15-11-2012, 12:58 PM
|
| |
السد باح
السد بـاح وبيـح السـد غاليـن
ذكرتني يا زيـن وقـت مضالـي
أعجبتني يازيـن وانـت متعديـن
وأشغلت قلبي يا حسيـن الدلالـي
على النقا سيد المها لـو يحاكيـن
واللي على وظح النقا مـا يبالـي
قلوبنا من جملة الغـش صافيـن
أصفى من العتق القراح الزلالـي
ياغصـن ورد ناعـم بالبساتيـن
لا هب نسناس الهوى فيه مالـي
الخشم سيف وصافي السحر بالعين
يذبح وفي يمناه رمـح الهلالـي
والخد برق يجهـر المستخيليـن
أحمر عطر صنعة عزيز الجلالـي
والغره الحلوه تحـف لحجاجيـن
واللي ورى الغره شبيه الهلالـي
لا شفت ناس حول حلياه حلويـن
حير قدم رجلي وزولـه طرالـي
سيد المهاواسمه ابعض الدكاكيـن
اغلى قمـاش بالدكاكيـن غالـي
الحب عذبنـي وعـذب كثيريـن
مانيب انـا الأول ولانيـب تالـي
بعـدك يعذبنـي وقربـك يسليـن
ضيعت قلبي يـا حلـي الغزالـي
اشغلت قلبي وانت سالي وناسيـن
ياليتي ادري وش قلبـك نوالـي؟
حال النوى بيني وبيـن المحبيـن
والبعـد زود علتـي عزتـالـي
قلبي يحن وهل دمعي من البيـن
رغم البطا والبعد مانيـب سالـي
الحي لا بده يجي لو بعـد حيـن
وشعاد لا صارت سنيـن وليالـي
أصبر وانا قلبي يهـذى بسكيـن
مـاودي الحسـاد تفكـر بحالـي
أخشى وأداري من كلام الحسودين
يالله عسى ما للحسودين تالـي
أهل الهوى دايم تراهـم ذليليـن
وأنـا يخوفنـي جهـام الظلالـي
وأختم جوابي وأبقي القلب تأميـن
وانت الوكيل بسـر قلبـي بدالـي
|