عشان تصلي جدتي .. والا حنا جامعينها..

وطبعا اشتغلت البلعه.. وطلعنا مافي جعبتنا .. وفليناها مع ان الطريق ملل.. بس هالمره غير..

كلما مرينا من جنب سيارة الشباب نقول لعمي يحدهم..خخخخخخخخ خ .. وهم مايقدرون يسوون شي.. لان عمي الكبير مهددهم قايل لهم ياويلكم لو تسوون شي على الطريق..

ومايمدينا نقول الحمد لله ان شاء الله خلاص راح نواصل المشي لين مكه.. الا وهم متصلين وقفوا

فيه محطه على جنب..

وسرى ليلنا على المحطات.. ولا وصلنا للسيل الا بعد الفجر .. عااااااااد هنا البزران هذي لعبتهم..

ضاعوا.. بس قهر.. لقيناهم..خخخخخخ خخخ<<< ترى امزح ياحبي لهم..

واحرمنا.. وصلينا.. وكملنا الرحله..

أبشركم .. الحين وصلنا مكه المكرمه..

وعلى طول توجهنا للسكن اللي كان محجوز لنا من قبل..

احنا ماصدقنا وصلنا.. على طوووووووول للدور الثالث.. اللي ربي كتب انه يكون سكنا فيه..

مسكين ذاك الدور.. راح في ام خرايطها.. ام الازعاج.. بس تصدقون.. لاحظنا ان جميع الشقق اللي في هالدور كانت لنا.. الا وحده..

رحنا واخترنا ابعد شقه عشان تصير مقر للشله الموقره.. وخلوا معانا الشغالات.. ورغم ذلك وناسه..

لابزران .. ولا عجايز.. ولا مراهقين..

اول مادخلنا الشقه .. على طوووووووول نمنا..

ولا صحينا الا المغرب..

طبعا تهزئنا.. من اهلي.. لانهم تكسرت اصابعهم من كثر مايتصلون علينا.. واحنا طبعا محولين الجوال .." سايلنت" ..خخخخخخخخخخخخ

وعلى طول قلنا نبي اكل..لان اخر عهدنا في الاكل كان في الطريق.. وجابولنا الاكل..

واكلنا..

وقالوا يللا .. روحوا اعتمروا..ورحنا كلنا نعتمر.. عاااااااااد مايمديكم على الاشكال.. مانشوف.. من ذا الطراح اللي لابسينها.. خخخخخخخخخخ

وصلنا للحرم ..واحنا ماندري وش السالفه.. صح اعتمرنا من قبل.. بس من متى؟؟ .. الله المستعان..

نكمل..

جلسنا نتناقش عن العمره.. يعني وش نقول واحنا نطوف.. وش نقول واحنا نسعى..

ومشينا مع بعض كننا شلة الشغالات اللي يجيبونهم عشان يعتمرون<<< علينا اشكال خخخخخخخخخ

وطبعاخلصت الشرابات اللي جايبينها احتياط ..

المهم.. اعتمرنا.. يالله انك تقبلها..

وقررنا نرجع للسكن.. ونبدل .. ونريح شوي.. ونرجع للتوسعه..

وفعلا .. رجعنا للتوسعه.. واحنا متبرين من اهلنا ..خخخخخخخخخخخخخ خ..

ومرينا قبلها الدانوب.. وشرينا لنا قرضه<<< هذي تعني حب وبيبسي وخفايف..

ورحنا للتوسعه..

انبسطنا هناك .. بس شي غريب.. ما كاننا في التوسعه..فيه ناس "تتزلج" .. وناس" تلعب كوره" .. وفيه

تكارنه نايمين " كنهم فقمات" الحمد لله بس..

وبحكم اننا اجتماعيات بزياده.. لقينا وحده جنبنا جالسه لحالها" يعني وحيده" ..

خفنا عليها من التوحد.. وقررنا نروح نتعرف عليها..خخخخخخخخ خخخخ

وفعلا .. رحنا .. وتعرفنا عليها..

هي في البدايه خافت.. ماتدري وش السالفه.. فجأه جاها 7 بنات..

