سئلتهاهوفيه غيرك مزايين
ردت بضحكه عاليه من يقوله
اصلاً حبيبي وين انا والبشر وين
يعني مفكرها تجي بالسهوله
ناظر حلاي وشوف كل الملايين
في ذمتي ماصفو الناس حوله
يعني قمر لاتسئل شلون هالحين
الله امر بالجاذبيه نزوله
اقلب على كل البنات الموازين
اذا حضرت اكسبهم بكل جوله
فكرت انا اعطي من حلاي المساكين
اللي تبي تبشر اذا حال حوله
من طيبتي ماكنهم لي بعيدين
يشهد على الله ويشهد رسوله
ودي معي بالزين لو كان ثنتين
ودي احس احساس ذيك الخجوله
دايم الاولى لين ماصار روتين
وانا بطبعي في حياتي ملوله
الله عطاني رمش ظله بكفين
اذا انثنى للضيف نوخ ذلوله
واذا لمست الارض تنبت بساتين
وغيري يعيش العام واربع فصوله
حتى كلامي صار شعر ودواوين
احيان يكتبني قبل مااقوله
ومواكبي تمشي من يسار ويمين
من شافني بينّ بعينه ذهوله
بنت الشيوخ اللي تهز الميادين
هذا انا من يوم سن الطفوله
وربعي هل الطولات سقم المعادين
العز لابسنا وسام البطوله
وغلاك عندي فوق كل المحبين
يصعب على غيرك يفكر يطوله
والا انت تدري ياحبيبي انا مين
وغيرك معذبه الشقا من فضوله
من هيبتي لاقلت بنت السلاطين
ترجف ملوك الجن في كل دوله