مجالس الرويضة لكل العرب - عرض مشاركة واحدة - قصة إماراتية .. ليت جنح الليل يحمل لك اساي ..

#2 (**permalink**) 25-05-2008, 09:36 PM

الجـــزء الثانــــــــــ ي

انته شوفي وانته عمري والهنــا.. ياجسد بي روح ولروحي جسد
وانته عيني وانت نوري والسها .. وانته اســــبابي اذا حبي خمد

في بيت بو عبدالله
الساعه 7 المغرب
يوم الثلاثاء ..

هالوقت كلهم كانوا قاعدين في الصاله .. عبدالله وحرمته العنود وام عبدالله واسماء ..
هادف : هوووود..
ام عبدالله : اهداااااا ..
هادف : السلام عليكم ..
الكل : وعليك السلام ..
اسماء : وينك انته من البارحه ماشفتك ؟؟
هادف : اونه عاده اللي ايقول الحينه ذابحنج الشوق ..
اسماء : ههههههه .. عليك انته .. امممممم .. ميبي ..
هادف : هاي بنتج يبالها عضضضضضه ..
عبدالله : دواها الدلووووعه ..
اسماء : اااااي جتفيييه .. اااااي .. هادف لا تعضني من اهنيه عضني اهنيه صوب العظم ..وتمت ادزه ..
العنود : انتي ابكبرج عظم .. هههههه.. هادف حرام عليك فجها ..
ام عبدالله : وايه يعلني افدا بنتيه اشياااااك اتوحشت عليها ..
اسماء : ووووع كله تفال .. ياخي عندك حرمتك لين الحينه ماعقلتك .. اففففففففف ..
هادف : اشعنه يالبقره اتشوفيييييني ياهل ..؟؟
اسماء وهي تربع : الا انته .. ههههههههه ..
مهره: السلام عليكم ..
الكل : وعليكم السلام ..
مهره : هادف
هادف : لبيه اعيونه (واشر ععيونه ).. قلبه (واشر عقلبه) .. لبيييييه ..
مهره وهي معقده حياتها وتضحك عليه : شياك ع اسامي فديتها ؟؟
هادف : دواها ..
ام عبدالله : هذيله هم هادف واسماء من هم واصغار جذيه عاده احيد اول كلنا كنا في غرفه وحده .. ويوم بيي ارقدهم كلهم ارقود الا هم الاثنينه يتفاررون بالمخاد وهاذا ياشر حق الثاني وهاذا يهدد الثاني .. وكبروا وهم خرشان والخريش عمره مايعقل .. وطالعي مع انه اكبر عنها بثمان اسنين ماتخاف مااتقول اكبر عنيه لا مالي خص فيه لا تخرشه ازياده ..
عبدالله : ههههههه .. صدقتي يامايه ماقلتي شي .. محد طلع عاقل الا انا وسلامه ..
ام عبدالله : فديييته وطحنون بعد ياره الله .. والله يانه الدار هب مرغوبه ابلياه ..
العنود : ياله ياعمتيه جانه الا عميه هو اللي مسافر ماتولهتي عليه جذيه ..
ام عبدالله : ههههههههه .. ومنوه طراله عمج .. خليه ويامزارعه وبعرانه ...
هادف : هيه عاده انتي اقعدي قولي جذي واخر شي خليه ياخذ الناقه على راسج . وتستوي حرمته الثانيه..
ام عبدالله : هدووف مسود الويهه .. اعنبوووووك ..
عبدالله :هههههههههههه .. واتخيل انته ياهدوف انك اتكون ولد الناقه هاي .. عادي ترا انا شاك في امرك ياخي المزاريع كلهم حنطاويين الا انته من وين ياييب البياض ماعرف ؟؟
هادف : قل اعوذ برب الفلق قل اعوذ برب الفلق ... اخر شي بحترق و بستوي صخامه انا ..
ام عبدالله : يابويه رد الشهاده ع ويهه اخوك .. حليله
مهره : لا ياخالتيه لاتزيدينه ثره هو ماينزاد خقه..
ام عبدالله : ثرها الخقه راكبتنه ..؟؟
مهره : عيل مزروعي عالفاضي ..
هادف : هااااا شو ابلاهم المزاريع جان ماخذتوا منهم عيل ..
مهره : عاده المشكله العوده انه خالتيه خذت منهم وانا نصيبي لحق نصيبها ..
العنود : هيييه ماشاء الله عيل ربي ايعينكم عليهم .. ويعينيه وياكم ...
ام عبدالله : عاده في اللوص والخريط محد شراتهم ياله ... يطفح يطفح من فوق روسهم ..
عبدالله : امايه عاده هب ثرج اتغلطين علينا من الصبح ... ونحن اسكوووووووت ..
ام عبدالله : مسود الويهه الا انتوا اعيالي والحرمه تلحق ريلها وخلاص ثرني غديت شراتكم ..
عبدالله : هيه اذا جذيه ماعليه ..
هادف يطالع مهره : تسمعييين يعني انتي الحينه لاحقتنيه ..
مهره : هههههههه .. ماعليه انزين
وهزت راسها وتمت تتطالعه وخلاف ظهرت عنه من باب الصاله وراحت قعدت ع الدجه وهو مات من نظراتها وظهر وراها..
هادف : انا كم مره اقولج لا اتسويلي هاي الحركه ..؟؟
مهره : امممممم .. اشعنه ..
هادف : اموووووت مكاني ..
مهره : ياله ياله .. انزين هدوووفي ..
هادف : ااااااه .. لبيه لبيه امري بلي تبينه ..
مهره : امممممم .. شو رايك انروح العدسه الذهبيه ونتصور صوره حلوه ؟.؟
هادف وهو معقد حياته : مافهمت كيف نتصور ؟؟
مهره : يعني نتصور انا وانته ....
هادف : هاتي الكيمره وصورييني لين مايحترق الفلاش ..
مهره : ههههههههه .. لا مابا اشعنه اتقاشر ع الكيمره وع الفلم خله يحترق فلمهم ..
هادف : ماعليه يامهروه انقلعي مابوديج .. وتوه بيروح عنها نشت تربع وراه ومسكته من ايديه ..
مهره : هدوفي غناتي .. اتمصخر .. الحينه بتودييني ولا لا ..
هادف : من اعيووووووني ..
مهره : ياويييلي انا .. تسلمليه اعيونك ..
هادف : انزين يله سيري البسي ..
مهره : لا تعال اباك تكشخ ويايه ..
هادف : اه منج انتي يالعاطفيه .. فديييت العاطفييييين انا ..
مهره وهي قافطه : يله عاااااااااد.. وروحت عنه ..
هادف : انزييييييين .. ياااااي يااااااي .. وراح وراها ..