المهم انها طلعت فلللللللله .. وراعية سوالف.. وعزمناها على القرضه اللي معانا.. وجت معانا..

ووصلنا للسكن..

ولقينا جدتي لنا بالمرصاد ..

واحنا كنا جايبين معانا عشاء وبيبسي.. وهذا اللي زاد من عصبيتها.. اللي هو " البيبسي" ..

لان جدتي من المدمنين عليه.. لدرجة انها تسميه (( القوطي الازرق)) او الاسود للدلاله عليه .. خخخخخخخ

واحنا عندنا سياسة " " نفسي نفسي " "..

يعني استحااااااااله وحده مننا تعطيها ..خخخخخخخخخ <<< أم الأخلاااااق ..

بس الحمد لله.. كان فيه بيبسي من الطريق .. بس مشكلته كان حااااااااار.. لكن جدتي عاااااااادي عندها..

اهم شي انه بيبسي..

وعطيناها.. ورضت علينا..

وجلسنا نتعشاء..

وسمعنا صوت يخوووووف .. وحسينا بهزه ارضيه ..

واحنا .. تعالوا شوفوا حالتنا.. اللي رفعت يدينها للقبله .. تدعي..

واللي لبسة الجلال بتصلي .. << بس ماندري وش صلاته..

واللي جلست تصيح..

واللي على طوووووول قلبت المحطه لقناة الجزيره <<<< من هول الموضوع..

واللي جاها تبلد وجلست تضحك..

واللي تتشهد..
اما انا.. على طووووووول مسكت الجوال .. كنت باتصل على الدفاع المدني..

وكل الانظار كانت تبحث عن جدتي.. << تخبرون هي امانه عندنا خخخخخخخخخخخخ..

المهم ..

لقينا جدتي .. وابشركم صارت بخير.. لكن الغريب في الموضوع..

انها كانت حاطه رجل على رجل .. وتشرب بيبسي..

ولا كأنها سمعت شي..

جيناها واحنا خايفييييييييييي يين .. وقلنا لها.. ::

تكفين يايمه.. ادعي لنا ان ربي يتوب علينا .. يوم القيامه قرب..

وقاطعتنا ضحكتها<<< على فكره كانت تضحك ضحكة استهتاااااار..

قالت لنا:: وش فيكم؟ ليش خايفين؟ ..

قلنا : ماسمعتي يمه؟

قالت: إلا .. طيب عادي.. لو إنكم معتمرين معنا كان عرفتوا هذا وش صوته..

قلنا لها: طيب .. علمينا وش ذا صوته؟ ..

قالت : هذا صوت إخوانكم البزارين اكيد انهم رجعوا من التوسعه..

قلنا كلنا بصوت واحد : لاااااااااااااا اااا ..

لاتقولين.. امانه.. البزارين ؟ .. هذا صوت بزارين ؟ ..

واحنا اللي صار فينا .. كله من البزارين ..

والله يايمه .. ليته هزه ارضيه .. ولا اكتشف انهم بزاريننا .. وشلون راح نتحملهم 29 يوم .. آآآآآآآآآه بس.. الله يعين..

وكملنا سهرتنا.. مع الهزات اللي كل شوي تصير منهم.. والله لوتجي هزه صدق ماراح نصدق .. كله منهم ..

نمـــــــــــــ ـنـــــــــــــ ا..

وصحينا الصبـــــــــــ ـح .. ام الروقاااااااااا اان ..

قمنا ولقينا الشغالات نايمين .. طبعا احنا ماعندنا تفاهم ..

قومناهم .. وقلنا صلحولنا فطور .. وقهوه ..

وماقصروا "بنات سيتي" <<< على فكره: هذا اللقب يطلق على الخدامات السنعات.. للي مايعرف..

لا وبعد صلحوا لنا حلـــــــى .. ومن الفرحه .. طقينا فيهم شوط .. <<< مايعووووووق الطق والرقص فينا فينا ..

ويووووم فتح السوق .. على طوووووول سيده للسوق..

وواعدنا البنوته اللي تعرفنا عليها امس..

والله وجت .. وجت معاها اختها .. وعزمناها على القهوه.."طبعا في ستار بوكس" << يالبى قلبه.. خخخخخخخ

واستانسنا معاها..

