مجالس الرويضة لكل العرب - عرض مشاركة واحدة

#**3099** (**permalink**) 26-03-2010, 02:41 AM

ـــــــــــــــ ـــــــــــ

عهدي بها قدام تلبس عبايه
..... وأنا بعد قبل ألبس شماغ وعقال

طفلين نتهجى حروف الكتابه
..... الله يامجمل ســواليف الاطفــال

كانت لنا في كل شارع حكايه
..... وكنا نقول علوم ماهيب تنقال

وكنت اتقاسم مامعاها معايه
..... من ايسكريم التوت لعلك ابو ريال

وكانت بعكسي شاطره بالقرايه
..... تقرا جزء عم وطه والانفال

وأنا لك الله مو مواري غيابه
..... مدري ابو نقطه هو الذال او الدال

وكانت لابويه تشتكي من شقايه
..... وتعلمه كيف اربط الباب بحبال

ياما على ظهري كسر من عصايه
..... يقول لي: خلك وانا ابوك رجال

وامي تقول ادع لولدك الهدايه
..... خوفي يصيبه كثرة الضرب بهبال

لاشفتها مع اول الدرب جايه
..... مدري انا اللي ملت والا الوطا مال

أحس قلبي يرتجف في حشايه
..... ماكنه الا الضيف لاهز فنجال

ياما عن الحصني تخبت ورايا
..... لاخوفوها فيه ثم شافت ظلال

تقول خلك يا ( العود الازرق

) معايه
..... واستانس ألعب عندها دور الابطال

وأغار حتى من عيون أصدقايه
.!!!.... لاطالعوها قلت: تكفون ياعيال