في بيت بو محمد
الساعه 10 فليل
الثلاثاء

حصه كانت طايحه في الصاله قاعده تتطالع قناة نجوم ... وامها ولطيفه قاعدات على الكراسي اللي وراها ..
حصه : يزوووووي .. يزووووي ..
ام محمد : محد يزوي اهنيه لا تسندرين رورسنا
حصه : وين سارت هاي بنت البطه السوده ؟؟
ام محمد فاجه اعيونها تتطالع حصه : يالسباله ..
حصه : ههههههه اوووه اوووه نسيت نسيت قصديه بنت القمر الحلو ..
ام محمد : يااام لسانين انتي شو تبينها البنيه ربها سارت ترقد ..
حصه : مايحتاي عاده بنتج وايد بترقد .. امايه يوم بييون هيلاك المزايين ازقرينيه بروح ازقرها هاي ..
ام محمد : اي مزايين اللي بييون بعد ؟؟
حصه : امايه هيله اللي في نجوم اللي في اغنية هب النسيم ..
ام محمد : هبي هبي يالسباله مسودة الويهه لا تستحين ولاتتخيلين ولا اتقولين انا بنيه مابقول جذييييه عيييييب .. وشلت ام محمد قوطي الكلينكس ومن شافتها حصه نشت ربعت وظهرت من الصاله وراحت صوب الدري وضرب القوطي في اليدار ..
حصه وهي اتوايج ع امها : هههههه .. هدي هدي ..
لطيفه : امايه امثتها ..
حصه : لا توته لا تمثتيني ولا شي .. ولا ثي ..
ام محمد : انقلعييييييي .. بنشوف منوه الي بيخليج اتشوفينها هالقناه مره ثانيه مسودة الويهه ..
حصه : اماااايه ..
ام محمد : وويييييييعه ..
حصه : يالااااااه انزين الحينه انا ماتفديتهم ؟؟ .....
ام محمد وهي اتزاعق : اقصوورج بعد ..
حصه : ههههههههه ... مايفر الراس الا اللي صوب القلب .. وتمت اتحرك حياتها حق امها . وروحت عنها تزقر اليازيه .. وتمت ام محمد تتحرطم على حصه .. راحت حصه وشافت اليازيه قاعده ع اللاب توب مالها
حصه : بوووووووه ..
اليازيه وهي متروعه : هاااااه ؟؟
حصه : هههههههههه .. اتروعتي ..
اليازيه : فقدتج يالدفشششششششششش ه .. متى بتعقلييييين .. لين متى بيتم عقلج في انعالج فكري مره وحطي عقلج في راسج ..
حصه وهي تتطالع اليازيه منصدمه : لا والله.. لا والله .. انا الحينه عقليه في انعالي ؟؟
اليازيه : اشعنننننننه ؟؟ حظرتج عندج شك في هالشي .. ؟؟
حصه مسكت اليازيه من رقبتها : اذا انا عقليه في انعالي فانتي عقلج اتعلق ع ظهر حمامه راح لندن انزييييييييين ..
اليازيه : اااااي يعلج العوووق بموت يالسباله خنقيتيينيه ..
حصه : هيه صح ... لا لا خلاص اسفه اسفه .. اممممممموااااح وباستها ع راسها ..
اليازيه : لا الحينه اتبوسيني هااااا؟؟ مسكتها اليازيه من ايديها و عقتها ع الشبريه وتمت تضربها بالمخده ..
حصه : ههههههههه .. ااااي ااااي والله خلاص خلاص سوري اخر مره ....
اليازيه : اخر مره ؟؟؟ قولي توووووووبه ؟؟
حصه : تووووبه توووبه والله تووووووبه . ااااي ااااااااي ..
اليازيه وهي ادزها : انقلعي .. ونشت حصه وتمت اتعدل شعرها ..
حصه : هههههههه .. مجررررمه .. هيه صح يزوي ..
اليازيه : هااااااااا.؟؟
حصه : اف صدي عليه ..
اليازيه : يعني مثلا بسمعج بعيوني تراني اسمعج ؟؟
حصه : هههههههه .. لا براسج .. ياهلويهه ..
اليازيه : حصيييص .. قولي اللي تبينه وانقلعي برع اخيرلج ..
حصه:اقولج يوم بتكون غرفتج انتي وريلج هييج الساعه طردييييني ..
اليازيه : هي حيرتيه انا وريلي انتي اشعليج ..
حصه : اممممم عليه جلابيه .. هههه حيره وندم .. شو ها حيرتيه بعد..
اليازيه: ماعرف فتحي القاموس ..
حصه : هقهقهاااااااااق .. سخيفه ماتضحكين تبين اتضحكين بس ماترومين ..
اليازيه : حصوووه بجتلج .. بس بس ..
