يامحمد اجلب لي مناظر سباحه
ولاهنت جب معها مسددة الآذان
انا انتظر في جال شاطي البراحه
قدام بيتي تعرفه .. ياكحيلان
وسط الرياض العاصمه ... والصراحه ؟
الله يبارك في ( الأمانه) والأخوان
بدال مانروح الخُبر في سياحه ؟
حطوا لنا احلى مواني وشطّان
اضحك ... وقلبي نازفاتٍ جراحه
اضحك .. ولا يعني سعاده وسلوان
ومدامني إبدار العدل والسماحه ؟
ما أخاف م الإنسان .. من رب الإنسان
ماهي بلحية آه قلبي وآحه
السالفه ماعاد تحتاج تبيان
موصوف يطعن في صفته برماحه
ومديون .. جابه ربنا عند ديّان
جانا المطر مع برده ورياحه
وكلن فرح .. وإتبدل الفرح بأحزان
كل شيّ بيد الله .. غدوّه مراحه
لكنّ وين اسبابكم .. يا هل الشان ؟
يا أهل الأمانه ؟؟؟؟؟؟؟ نقطتين .. ومساحه
راضي بعدكم ؟؟؟ غيّر إسمه لزعلان
لـ سعيد بن مآنع