على امرك يابعد نبض الخفوق وهاجسي ومناي
مدامك ماتبي وصلي أنا وش عاد يبقينـي


أبحفظ مابقى لي من كرامه وأستحـث خطـاي
على درب الغياب ووين مـاوده يودينـي


واذا مـرني على صدري هواك وحدني لاقصاي
دعيت الله يطمن في بعادي قلبـي وعينـي


وطلبته مثل ما مكن غـلاك وركـزه بحشـاي
يشيله من معاليقي قبل لا الوجـد ينهينـي


ولعلمك لو عرفت إني أبثني عزمك برجـاوي
أموت ولا ترجيتك وقلبـك مـيت فينـي


لو انك قلتها تبـي تشـوف معزتـك بحشـاي
أو انك قلتها ساعه غضب والذنب كاسيني


لجيك بكل حيلاتي من ايام الصبـا لـتـلاي
واشتري رضاك لو كان المقابل باقي سنيني


ولكن مالمسته فيك قتل حتـى العتـب بشفـاي
غرام ٍ مات في عينك على فرقاك يغريني


حسافة كنت احسب انك تقدر طيبتـي ووفـاي
وعلى اقل احتمال تراعي اللي بينك وبيني


توقعت إنك أخلص من عرفت وشفت في دنياي
أشك بكل من حولي ووحـدك ماتخلينـي


طلبت البعد في وقتٍ أبيك تكـون بـه يمنـاي
بعد ماجارت ايامي علي وحـارت يدينـي


ولا يخفاك صكات الزمـان وماحصـل ويـاي
ولو مافي يدك حاجة وجودك كان يكفينـي


توفي لو بعض دينك إلين آقف علـى ماطـاي
لعل يكون لي صبر ٍ على الفرقـا يقدينـي

على كل حال ماينفع ملامي لك وكثـر حكـاي
عن اذنك برحل لدرب الغياب اللي يناديني