حصه : انزين انزين بس خلاص سوري سوري ... والله انزين عاده خبريني شو اتسوين ..
اليازيه : ماشي قاعده اسوي ايميل حق محمد ..
حصه : اشعنه ؟؟
اليازيه : بعد اشعنه ايسوون الايميل انتي اشعنه عندج ايميل انا اشعنه عندي ايميل .؟؟. بعلقه في برواز شو رايج ؟؟
حصه : انزين بس هو المفروض انه ايكون عنده من زمان ايميل لانه يدرس .. واكيد يحتاي انه المدرسين ولا الطلاب يطرشولهم ..
اليازيه : اه منج يالذ كيه ايميل هذاك غير هب عالهوت على الايميل مال الجامعه .. فهمتي ياذكذك ..
حصه : ااهاااااا هييييييييييييه .. انزين سويله ..
اليازيه : بسويله انزين تراني اسويله ..
حصه : انزين يزوي تعالي ويايه بنسير انرمس امايه عسب اتودينا العين ..
اليازيه : اشعنه نحن مابنروح هالاسبوع ..
حصه : لا سمعت امايه اتقول مابنروح ...
اليازيه : لا ظبيه بتي ..
حصه :اعرررررف .. عسب جذيه اريد اروح .. واحنا من اسبوعين مارحنالهم الحينه ..
اليازيه : هيه والله ..
حصه :يله عيل ..
اليازيه : روحي انتي ابتدي فيها وانا بيي اكمل عليها ..
حصه : ههههههه ...لا توها مواقعتينيه ومعصبه عليه ..
اليازيه : اشعنه ؟؟
حصه : ماشي قتلها يوم بيحطون المزايين اللي في هب النسيم ازقرييني . وعصبت .. عاده انتي امج ماتبانا انقول عن حد انه حلو ..
اليازيه : ههههههههه .. انتي ماتستحين ؟؟..
حصه : لا اشعنه استحي انا ماقلت شي عييب ؟؟ ياله انتي الحينه يوم تتطرينه طحنون واتمدحينه واتمدحين جماله اه وطوله يالاااااه .. ماتستحييييييين ؟؟
اليازيه : جــــب .. ياله عليج امشي امشي يام العيب انتي يله جدامي .. ونزلن اليازيه وحصه وحدرن الصاله ..
ام محمد : ييييتي مسودة الويهه ؟؟
حصه وهي رايحه صوب امها : هههههههه .. حياتي قلبي وحبت امها ع راسها وتمت معلقه امممممممممممممم ممممممممممممموو واااااااااااااا ااااا ااااااااااااااا ااااااااااااااا ااااااح ..
ام محمد : بببببس بببببببس اف لزقتي اشعندج نشي ؟؟
حصه : هههههههه .. نشيت هاه خلاص .. زعلانه يالقمر ..
ام محمد : من يومج الا انتي خبله ومحد يزعل من الخبايل ..
حصه : انزين ماعليه .. المهم ريييييمي ..
ام محمد : لا والله .. لاعبه وياج انا في الشارع هاه ؟؟
حصه : لاااء لااااء .. انتي اشعنه ايروح فكرج ابعيد .. فديييت الريم شيخة الحريم انا ..
اليازيه : امايه اتولهت عليج ..
ام محمد : فديتج انتي يالعاقل محد مريحنيه في هالبيت الا انتي .. الا تعالن شو سالفتكن تتفدن شو عندكن هاتن من الاخر ..
حصه : طلبتج قولي تم ..؟؟
ام محمد : رديييتج ..
اليازيه : افاااااا افاااااا .. اتردينا .
ام محمد : اقولكن بتذلفن عنيه وبتخلوني اسير ارقدن اختكن ولا لا ؟؟
اليازيه : امايه كلمه كلمه ..
ام محمد :شوو تبن ؟؟
اليازيه : امايه حرام انريد انروح العين عن قوم يدتيه دخيلج امايه حرام .
ام محمد : لا لالا .. اعنبوه شو كل اسبوع ؟ الاسبوع الياي ..
اليازيه : لاء امايه حرام عليج ..
حصه : هااااااااه .. اخ ياعيييني وين من كل اسبوع نحن من اسبوعين مارحنا ..
ام محمد :عادي هب لازم انروح كل اسبوع وانخلي ابوج اروحه اهنيه ..
حصه : امايه ابويه مايتم روحه اهنيه وابويه متعود ايسير البحر والخميس المزرعه ونحن بس نيلس اهنيه شو انسوي .. امايه فديتج فديتج ..
اليازيه : هيه امايه الله يخليج .. وتمن ايبوسن امهن ..
ام محمد : بس بس خلاص يله يله فجني بوديكن خلاص ..
حصه : اتعيش امااااايه اتعيييش يس يس .. ونشن ينااقزن ..

