مجالس الرويضة لكل العرب - عرض مشاركة واحدة - منتديات مجالس الرويضة تكرم فريق الرويضة الرياضي

#19 (**permalink**) 01-05-2007, 07:36 PM

حرام عليك ابو نوااااف يمدحون مكياج كريستيان ديور

ليتك قلت لي أحط مبيض وظل اقل شيء تروح تجاعيد العمر

اللي اكل عليها الدهر وشرب

والله كانت من أسعد اللحظات الوقت اللي قضيناه مع

ابنائنا جيل المستقبل رجعوني للوراء

وتذكرت ايام الشباب ويوم كنا مانلقا كوره ونضطر

نحط الشّرّاب (الجوارب ) ونحشاها قطن وخرق باليه

ونشوتها ونفرق فريقين ومبسوطين ونلعب بخلاقينا

واليوم صاروا الشباب يلعبون بكور اديداس وشورتات

وبوت اخر موديل وحنا نلعب حافين وعلى الشوك وهم على ملعب

مجهز وصاروا يشربون بين الشوطين عصائر وموية صحه

وحنا اذا ضمى الواحد منا راح لاقرب بيت وكرّع في حنفية

الخزان الحديدي (السموّر ) وشرب موية ملوثه وحاره

والعصائر مانعرفها الا في رمضان فقط الفيمتو (التوت)

وسن كويك (التنق ) نحلم برمضان طول السنه

واليوم التغذية جيده تورته وقاتوه وبيتزا وفطاير واول اعتمادنا

على التمر كل واحد في مخباته 10 تمرات واذا تطورنا اشترينا

عقب الفوز قوطي تونه صفراء وعلبة جبن كرافت وبريال

8 خبزات وعلبة مشكل خضار ونطخطخ كننا عيال نعمه

!!!!! وين الفرق بين امس واليوم حتى الاجسام تغيرت

وذيك الوجيه الشاحبه الشهباء من القوايل صارت اليوم

اجسام عيالنا تهبل وبيضان ومنورين كنهم طماط مشاء الله

تبارك الله وملابس نظيفه وشعور ياحسرة على وقتنا الفنيله

مانغسلها علشان ماتتقطع وشعورنا كنها شعور جني

وجميل ان تجد من يقف وراء هؤلاء الشباب رجال نذروا انفسهم

لخدمة ابنائهم منصور معلم وخطيب ومدرب قوى بشريه

وابونواااف مدرس وابووسن خالد حمر رجل امن وابو ندى

امام مسجد ورجل متفتح وابوفهد موظف طيران

وعبد الله بن بداح رجل امن بمعنى ان من يدعمون شبابنا

هم من الفئة المثقفة الواعية التي تحرس يأعين امينة

شبابنا وتوجههم الوجهة السليمه

وعلينا جميعا دعمهم والوقوف معهم وتقريب وجهات النظر

وجعلهم خلية واحدة تعمل من اجل شبابنا وفقهم الله

الى مايحبه ويرضاه ولازالت الدنيا بخير وبرغم مرض

والدة منصور الشنيفي المنومة بالمستشفى ومرض والد ابو

نوااف المنوم بالرياض الاّ انهم كانوا نعم الرجال

وضحوا بكل شيء من اجل الوقوف مع ابنائهم فهل

نقف معهم وندعمهم ام نتفرج عليهم ؟!!!!!!!!!!!!!

لهم منا الدعم ومقاسمة ابنائنا خبزة العيش

من اجل منع شبابنا من براثن المخدرات

وانحرافات المراهقة فكونوا معهم من اجل

ابنائكم -----وتحية من القلب للاعبين

والاداريين والمدربين ودعواتنا لهم

بالاستمرار ومانبي فوزززززز

نبي نحمي شبابنا ونبنيهم للمستقبل ودمتم بخير