اصعب سؤال اللي جوابه للأسف مثله سؤال
ماهو تفلسف إلا موقف صار وأسمع ثاني بيت

البارحه يومه سأل وش ذكرك بذيك الليال
كان الجواب بكل بساطه من متى اصلاً نسيت

أدري ان جمع الصعوبه والبساطه شي محال
لكنها صارت كذا واللي أهم اني دريت

ان الحياة في بعد أحبابك إذا جف الوصال
تعيشها لو تقتنع انك خلاص اصبحت ميت

يا صاحبي لو كل شي يمر بالخاطر يقال
ما كانت العبرة تولجني ليا منك طريت

شفني قدرت أحبس دموعي بس دمع القاف سال
ويا كبرها ساكت ولكن داخل أوراقي بكيت

عمر الحكي ماكان دافي لابتدى بقولة تعال
لأجل التجاهر رجحة حروفي ليا مني حكيت

الحال في بعدك قسم بالله ماأسميه حال
أنوي على الضحكة وأحس كلي خطا لأني نويت

تصور أنك من رحلت أشوفك لجسمي ظلال
لا شفته أمشي ببتعد وأثره معي مهما مشيت

لا دام يعني في بحرك لفرحتي مليون جال
وشفيه موجك ما ركد قربت أموت وما رسيت

يرضيك ما عادت معي تفرق إذا جالك مجال
لاني اقتنعت أنك نهاية واني ببطي ما بديت

صرت أعقد حجاجي لا جابوك بأطراف الجدال
وقبل لاقالوا أسمك كأني ميت ثم حييت

تعبت أعيش الدور وأفتح للمعاذير الخيال
واتخيل أني جيت في بالك وانك استحيت

تردني كلك وله وتقول كأن البعد طال
ومن الفرح ما أعاتبك وأقول ياأخي ما بغيت

حتى وأنا أتخيل حشمتك لأن قلبي لا يزال
يكرر أسمك داخل أعماقي بنبضه لا سهيت

قلي شسوي فيك وأنت بداخلي أصدق مثال
للحب واحساس القصيد إن عانق الليل وسريت

ربي يصبرني على الفراقا مادام الحظ مال
وأنت بيجي لك يوم بتعرف ليه في بعدك شكيت

إذا بلاك الله وعذبك إشتياقك بس تعال
واقرأ القصايد في غيابك كل أبوها بيت بيبت

بتدري إن اصعب سؤال اللي يجي رده سؤال
لا قلت لي وش ذكرك ثم قلت لك متى نسيت