في السياره
يوم الاربعاء
الساعه 5 العصر

انته ميعادي وسهدي والعـــنا .. وانته تعذيبي وصبري والجلد
وانته راحاتي وروحي والظنا .. وانته الاول مابها قــــبل وبعد

حصه : امايه ..
ام محمد : خير لا تلوعن جبديه في الطريج ..
حصه : انزين امايه شو رايج في اجازة الربيع انسير لندن حق حمود..
ام محمد : واشعنه ان شاء الله ..
حصه وهي تتطالع اليازيه: امايه لانه اتولهنا عليه .. فديته ماشفته من الصيف اللي طاف يوم يانا كم يوم وراح ..
اليازيه باست ايديها ونفخت فيها وطرشت البوسه حق حصه . تمت ام محمد تتطالع اليازيه مستغربه منها ..
حصه : اطالعي ايديج ..
اليازيه وهي تتطالع ايديها : هاه اطالعت ..
حصه : ووووع طالعي كيف كلها طحالب ..
ام محمد : ههههههههههههههه الله يقطع ابليسج .. وتموا كلهم يضحكون حتى الخدامه واليازيه تتطالعها معصبببه ..
اليازيه : تتدرين انج سباله .. وكفختها ع راسها ..
حصه : اااااااخ ...
ام محمد : هو خمس شهور ان شاء الله وبيرد وانا ماروم ع السفر كل سنه ..
اليازيه : امايه حرام ...
ام محمد : لا حلال ولا حرام بسكن عاده صخن شويه .. ياينكم رمضان صكن احلوجكن ..
حصه : هاااااااااااااه .. امايه لحقي لحقي .. الرماح الرماح .. امايه دخيلج خلينا انمر انسلم ع خالتيه موزه امايه عشان خاطريه ..
ام محمد : حصيص بخش انعالي في حلجج.. صخيييي ..
حصه : امايه حرام بيطوف اللفه خلي يلف خليه امايه .. افضل لف لف ..
افضل : ماما لفي ؟؟
ام محمد : لا بابا روح روح كمل دربك دربنا طويل . .. وصدت على حصه .. انطبي انطبي انتي..
اليازيه : ههههههههه ..
حصه وهي معصبه : ضحكتي من سرج بلا ان شاء الله ااافففف .. ولفت ويهها صوب الدريشه .. تتطالع وكل شويه اتقول ااه ااه ..
ام محمد : بسج عاده ... شميتي الريحه ؟؟
حصه : ياليتني اوصلللهم عاده ..
منصور : منوه تبين ؟؟
حصه : ابا يزوي ..
منصور : هاذيه عدالج ..
حصه : ممكن يااخ منصور اتلف ويهك واتم في حالك لاايك كف ع ويهههههك..
منصور : امايه انا عليه امتحان يوم السبت ..
ام محمد : ماعليه يوم بترد بندرسك اياه ..
اليازيه: ااف صدعتوا روسنا بسكم عاده ..
ام محمد : يله اجوف حد منكم الحينه يرمس لا اردكم بوظبي واخليكم تتصايحون ..
لطيفه : لا ماما انا اليد الوح عند يدووه ..
منصور : توته تعالي بنلعب ..
لطيفه : مابا بلدد انا ..
منصور : انا ليش ماعندي ولد يلعب معايه كل الاولاد عندهم اخوان يلعبون معاهم الا انا .
ام محمد : تراك الحينه ساير عند اعيال خالك وبتلعب وياهم بس صكها الدعنه ..
ووصلوا هل بوظبي العين ..

بيت بو علي
الساعه 7 المغرب
الاربعاء

حصه لاويه ع يدها : شحالك فديييتك والله انيه متولهه عليك يالاااه يايدي كيف وتمت اتبوس يدها ..
بو علي : خلج انتي عاده يالعيوز .. ممره ..
حصه : الا يدي بسالك انته بتم طول عمرك جذيه غااوي ..
بوعلي : ماخرب يعلني افداج ..
حصه : ياله يايدي عاده الا الجمال من عقبكم ياهل بو الخييييييل ..
بوعلي : من زمان مقيوله فينا .. يابنتي ..
حصه اتلف ع يدتها : ريلج خقاااق ..
ام علي : هي يامايه وانتي بزيه علينا ازياده .
حصه : ههههههههه ..
بوعلي ايحرك عصاته : هب هههب .. منوه اللي رمس ..
اليازيه : يدتيه بتضربها .؟؟ هههههه .
بوعلي : هيهااااء .. لا لا كله ولاام علي يعلني افداها انا .. يعل يديه القص قبل لا امدها عليها ..
حصه : ياعييني ياعييييييييني ع الحب .. عاش الجوو رووح مافيه منها الرومانسيه ...
مريم : نحن الا نتعلم منهم ومتعودين ع هالاجواء ..
ام علي : انتن ثركن موووول ماتخيلن وانتي حصيص مسودة الويهه عدج ماعرستي شو هالسوالف ؟؟..
حصه : ياله ياييدتيه تعالي تبيني اعلمج ..
رفع بو علي عصاته : مسودة الويهه شو بتعلمينها احبك واموت فيك وافديك ابروحيه واعطيك ورده .واعطيك كبله
اليازيه : يدي شو الكبله
بو علي : البوسه
وتموت كلهم يضحكووون عليه .. ..
حصه : وابووووكم .. لا لا العصا شررده ..
اليازيه : دواج العصا لمن عصا ..
احمد : السلام عليكم ..
الكل : وعليكم السلام ..
وراح احمد ووايهه حصه واليازيه ..
احمد : جني الا اسمع كلام حب ..
ام علي : لا لا محد قاله الله يبحص ابليسج ياحصيص .. بتخربين الولد ..
حصه فاجه اعيونها والكل يضحك ..
احمد : امايه في شوه عاده حصووه بتخربنيه ...؟؟
ام علي : لا يابويه ابدا سلامتك ..
حصه : هااااااه جاني انا الحينه بخربه .. االله واكبر الله واكبر وتمت حاطه ايدينها ع راسها ..
ظبيه : شو بلاج هههههههه تولوليييين ؟؟
حصه : تعالي ياظباايه وسمعي اوني انا بخرب احمد اذا سمع فديتج وحبيبتي ..
ظبيه : هههههههههه .. ومنوه اللي قال ..
حصه : يدتيه ..
ظبيه : هاذا ولدج بيعلم ابلاد ..
احمد : انا افا والله افا ياامايه اتشوفين شو ايقولون عنيه ..
ام علي : ههههههههه يابويه هيله مايخيلون .. عاده الحينه من اجتمعن خراب الدار ظبيوه وحصوه .. بتخرب اليلسه ..
حصه : افا افاااا .. امووووووت فيج انا وراحت لوت ع يدتها وتمت طايحه على ريلها ..
ام محمد : يله يامايه خلصت انا ..
ام علي : اليازيه امايه الله لا هانج هاتي عباتيه وياج ..
اليازيه : ان شاء الله ...
حصه : ماشاء الله الريم كاشخه ع وين ان شاء الله ..
ام محمد : مايخصج انتي قري مكانج يله امايه
حصه : يدتيه وين بتسيروووون اشم انا ريحة خيانه ؟؟
ام علي : بنمر صوب ختيه موزه الرماح .. ايقولون ميهوده حليلها ..
حصه : وانا ؟؟
ام محمد : انتي قري مكانج اخيرلج ..
احمد : ويين وين اتسيرين انتي عاده بيتهم كله شباب رازه بويهج ع ويين ؟؟
حصه : ااه ..
مريم : ظبيه مابتسيرين ..
ظبيه : لا يختيه راسي يعورني اليوم يايه من سويحان واصك درب الرماح لا لا بمر عليها اخلاف .. امايه قولي حق خالتيه اني تعبانه ..
ام علي : ماعليه يله مع السلامه ...
وظهرن ام محمد وام علي ووياهم لطيفه وركبن السياره وراحن صوب الرماح ..

