شي واحد قبل ما أبـدأ .. مـا أبـي أي شـي ثانـي


يخطر فـ بالك .. وأنا أكشف لـك شعـور تجهلينـه !

إن أنا .. وبكـل مـا تحملـه " أحبـك " مـن معانـي


كنت ، وراح أبقى أحبك .. لين .. مدري وش هو لينه !!

بـس والله ماقـدرت أنسـى .. ولا همـي نسـانـي


لا ذكـرت إنسـان .. فيـه أسـرار مابينـك وبينـه











كـل مـا تطـري علـي فكـرة هــواك الأولانــي


أشعـر إنـي أنطعـن مليـون مـره مـن يديـنـه !











أشعـر إن عيونـك .. الله مـا خلقهـا إلا عشـانـي


كيف كانت تبتسـم لـه ؟!.. قولـي إنـك تخدعينـه !!











صورة إنـه كـان يمسـح دمعـك .تزلزل كياني!


وكيف كـان يلـم شعـرك .. ويتبعثـر فـي يمينـه











حتى اسمـك يـوم رحـت أدلله.. حظـي رمانـي..


بنفس الاسم اللي يقول .. بذمتـك ماهـي غبينـه !؟











وكنـي اللـي .. كـل مـا أناديـك بالاسـم الفلانـي


أطلـب النسيـان .. يتـرك منـه شـي تذكرينـه !!











لا تظنينـي أنانـي .. لا .. أنـا مانـيـب أنـانـي


لو سلمت من الغرق . بـ أمـوت فـي ظهـر السفينـه !











يا إني ما أكمـل وأعانـي .. أو أكمـل ثـم أعانـي..


كل ما اسمع طاري اسمه .. أو تجي عيني في عينـه !











أينا كـان الضحيـه ؟.. وأينـا اللـي كـان جانـي ؟


مـدري !.. ولكـن قـراري لازم إنــك تقبليـنـه :











مثـل مـا أكـره فكـرة إنـه واحـدٍ ياخـذ مكانـي


ما أقدر أجلس في مكـان إنسـان .. كنتـي تعشقينـه !