يابنت ماتعرفين الحب واسلوبه = الحب نهر الحياة ونبعها الصافي
لا تحسبيني بدينك صرت لعبوبه = انا كحيلان وافي الجد وسنافي
من لابة(ن) تعطي اللي عال ماجوبه =سهول مافيهم اللي ناقص هافي
الكل منا ظهور الخيل مركوبه = وفينا الكرم والشجاعة واصلنا وافي
افعولنا في القبايل صارت اعجوبه = حقايق(ن) واضحه تسمع وتنشافي
القلب يافاتنه منتيب مطلوبه = شفه من البيض عذرا(ن) سترها ظافي
يابنت ماعطي خفوقي كل رعبوبه = ولانيب اطيع الخفوق بكل محرافي
ومن صد عني ولا جازت لي دروبه = اصد واقسى واقفي عنه واجافي
يابنت قلبي مع ناس قد اقفوا به = خذوه مني رضى وافين الاوصافي
فيهم غزال(ن) سواد الرمش عذروبه = يذبح بخد(ن) وقد وعنق ياكافي
اطيع شوره علي واطيع مندوبه = ويطيعني لو سقيته سم زعافي
راضي(ن) بحبي وهو زاده ومشروبه = وهو مناي ودواي وطبي الشافي