بيت بو سيف
الساعه 8 فليل
الاربعاء

سيف وخالد وناصر وام سيف كانوا كلهم في الحوي .. ام سيف وخالد قاعدين ع الدري اللي يدشون منه البيت .. وسيف وناصر واقفين صوب القفص مال الحمام ع الرمله ..
ناصر : سيفوووه يلعن خييييره الطير شو سوابها الحمامه ..
سيف : ههههههه شو تتحراه انته حر هاذا حرررر .. والحر من طبع الاشراف ..
ناصر : بس ياخي والله انهن حماميه خلصن كل يوم نعطي طيرك وحده مره ثانيه تباله حمامه السوق فاج حلجه ..
سيف : الا هن حمام ..
ناصر : فقرتني ..
سيف : ياله عاده ..
ام سيف : انته الحين بخبرك مجابل هالطير مجابل بدال ماجابله.. هب اخيرلك اخطب لك واتجابلها اخير عن الطير ع الاقل الحرمه بتييب لك اعيال هاذا شو بيبلك ان شاء الله ..
سيف :امك موووول عاده عالدقه .. يامايه استهدي بالله انا توني صغير ..
ناصر : مايحتتاااي عاده .
ام سيف : وين صغير ياولديه وانته اللي كب ك معرسين وعندهم اعيال تتدري انته كم عمرك الحينه ؟؟
خالد : هههههه 27 سنه و3 شهور وساعتين وثلاث ثواني ..
ام سيف تضرب خالد ع جتفه : ههههههه .. اشعنه انته اللي يايبنه ؟؟ ..
خالد : افااااااااا افااااااااا .. شو اييبه بعد قولي بعد حملت به افااا ياام سواف ..
ام سيف : انتوا هب بسكم من هالحمام هب زين هاالحمام والطيور فليل ..
ناصر : امايه عاده كشافات ع الفاضي يعني ..
ام سيف : لا يابويه هب زين ..
وشويه الا بدشة الستيشن مالت بو محمد عليهم ..
خالد : حوووه حوووووه منوه ها .؟؟؟ اللي حادر علينا جذيه البيت ..
ناصر : هاي سياره غريبه ..
سيف : يمكن بطووي يايب سيارة حد من ربعه ولدج دومه يسويها ..
وشويه الا نزلت ام علي ووياها ام محمد ..
سيف : مرحبا مرحبا بالشيوووووخ .. وانا اقول شو السالفة الرماح منوره اليوم ..
ام علي : منوره بوجودك ياولديه .. وراحوا خالد وناصر وسيف وسلموا على خالتهم وعلى بنت خالتهم الريم وييت ام سيف وسلمت عليهم ..
ام سيف : توه مانور البيت .. من زمان ونحن نهذييبكم عسب اتونا ..
ام علي : ياله عاده خلي عنج انا هاك الاسبوع كنت عندج ..
ام سيف : انا قصديه عن الريم فديتها شحالج امايه وشحال محمد واخواته واخوانه .؟؟
ام محمد : بخير وسهاله كلهم ابخير الحمد لله ..
ام سيف : فديييت توته انا تعالي فديتج تعالي .. وراحت لطيفه وحبتها ام سيف ..
سيف : ياله منوه هالمزيونه ؟؟..
لطيفه : انا توته ..
خالد : هاي غرشوبه من غراشيب بوظبي ..
سيف : ياويييييلي انا عالتوووووت ..
لطيفه : لاااااا مث توت توته ..
سيف : ان شاء الله عمتيه توته ..
ناصر رايح صوبهم : مرحباااا مرحباااا ملاييين بغرشوبة العين..
ام علي : ههههههههههههه .. الحينه انا العيوز خليتني غرشوبه ؟؟؟
ناصر : افا افااااااا ..
خالد : ومنوه قال انج عيوز خليني اكسر راسه .. ليتج بنت ماتخطيتي العشرين حرام لااسوووم روحي وقلبي كله بس فدوى نظره من اعيونج ..
ام علي وهي مستانسه : ههههههههه .. الله يخس عدوكم ماتنغلبون في الرمسه ..
ام محمد : ههههه يامايه شو تبين بعد اكثر عن هالغزل ..
خالد : لا عاده ياخالتيه هالرمسه ماتنقال للكل ماتنقال الا للزين ..يالزين ..
ام علي : ماتنغلبون في الرمسه ياعيال ختيه ..
خالد : ههههههههه افداج ..

