ماني معك مرتاح من سبّتك انت=خليتني ما بين أكرهك و أغليك؟؟
أغليك! لنّك قلت ما أبيك بيّنت=و أكرهك! لنّه ضاع وقتي و أنا أبيك
ماهي غريبه إنك إنسان لي شنت=با العكس عاديّه مثل رغبتي فيك
من أبسط حقوقك تبيعن إذا خنت=أو شفتني ماني أعزك وأدانيك
ومن أبسط حقوقي إذا ما أنت لي صنت=حق الغلا (أرحل و أبيعك و أخليك)
ودي أكون أصدق معك زيّ ما كنت=و بقدر ما تعطي جنابي أنا أعطيك
والا أنت ما قصّرت فيني ولا هنت=الله يبّيض وجه جرحك و يبقيك
جرحك سكن حدب الضلوع و تمكنت=و قدرت توجعني على قدر ما أرضيك
وخليتك تمون و كثر ما أنت لي منت=أرخصت أطهر قلب صانك و شاريك
و خليتني أبلش معك كثر ما زنت=و أجهدت لك نفسي على راحة إيديك
مع كل هذا ما ذكرت و تفطّنت=إني أنا الحالي بقلبك و غاليك
ها الحين أنا بقولها مثل ما أعلنت=و خليتني ما بين كرهي و ماضيك
( أبتركك لله ) مثل ما أنت لي بنت=و إن طحت من عيني عسى الله يهنيك