ياوجودي كان يبـري مـن العلـه وجـود
وجد من شاف المذلـه لجـل لقمـة هلـه
ان رضى بالذل بيموت مـن سـم الكبـود
وان تعـزز حـده الوقـت ليـن يجندلـه
ياوجودي جعـل ليـل المفـارق مايعـود
كل مايطري علـي هـل دمعـي بعجلـه
كنت اقول الحلم له مسئلـة وقـت وحـدود
لين ضاع الوقت والحلـم عييـت اوصلـه
ويش اسوي يا هل العرف والايـام سـود
كـل ماودعـت حزنـي يجـي واستقبلـه
مايهدي ضيق صدري ليامن ضـاق كـود
لاقريت الحمـد مـن بعـد ذكـر البسملـه
جعلني ماشوف ماكره ولا اخاوي جحـود
وجعلنـي ماعالـج المشكلـه بالمشكـلـه
اتصبر يمكـن الصبـر فـي تاليـه فـود
والخطـاوي مجنبـه والمشاعـر مشملـه
اثـر راع الحـب مثـل المكبـل بالقيـود
بيـن خلـق الله وكـن اليـديـن مكبـلـه
بين رايـات الهزيمـه ورايـات الصمـود
وبين هقواتـه وعقلـه وطيشـه واجهلـه
يامعودنـي علـى البعـد مـا فالبعـد زود
جنـب الدكتـور رح للمجـرب واسئـلـه
يكفي اني كل ماطـروك فيضـت العـدود
وانت لا هاللحين ماتدري ان لـك منزلـه
لاتظاهـر بالبـراءه وطعناتـك شـهـود
كل طعنـه منـك تاخـذ مسـار الاولـه
كن عيونك ساحة اقتال ورموشـك جنـود
وكنـي اللـي جـا بكيفـه يـدور مقتلـه
من غلاك احتاج سعرات تحريـك الركـود
مثل تحريـك المشاعـر بعطـر المذهلـه
اجمع احساسك غلا وانثره مثـل الـورود
ولك علـي اشـرع القلـب حتـى تدخلـه
لاتخاف امن التلاقـي ولاتنسـى الوعـود
واي حاجز يمنـع الوصـل قدامـك شلـه
وكان قصدك جرحي اللي مضى فرقى سنود
اذكر اني حزت الجرح قلـت الـك ازهلـه
انت فيك اشيـاء واجـد تخليـك امحسـود
فوق زينـك فيـك شيمـه وقيمـه وقبلـه
جعلني ماذوق حزنـك وجعلـك فالوجـود
لاتعودنـي علـى البعـد ويمـوت الولـه
الوصـال الستـر والبعـد بيـاح السـدود
وكل يوم يمر مـن دون وصلـك مطولـه
كل شي يهون غيـر التجاهـل والصـدود
ماقبله مـن غيـرك اشلـون منـك اقبلـه
لاتجاهلنـي وانـا مـن عريبيـن الجـدود
كان عنـدك شـي لاتستحـي منـي قلـه
ماتنسينـا الخطايـا مواثـيـق العـهـود
الوفـا منـا وفينـا وحنـا مــن هـلـه
وسلامتكم
مما راق لي آمل أن ينال أعجابكم
الشاعر (سالم ابن جخير)