احبك كلمه ابقلبي تـــــــــحبك ***غرامن ماقوى صدري يشيله
وانا اللي لا سجتده سال ربك ***حبــــيبن صد عن قلبي يجيله

بيت بوعلي
الاربعاء
الساعه 10

كانت حصه واليازيه وظبيه قاعدات في الصاله ..
حصه : اف لين الحينه مايوا ليتني رحت وياهم والله ياظبايه اني متولهه اريد اشوفه فديته وماتخبلت عليه ازياده الا يوم شفته ايول في عرسج ويا قوم احمد سعيد ..
ظبيه : حصوه لا تتعلقين في امال احسلج ..
حصه منحبطه : اشعنه ؟؟..
اليازيه : انا دومي اقولها هالشي بس هيه الله يهداها ..
حصه : انزيبن خلوه يشوفني عسب ايحبني هو يعديبي يوم انا اني كنت ياهل في صف سادس .. الحينه من خمس اسنييييين .. والمشكله يوم ايي ايمر ع يدتيه اكون انا في بوظبي شو اسوي والله حرام والله انيه احبه من خمس اسنيين بس بس اف اتعذب انا وايد ...
ظبيه : حصيص لا تفكرين هالتفكير ترا هذيله عيال خالتيه هوايتهم تعذيبب البنات جوفي انا قبل كنت اموت في سيف اموت في التراب اللي يدوس عليه اتخيلي كنت اسيرلهم واتم عندهم لين فليل بس عسبه وانا صغيره اتخيلي كان عمري 10 سنين اربعه وعشرين ساعه في بيتهم ابا نظره ابا ايعبرني ابدا لا حس ولا خبر .. حتى علايه بنت خالتيه راحت وقالتله سيف ترا ظبيه اتحبك اتوقعي شو رد عليها ..
حصه باحباط : شوووو ؟؟
ظبيه : قالها روحي قوليلها عن هالخرابيط ... انا ماتعيبني هالسوالف وانتوا شرات خواتي اتخيلي وانا هالوقت كنت في بيتهم ..
اليازيه منصدمه : هاااااااااه .. سخييف كم كان عمره هو هالوقت ..؟؟
ظبيه : هو 15 وانا 10 ..
اليازيه : اوييييه ... حصوه شليه من بالج خلوود ترا هب داري عن هوى دراج انزين ..
تمت حصه ساكته وسرحانه ..
اليازيه : حصييييييييص ..
حصه : ............... ...
ظبيه : الحص يعلني افداج في هالزمن لازم هو اللي يحبج ويلحق وراج انتي لا تحبين الا اللي بيحبج نحن بنات مابيدنا شي مستحيل انسير بيتهم وانخطبهم اذا حبيناهم او اذا حدروا خاطرنا لا الريال هو اللي بيده هالسلطه انه يشوف البنت اللي تعيبه وايروح يخطبها .. فهمتي ..
حصه بيأس : حرام عليج لا ماتخيل والله انا احبه والكل ايعرف بهالشي ماقدر والله مااقدر ..
ظبيه : اوكييييه حبيه بس لا تعلقين عمرج امال عسب مايطيحن كلهن عراسج .. شرات مانا سويت اتخيلي كنت اشوفه كل شي في حياتي كبرت وانا احبه بس جوفي نصيبي وين فرني لاني انا هب من نصيبه وانا الحينه ويا مطر يعلني افداه عايشه فوق السحاب ... ماظن انه حد ايحبنيه فهالدنيا شرات ماهو ايحببني ..
اليازيه : اااااه ياويلي انا ع الحب ..
ظبيه : هاه وانتي بعد شو فيج ليكون ؟؟ امنوه بجتلج ليكون بطوي ولا رشود ولا ناصر ..
اليازيه :هههههههههههه لالا .. انا محد في خاطريه مابا اتعذب ..
حصه : اووووونه عاده ..
وشويه ودشن ام محمد وام علي ..
ام علي : السلام عليكم ..
حصه : مابغيتوا اتووون جان بتوا عندهم بعد ..
ام محمد : خلج انتي عاده .. سكتي اروحي قابضني صداع ..
ظبيه : ياله يالريم انتي دومج مصدعه ..
ام محمد : شواسوي كم طريق اليوم انا ضاربه لازم بتعب اعنبوه ..
ام علي : يعلني افداها الريم انا ..
ظبيه : هيه انتي كله الريم والريم ..
ام محمد : اشتغلت الغيررررره ..
ظبيه : ههههههههه .. لازم عيل شو .؟؟
ام علي : الا وين مريم ؟؟
ظبيه : وداها علي من عقب ماظهرتوا بيت هلها ..
ام علي : حليلها ..

الخميس
الساعه 2 الظهر ..
بيت بو علي ..