وقلنا خلاص.. نصلي الظهر في الحرم.. ونشوفك بعد صلاة العصر..

وكلنا توجهنا بعد الصلاة للشقه ..ورحنا عند اهالينا .. <<< طبعا مصلحه .. نبي غداء ..خخخخخخخخخ والا هم لاحقين على سوالفهم في الرياض..

تغدينا عندهم ..

وطلعنا متوجهين لشقتنا القابعه في الزاويه ..

وفي الطريق لها .. قلنا خلنا نمر على عماني.. من زمااااااان عنهم ..

ولكــــــن .. فيه مشكله.. احنا اصلا مانفرق .. وين شقة عماني.. ووين شقة الشباب.. ووين الشقه اللي مو لنا ..

مع العلم ان الحريم لهم شقتين.. الله لايهينهم ..<< وذلك لكثرة البزران ..

وقررنا ..نطق الباب اللي جنب باب شقة الحريم .. وكلنا واثقين انها لنا ..

طقينا الباب.. وعلقنا على الجرس..<<< كيفنا .. نمون على عماني..

وانفتح الباب.. ودخلنا .. لكن اللي استغربناه.. ان اللي فتح لنا .. بزر مؤدب .. يعني موب لنا ..

وزياده على ذلك .. ان لهجته سودانيه .. واحنا ما استغربنا .. قلنا اكيد البزارين متعرفين عليه.. ومن الميانه.. جايبينه ..

لا ومخلينه يفتح بعد.. يعني كارفينه.. <<< ياحليلهم والله هضمناهم ..

قلطنا في الصاله.. وقلنا : رح ناد عماني..

وفجأه .. إلتفتنا .. لقينا ماكنا لم نتوقعه..

الأسره السودانيه تطوقنا من جميع الجهات ..<< يمديكم على تطوقنا ؟ خخخخخخخخ..

احنا عاااااااد .. جتنا فهاااااااوه ..سكتنا ..

ووحده فينا تكلمت .. وقالت : آسفيييييييييييي ين .. شكلنا غلطانين بالشقه..

ولما جينا نطلع .. قالت الام : لاااااا والله ماتطلعوا .. الا لما نكرمكوا ..

قلنا لها: الله يسلمك .. تونا متغدين .. خليها مره ثانيه ..

قالت : لا والله .. لازم تذوقوا المعصوب.. انا سويتو..

قلنا لها: والله ذا شي مانعرفه.. مشكوره وماتقصرين ..

وحلفت الا ناخذ صحنها معانا..

وبالفعل .. اخذناه .. ورحنا لشقـــة عماني .. وقلنا لهم: تفضلوا .. جبنا لكم من غدانا اللي طبخناه.. <<< خخخخخخ فقاشااااااات ..

قال عمي: ماشاء الله .. من متى تدلون المطبخ؟ ..

قلنا : من يوم حطيتونا في شقه لحالنا .. افتكينا من صجة البزران.. ووجهنا كل طاقتنا للمطبخ ..

قال : لاااااااا.. زين اجل .. <<< يسلك لنا شكله .. خخخخخخخخ

قال ابوي : وش هالطبخه ؟

واحنا .. طلعت فوق روسنا علامات استفهام .. لاننا نسينا اسم الطبخه ..

وفي وحد الله يستر عليها نسميها " فـــــــــلــــ ــــــــه " << فله بضم الفاء..

هذي فله بغت تفضحنا .. قالت لي : وش رايك اروح اسأل ام كوثر؟ << هذي السودانيه..

بس احنا رقعنا السالفه ..

قلنا : مع السلامه .. بنروح ننام .. << تصريفه طبعا..

طلعنا من عندهم ..

سيـــــــــــــ ــــده على شقتنا ..

وريحنا .. وجلسنا نطالع التلفزيون.. وأذن وصلينا في الشقه << مالنا خلق زحمة الحرم والحر..

وواعدنا البنت .. وقلنا : بعد ساعه نشوفها ..

واحنا طالعين .. لقينا شباب عائلتنا بيطلعون.. وكانوا كاشخين .. كلهم لابسين مثل بعض ..أسود في أسود..

