عامين مرت ياحمد والعلم في وسط الضميـر=مخفيه مع جملة طواري فالضميـر أخفيتهـا
واليوم كنه في حشايـه بـه رحـاة تستديـر=واقوم فازع من منامـي كـل مـا حسيتهـا
أشيل حمل ما يشيلـه ياحمـد متـن البعيـر=وليـا رثـع راع الحمـول الكايـده شليتهـا
وياشينها لا من رغا ياصاحبي عقب الهديـر=راع الحمول اللي متونـه للحمـول أركيتهـا
ماجيت شاكي يالخوي لـو الوقايـد تستعيـر=مـار الحبـال اللـي تـودي للوفـا مديتهـا
العلم شي باختصـار يخلـي العاقـل يحيـر.!1=الرفقه اللـي مـا تنومـس فالخـلا كبيتهـا
الرفقه اللي مايـذري صيتهـا يـوم الهجيـر=والله لن تبطي عظم وتمـوت مـا خاويتهـا
ماهو غرور ولا تغطرس وأنت بالحاله خبيـر=ياكود نفسي عن دروب أهل الـردى عليتهـا
الحر يكفخ بالجنـاح ولا كفـخ طبعـا يطيـر=ولا النعامـه لا اكفخـت ياليتهـا ياليتـهـا
أقول قولي واحشمه لا صاح صيـاح النذيـر=في يوم ولد اللاش يشرك خيتـه فـي زيتهـا
وانا أحمد الله مغتني ياصاحبـي مانـي فقيـر=كنز المراجل مكسبي والحـي يـارث ميتهـا
وأنا وريث الشايب اللي مـاورد هاك الغديـر=ولا ورد غير العـدود اللـي يـروي صيتهـا
لبست ثوب المرجله من عادني ورع صغيـر=والركعه اللي تعبت بعـض العـرب صليتهـا ..!1
ومن هو نشدني عن خوالي قلت له علم بصير=من روس قـوم ترتقـي بالمجـد لا عديتهـا
من آل مستور النشاما مروية حد الشطير=أهل البيـوت اللـي يـذري فالشدايـد بيتهـا
قوم ليا ثقلت على متن الضعيف والكسير=حدتك يا وقت العنا.. وتموت ما حديتها
ومدام هذا منزلي وأنقى مـن أنسـام العبيـر=وأحد من ضرب السيوف اللي معـي سليتهـا
بقولها واللي يصيـر فعقبهـا خلـه يصيـر=والله لن تبطي عظـم وتمـوت مـا خاويتهـا