كللهم كانوا قاعدين في الصاله يتغدون ..
سعيد : السلام عليكم ..
ام محمد : حشا يابوك عاش من شافك انته وين ؟؟
سعيد : هلا هلا وغلا هلا بالزعييييييمه .. انتي اهنيه ماشاء الله اتصدقين انيه مادريتبج الا البارحه فليل ..
ام علي: ثرك انته اتقر في البيت عسب تتدري في حد ..
سعيد وهو يتلفت : ماشاء الله منوه هاي اللي صوتها غاوي اللي توها رمسة انتي ظبيوووه لا لا انتي صوتج هرن سياره اكيد اكيد قمر الرماح .. وراح صوب امه وحبها ع ر اسها ..
احمد : هييه عطيييه الدلع ..
ام علي : فديكم والله يعلني مخلا منكم ..
سعيد : ولا منج يالغاليه .
ظبيه : اقولكم انتوا اشعنه ماتودونا المطعم اتغدونا ولا اتعشونا عافان الله عندكم خوات ماتقولون بنوديهم مكان .
احمد : ههههقققققققهق اشعنه الغاليه ريلج وين ؟؟..
ظبيه : انا يوم عندي ريلي ملزومه به ويوم عندكم ملزومين ابيه ..
سعيد : اونه ..
احمد : لحظه سعود انزين وياويهج اتقولين يوم السبت وين تبين اتسيرين ان شاء الله ؟؟
ظبيه : مطعم نتعشا ولا نتغدا حللينا بنسير وياكم ..
ام محمد : هيه والله وهي صادقه ودونا فرجونا ودونا المبزره بنطمش ..
سعيد : ياله عاده انتن الهنتييين .. يوم تبن اتسيرين تتطمشن وتظهرن ريلج وريلها محد واتسيرين اتحوطن العين بكبرها واتردن وهاذا كله ولا اطمشتن ..
اليازيه : لا عاده سعيد غير يوم وياكم انتوا شباب وادلون كل مكان ..
حصه : هيه ونحن اني العين رحله سياحيه .. هههههه ..
احمد : هههههههه يله عاده .. مره وحده رحله سياحيه ..
سعيد : اقولك احمد رمسة بطووي ورشوود عن هييح السالفه ..
احمد : الله يخسك انته اشعنه تبا تفضحنا ..
سعيد : ياخي شو يعني مافيها فضيحه ولا شي اسمييييينا بنستااانس مصخرررررره ايقولك اخرط على اللي ماتعرفه واللي اتعرفه زيييييييده .. ..
ام علي : شو سالفتكم انتوا الاثنينه ؟؟..
حصه : هههههههههه هيله هم شنقل ومنقل .. اللي في سبيس تون ..
اليازيه نقعت من الضحك : ههههههههههههههه ه .. هيييه هم هم ..
احمد : اشياهن بناتج اتخبلن .؟؟
ام محمد :اشعنه انته توك اتعديبهم من زمان عافان الله نحن عايشين هالحاله ..
ظبيه : بسم الله عليهن شو اللي مخبل ابهن ..
ام علي : مايابنه من برع .. عشت الينان ع اصوله لين مايوزتج ..
احمد : هههههههههه اتحيد سعود يوم يوم انقص عليها وانلبسها لبس باتمان وانقولها نقزي من الجامه والحبيبه مصدقه بتنقز هههههه تتحرا عمرها اتصور الرسوم .. ..
سعيد : ههههههههههه هييييييييييه ههههههههه امايه انتي اشعنه اتيين اتخربين علينا جان خليتيها اطب ..
ظبيه : بسم الله عليه يعلكم ابدالي ... هههههههه .. انزين ماعليه انا رديتها الحركه ..
سعيد : ههههههههه انا مالي خص رديتيها في احمدوه ..
ظبيه : الحبيب مستانس كان ايموت يوم ايشوف درهم وانا متعمده كنت حاطه الدرهم على النار قتله احمدوه تبا درهم قالي هيه قتله انزين هاك يود عاد انا خاشتنه في البوك وعقيته في ايديه ويا الدراهم واول شي طاح الدرهم الحار هههههههه ..
احمد : انطمي انطمي سباله ثرج كنتي .. مونكككي ..
حصه : اسميكم انتوا يوم اصغار سوالف ..
ام علي : يله عاده عن هالرمسه باجر ان شاء الله رمضان وابا حد ايوديني الجمعيه ..
سعيد : هييييه صح صح .. مبرووووك عليكم الشهر ..
الكل : الله يبارك فيك ..
سعيد : احمد نش ويايه ..
حمد : ياريال مافيييني ..
سعيد : نش عاده عن العيازه وسحبه من ايديه ..
احمد : اعنبوك شو اظهر بوزار وفانيله شو مدراسي ؟؟
سعيد : هههههههه .. يله انزين سير بدل وانا بحر سيارتيه ..
احمد : ع وين ؟؟
سعيد : بنسير نشتري اللبس ..
احمد :ههههههههه خس الله عدوك الله يعينا اليوم .. جان مابيتونا في السجن ..
سعيد : افا علللييييييييييي ك .. ماعاش اللي يبيتك دقيقه وحده في ها المكان الخرابه وانته ولد بو علي ..
احمد : حرف الواو يعني ..
سعيد : هييه نعم فوق كل شي ..
احمد : شو اللي مخلي الخقه فينا الا هالشي نحن ..
سعيد : هههههههه .. لازم انساير الزمن بلي فيه ..
احمد : انزين انته اليوم ماعندك حفله ؟؟
سعيد : امبلا بس عاده متى عالساعه 3 بتخاووونا ؟؟
احمد : لا لا عاده انا وبطووي مالنا ف هالسوالف اوكيه نتمشى وياكم نتمصخر لكن هالامكان لا لا .. مالت اليهال اللي شراتكم .
سعيد : هههههه سر سر البس اخيرلك ..
