خاويت هجس القصيد وبعثر شبوحـي
و أوردني حياض عدٌ فاضـت ركونـه



ونجم الثريا سرى ما عاد له ضوحـي
و اعياني الإنتظـار لشوفـة ضعونـه



اساهر الليل واثـر الليـل مشفوحـي
يبغاه دوبه سهـر عينـه و مخزونـه



و أخذت لي مع طروق القافية شوحي
وسهل انقياد القوافـي فـدوة عيونـه



مالي هدف غير ضحكة سن ومزوحـي
والله عليم بصـدري ويـش مكنونـة



لو كان باب المزح ماهـوب مفتوحـي
لكن أجزتـه علـى فكـري و قانونـه



و إن كان ما اباحني ماهوب مبيوحـي
و احسب ديوني عليه ويحسب ديونـه



كم مرةٌ من غنـاه ينقـض جروحـي
والضغط منه ارتفع واجـاوب لحونـه



و يا ساجع الورق لو تستجوب الدوحي
قال انت هزيت كل الـدوح وغصونـه