خلها تبرق ورا الصمان وتسيل المسيله

خلها تبرق ورا الصمـان وتسيـل المسيلـه=دام خيال المهور العوب فـي الشـدات منـا
الزمل في مهجتـي ممسـاه وهنيـا مقيلـه=والله انه من ظعنا راح يرعـى فـي ظعنـا
والله اني ما تنازل عنك يالصفـرا الاصيلـه=دام لي راس يـزوم ولـي طواريـق تغنـا
كلها لعيون تـرف سلـم كفـو فـي جديلـه=لين سلمتـه بهـا الـروح وعطيتـه ماتمنـا
يوم قالت ياحلالي قلت لبـى اغلـى حليلـه=قالت البارح جرى دمعي على الخديـن لنـا
قلت في ربك وريضان الزهر هذي وشي له=ما سقاهـا الا غـلاك اللـي ربينـاه وسكنـا
صاحبي وافري جيب اصويحبك عقبك اويله=لا خلت من ضحكتك ذيك الصروح اللي تبنا
لا رحل حلم نزخرف له بيوت وننتمـي لـه=وامحلت خضر الطواريق ودنا الليـل وتدنـا
قبضينـي يالهبايـب غـرة الغيـم وهميلـه=لين يرتع في خفايا الـروح رعبـوب زبنـا
وارعدي بي يالرعود وفضفضي بي يالمخيله=واشرقي بي لا اظلمن ذيك الوجيـه وكلحنـا
واعتزي بي مثل خيال على عـزوة خليلـه=ساعة يستنشـق البـارود كيـف ويستجنـا
المشاعر راهيه والدرب مخطور اويبـي لـه=مسرجـات لا ظمينـا للغـمـام يـوردنـا
والوعد لا رفرف البارق على راس الطويلـه=والهواجس تصطفق وغزيـل السابـق تحنـا
درهمي بي يا ذلول الشعر صوب المستحيلـه=ان كسبنا الصعب والا كسبنـا قولـة فعلنـا
شاعر شاف الجدي في رمسته راعي طويلـه=والهبايب تنفض غصون الشجر منـا ومنـا
والزمن جافيه عقب الطيب من قبل امس عيله=والوجيه اللي خذن منا الغـلا ويـش عطنـا
والوفا يلهـث ورا بيبـان نسـاي الجميلـه=سج ماكنه شرب من كفـي الطيـب وتهنـا
اي عنالـه ويعنالـي ويعنيـنـي ويعنيـلـه=عالـق علـق معاليـق العلايـق واعلقـنـا
عقب اللي يوم ضاع وضيـع الوالـي دليلـه=جا يحدنه عيون اللي علـى الضيـق يحدنـا
روح يدفدف مع الساريـن بضلـوع نحيلـه=عقبهـا عـود يلـوج لسينـه حنـا وحنـا
يتطاولنـا فقيـر الحـال مغـتـر بقليـلـه=مـا درى انـه لـو تعنـا للثريـا ماوصلنـا
علموه يرش مقياله ويشـرب مـن صميلـه=ما لـه عظـام يشيلنـه عشـان يصادمـنـا
انصحيـه وفهميـه وسولفيلـه واشرحيـلـه=انتي اخته علميـه ان الوطـن هـذا وطنـا
يا حبيبي للصمايـل قلـب وضلـوع جليلـه=استرح يالاجودي شـوري عليـك ولا تعنـا
ما نوردهـا علـى الجمهـاه بعـزوم هزيلـه=يوم جينا عزوة يصفق لهـا المـوت وتثنـا
ابشري يا عزوتي لا حـزم الصايـح شليلـه=والله ان اسوقها شلفا في تجغم مـن زعلنـا
وابشري باللي يشيل الحمل عنك ويرتكي لـه=شاعر باسمك تغطرس باسمه الحرف وتغنـا
والعذارى اللي يشبن لاسمنا الوضـاح ليلـه=جعلهن لا قصـرن بيـض الفعايـل يفقدنـا
لا وطينا القاع شوف القاع منهي تنحني لـه=ماهدر واطبق على روس الجمال الا جملنـا
والوعد لا رفرف البارق على راس الطويلـه=والمشاعر تشتعـل وغزيـل السابـق تحنـا