لايابعد من سأل عن آخر إنتاجي=الشعر يفداك والشاعر .. وجمهوره

لازلت عايش على طبعي ومنهاجي=اليا حضر هاجسي غنيّت لـ حضوره

ياتاج راسي لا والله راسي وتاجي=محبّـتك فـي ضلـــوع الصـدر محفوره

من غيرك اللي تعلاّ برجي العاجي=ووايق على رجم قلبي واسبل شعوره

برجـن تعليّت به .. من بدّ الإبراجي=واخـذت يــوم استـويت بقـمـّـته دوره

بنـات فكـري وراك افراد وازواجي=تــدور مسـروره .. وتطيـــح مقهوره

عرضتنـي لـ الهـوى ماعاد يحتاجي=وهزيّت غصـن الغــرام وطارت طيوره

ودخـّـلتني جوّك .. وضيّعت مخراجي=وجوارحــي معــك .. منهيّه وماموره

بابور بحـري عليـــك يسابق امواجي=وامواج بحري عليك تسوق بابوره

لا تنبـش الخافيــه .. منعاً لـ الإحراجي=خواطر اهل الهوى خجلا ومكسوره

متى تفــــك القيـــود وتعلـــن افراجي=الشيـب يزهــم عليّ ويرسل سبوره

وقــّـف على رمشي وسولف مع حجاجي=وانقل عليك الغلا .. بالصوت والصوره