لابسين ثياب امراتيه سوداء وطواقي سوداء وزبيريات سوداء..

وجلسون يصورون بعض..

قالوا على وين ؟ ..

قلنا بنطلع .. مواعدين بنات .. قالوا : من بيروح معاكم ؟

قلنا: بنروح لحالنا ..

قالوا خلاص بنوصلكم ..

ووافقنا وطلعوا معنا عند التوسعه لكن الفاجعه ان الناس تجمعوا علينا.. ليش ؟ ماندري..
وهم شله لابسين عمايم .. ولابسين أسود .. وفيه واحد معهم .. لابس مشلح.. << هذا قائدهم..

وجالسين يصيحون.. ويتمسحون في شبابنا.. والشباب متورطين ويضحكون..

احنا استغلينا الفرصه .. وصورناهم .. ههههههههههههههه ههههههه..

وفي الاخير .. اكتشفنا انهم " شيعه" يسمون : الرجبيه ..

ويقدسون اللي يلبسون اسود وخاصه في شهر رجب ..

المهـــــــــــ م ..

رحنا للبنت ..

وتعرفنا على امها واهلها .. ناس طيبه وحبوووووووووبه ..

واحنا على هالحال ..

اكل ومرعى وقلة صنعه ..

ونسيت اقول لكم شغله .. عمي اكتشف ان احنا مو اللي سوينا المعصوب ..

والسبب .. ان الولد طق الباب على اهلي قال : ابي الصحن اللي جبنا لكم فيه معصوب .. خخخخخخخخخخخخخخخ ..

ومـــــــــــــ ــر الشهـــــــــــ ــــر بســــــــــــر عه ..

واحنا ماتوقعنا اننا راح ننبسط ..

والبنت اللي تعرفنا عليها .. جلست معانا اسبوعين بعدين سافروا للطايف ..

والله فقدناها ..

لكن معانا رقمها وايميلها ..

واليـــــــــــ ـوم ..يوم رجعتنا للرياض ..

رحنا الصبح للدانوب .. واخذنا لنا شيبسات وخرابيط للطريق.. ولاننسى البيبسي سيد القائمه ..

وطبعا اللي جابنا يرجعنا ..
ركبنا مع عمي ..

وبدت الرحله .. رحلة العـــــــــوده ..

والله العظيم ماقد اشتقنا للرياض كثر هالمره ..

وماتخلوا الرحله من المحطات << اقصد محطات البانزين ..

ووصلنا للريااااااااااا ض .. كلللللللللللللل وش << هذي زغروطه سويناها لما دخلنا الرياض ..

ومشت الايام ..

واحنا متواصلين مع هالبنت ..

((( على فكـــــــــره ::: هالبنت هي سبب دخولنا وتسجيلنا عندكم .. في هالمنتدى )) مع العلم انها اصلا ماشاركت فيه ..

بس هي قالت هالمنتدى منتدى ديرتي ..

وانا من هنا .. احب اقول لها : والله اشتقت لك يا " منــــــــووووو ووور" ..

وادري انها راح تقرا موضوعي ..

وياليتها تغير رايها .. وتسجل معانا هنا ..

تمـــــــــــــ ــت ..

*** هالقصه مو منقوله وماتخلوا من المبالغه **

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
من عندي ومن عندكم!!	رايقه بذوقي	مساحة للضحك والفرفشة	4	04-10-2009 11:13 AM
الجملاني عندكم ياهل الرويضة	الجملاني	مرفأ البداية وروح التواصل	20	07-02-2009 10:17 PM
تعطلت مركبتي عندكم فهل سأصلحها ام أتركهــــا	محمد	مرفأ البداية وروح التواصل	20	30-10-2007 05:39 AM
عندكم اعيال مزعجين شوفو الحل ؟؟؟	محمد	مساحة للضحك والفرفشة	6	05-10-2007 07:49 PM
ضيفة معزووومة عندكم ؟ هل اجد لديكم قبول .	محمد	مرفأ البداية وروح التواصل	20	17-06-2007 02:21 AM

قصة سبب تسجيلي عندكم..

مساحة للضحك والفرفشة