11-11-2009, 09:17 PM
|
| |
يــوم من حيــاة ذيـــبان
طاب يومك يازورو ..
فأما عن يومي فهو كالتالي
اتصل علي أمس اسطورة المستقبل و اصغر هداف في الدورة الرمضانية واصغر لاعب أيضاً ..عبودي
قال : يابوفلان أنا أبي فزعتك
قلت : عيوني لك ..آمرني بس
قال : أبي مدرس انا عندي إختبار إنجليزي في الجامعة ولا فهمت شي
قلت : أنا ما أكفي عن المدرس << الساعة بـ 150طبعاً
قال : لا لا أبي مدرس تكفى << تكفى سوت لي ضجيج في طبله الآذن
قلت : والله مافي راسي أحد بعينه ولكن أزهل الموضوع علي
قال : متى ترد لي
قلت : أنت بالأول متى تبي المدرس
قال : انا توني طالع من الجامعة وأبي انوم إلى الساعة 9:00م يعني ابي أقوم وأحصل المدرس موجود
قلت : الا ورى ما أمرك ونروح للمدرس << انا لي قصد ابيه يذاكر في بيتنا
قال : خلاص آجل الساعة 9 وانت عندي قلت أوكيه
<< طبعاً كلمت احد المدرسين اللي أعتبره اخ لي بصراحة وقال أبشر ولا يهمك كم فيه نايف بالدنيا
قلت : خلاص الساعة 9:30م وعــدنا
وبعدين أنا كان عندي زيارة طلعت على الساعة 6:45م وطلعت منهم في حدود الساعة 8:00م طبعاً طلعت دايركت للحبيب عبودي وصلته على الساعة 8:34م ولاعندي وقت سيده على بيتنا...
طبعاً هو تفاجئ
قال : مالك داعي مستحيل افهم في بيتكم << بدينا بالأعذار اللي مالها سنع " مستحي "
قلت : والله ياعبود أن مافي البيت إلا أنا وانت << من الرجال طبعاً
قال : طيب << أدري انه مستحي مني "يجامل الولد"
والله وآمر الأستاذ شريف حميدو وناخذه من المعهد << طبعاً هو يدرس بمعهد
ونروح للبيت وأكرمهم وبعد كذا حسيت أن مالي محل بينهم
قلت : أروح اصرف نفسي على مايخلصون
وينط عبود
قال : والله ماتروح أجلس عندنا
قلت : بروح وبجيكم اللحين
الحاصل جبت الكمبيوتر << ماي نيت بوك
وقعدت أطقطق على ما أنتهى الدرس << طبعاً بدأ الدرس على الساعة 9:45م وأنتهى على الساعة 11:11م أي ساعة ونصف تقريباً
بعد كذا نزلت الأستاذ شريف في بيته ورحت أنا وحبيبي عبودي للتخصصي
قلت : وش تحب ناكل عشاء
قال : والله شف ماكدونالدز ولا مشاوي
قلت : اللي تبي .. انت فصل وانا ألبس
قال : خيـّـره ...حيـّــره والله محتار شف أقرب مطعم بس << طبعاً هو توه باقي مايدل بالرياض زين
وحنا ماشين بالسيارة على شارع التخصصي
قال : صفط بالمواقف هذه
قلت : عادي والله اللي تبي << طبعاً هو وقفني عند مطعم اللولوة على شارع التخصصي
الحاصل نزلنا عنده وتعشينا << وتوسخ ثوبي
على طاري ثوبي انا ساكن بشرق الرياض وعبودي ساكن بشمال الرياض وفكرة بموضوع الدوام باكر اللي هو اليوم << لأنني من الناس اللي يناومون من الساعة 10:00م ويصحى على الفجر وعليها ولا يقيل بعد!!
قلت ورى ما أنوم عند عبودي لقربه من دوامي وأنا اللحين ذابحني النوم وكم يبي لي أوصل البيت بصراحة الموضوع تضخم براسي
قلت : عبود ضبط لي فراش عندك
قال : يامرحبا بك والله
والله انا من وصلت بيت عبودي وسيده على الفراش ونومه وأصحى على الساعة 4:00ص صليت الفجر وطار النوم
والله ما أرتحت في نومي متقطع داخل واحد طالع واحد <<يازين غرفتي وبس لايزعجك أحد ولاتزعج أحد "مسالم"
والله ويقوم العضو لدينا سابقاً :: العود الأزرق :: وسيده على النت << ماعنده وقت
واسولف عليه حتى الساعة 7:00ص وطلعت أفطر وبعدها رحت للدوام وانا والله باقي أبي أنوم
طبعاً دوامي من 7:30ص إلى 2:00م
ويجيني واحد من الزملاء
قال : انا ماشي بعد أذنك
قلت : ترى إن مشيت الدرب واحد
قال : والله انا بمر محل وبعدها بمسك الخط << من أهل الخرج
قلت : الله يستر عليك
انا ودي أطلع بس ما يآنبني ضميري << يحب الإنظباط كثير..يجامل على حساب غيره
والله وأضغط نفسي لما وصلت الساعة 1:08م والله عجزت أكمل ..دايخ ابي النوم << أدري والله لو ابي النوم ماجاني
وفعلاً طلعت الساعة 1:08م وينشب لي واحد من الزملاء وصلني على طريقك قلت يالله أركب والله ياجماعة ماوصلته مجامله بس.. تقديراً لضروفه الصحية << الرجال معاق .. ومحدثكم يشفق على ذوي التربية الخاصة والمعاقين
والله وأوصله لبيته وأروح للبيت وسيده على غرفتي ابي أنوم مرهق جداً
خاصةً عندنا كشته الليله ابي أخزن نوم وانا الحين عندي نقص نوم
والله نمت وصحيت على الساعة 4:30م واحصل جوالي في حول 10 مكالمات محلية ومكالمتين دولية
ومن قمت وانا في البيت ماطلعت لا منا ولا منا من المسجد إلى البيت
وسلامتكم
آخر تعديل ذيبان يوم
11-11-2009 في 09:26 PM. |