مجالس الرويضة لكل العرب - عرض مشاركة واحدة

#1 (**permalink**) 16-10-2008, 01:47 PM

يقول من يهوى ركوب المسرجات
لاجيب طاري للسيوف وسلـّها

ياسامعي والاوله من الاولات
تنبيك عن باقي علومي كلها

ترى حلاة الشي لاجاله طرات
واللي تجي في حلها في حلها

شبـّه وبرّاد وثلاث مهيّلات
والارض يغني عشبها عن زلها

فلة حجاج وطيب راس وطيب ذات
ياقلها في وقتنا ياقلها

والله لعديها حدود النايفات
مادمت اميـّز دقها من جلها

والكلمه اللي جات مدري كيف جات
زلـّه وشرهتها على من زلّها

ياللي تقول النوم أخير من الصلاة
شوري عليك أد الفروض وصلها

يامل قلبٍ بين ود وبين هات
والعين من كثر السهر ياملــّها

لاجيت بانسى واعتبر مافات مات
استرجع افكار الحزن واحتلها

وابكي على الفرقا ولكن في سكات
ماهوب شرط ان الدموع أهلها

عليك يانبضي ويا سر الحياة
ياللي غلاها عَزها ما ذلها

شيخة بنات وعلّمي كل البنات
سبحة غلانا مانويت أفلها

مالك غنى عني وانا مالي غنات
والحاقده منهم تموت بغلها

انتي صفاتك غير عن كل الصفات
اضيع فيها لابغيت ادلها

ريقك عسل واساوره سكر نبات
وشفاك ماتبخل عليه بظلها

لبّى البراقع والغطاوي والعبات
يازين سكبتها ومصعب شلها

عندي ثلاث اشياء في قلبي ثبات
والله مااخليها لاقالو خلها

شوفك وشوف الماء وممشىً فالنبات
لاخيروني قلت أبيها كلها

للشاعر /سالم العرجاني