وراح احمد لبس اثيابه وركب ويا سعيد في سيارته وراحوا السوق .. وفي السوق اتلاقوا مع بطي وراشد اعيال خالتهم ..
بطي : الله يفضحكم ان شاء الله ها اللي يماشي اليهال ..
سعيد : يله عاده بطووي تراكم مقتنعين فيها ..
بطي : ههههههههه انا عادي حق السوالف والمصخره والتتطنيز كل شي بسوي ..
سعيد : اشهد انك خييييلي .. خشمك ... وااايه مزيووووونه ..
احمد : روح انزييين من حلاتها ..
راشد : ههههه اشعندها تتطالع امحق اعيون في ذمتيه ..
بطي : عادي هذيله الاشكال بتي هي اترقمك ماعندهن مانع ..
سعيد : اتهبي الا هي بخش الانطونيو في حلجها ..
راشد : ياله ياله عاده مايحتاي محد لابس الانطونيو الا انته بتخبرك اشعنه الخققققه ؟؟ الحينه انطونيو ههههههههه اخلاف لبس بتان ..
احمد : ههههههههه ياريال صدقت مايستوي لبس بتان ونعال انطونيو..
بطي : ههههههههه بتان مطورين ..
ودخلوا المحل اللي بيبع لبس البتان ..
احمد : سلام عليكم .. ارباااااب ..
الريال : واليكم سلام بابا ..
احمد : في عندك هاذا لبس مال بتاني ..
الريال : اي في موجود .. كلششش لوون في .
بطي : عاااش بالوان بعد .. خخخخخخخخخخخاااا اااي ..
راشد : ههههههههه عسب تثبت الجنسيه ..
سعيد: اخاف ونحن لابسين لبسهم ايرشونا بجواز ..
احمد : هيه ترا هاذا اللي ناقص ..
بطي : هات بحري انا ابا بحري ..
راشد :اوكيه بطووي بحري وانا اخضر وسعوود بييج واحمدوه ابيض ..
احمد : هيه والله صدقك ها شو رايكم في الالوان .. ترا ماشي اخير عنهم ولا الباقي كلهن مقصصصه ..
سعيد : هههههههه هيه والله .. يله انزين رفيق عطنا ها الالوان ..
الريال : انتوا في وين رووه .؟؟ لبس بتاني لبس سيمسم انا يلبس ..
راشد : بنسير بنغازل ..
بطي : هههههههه خسك الله لا بنسافر باكستان ..
الريال : هاذا في باكستاان واااجد هلوو ..
سعيد وهو يمط عنه الكيسه ودفع الحساب : اعررف مايحتاي عاده بلاد الس للعجايب باكستان ثرها ..
الريال : شنو ايقول انته بابا ..؟؟
بطي : مافي ايقول شي ايقول هاذا واجد بلاد في مزبووووط ..
استانس الريال ع رمستهم ووقفوا عند سيايرهم اللي كانت موقفه في الباركن ..
راشد : انتوا ناووين ع موزه تتطردنيه اليوم من البيت كيف بلبس اللبس جدامها واظهر ..
احمد : وين موزه ياريال اهوووون حلج فطيييييييم شو يصكه ..؟؟
سعيد : ههههههه .. انا بخبركم تتدرون شو بنسوي ..
بطي : يله راعي الفكره شور علينا هب انته اللي مخطط نلبس هاللبس و انحوط به في المول مطنزه ثرنا
سعيد : هههههههه .. جوفوا اول شي نحن بنخلي الثياب في سيارتيه ع اساس انا نحن اللي بنمر عليكم الرماح وبتركبون ويانا وخلاف بنمر الشيشه وبنبدل في الشيشه مالت البترول وخلاف بنركب وبنروح السوق مال الشارجه ..وخلاف بنرد العين وبنسبح وبنسير العين مول نطالع الاوضاع قبل رمضان ..
بطي : واشعنه مانروح المول انروح السوق ..
سعيد : شو تبابه المول اليوم الخميس وعادي اي حد من شباب العين ايكون موجود اهناك ويشوفونا ..
راشد :هيه والله عاده نحن لو من بعيد بننعرف .. اسميهم بيطنزون ..
احمد : انتوا اتحيدون انكم بتستون مطنزه يعني من عقب هالسالفه ..
سعيد : ياريال خلنا نستانس يعني الواحد كم بيعيش .؟؟.
احمد : خلك انته عاده محد مونس عمره كثر ماانته مونس عمرك .. بالهببببل .. اخر وناسه ..
بطي : اقولك سعوود بتان في اوودي هاه لا وبعد اخر موديل هاه وين انته تبا ..
سعيد : ههههههههه ابا الشارجه واستوي فيها خاااان وايلس اضحك لين ماهلك ..

في سوق الشارجه
الساعه 7 المغرب
الخميس ..

بطي وراشد واحمد وسعيد كانوا لابسين لبس البتان اللي لابسينه ... واشكالهم كانت صدق اتفطس من الضحك وكل ماشافوا حد لصقوا فيه .. وقعدوا يتمصخرون عليه ..
احمد :هههههههههه يعلكم الفضيحه احس بعمريه مطنزه حق اللي يسوى واللي مايسوى ..
بطي : ههههههههههههه .. كله ولا انته احمدوووووووه طرررر ظاهر غير العرج طافح بهااللبس ..
راشد :ههههههههه .. بس بس واله انيه هلكت ..
سعيد وهو رايح صوب وحده من البنات : انا في واجد هبي هاذا لون اخمرررر ..
راشد : اموت ع الاحمر انا ..
صدت البنت عليهم وهي متروعه وتتطالعهم منصدمه : فقتكم ومشت عنهم ..
احمد :وااااااااو وااااااااااو هههههههههههه واووووووووو .. لقطوا ويهكم ..
سعيد : جب عادي ..
بطي : اتعيشون وتاخذون غيرها ..
راشد :والله لا اراويها .. ومشى وراها . لو سمحتي اختيه وياج راشد الخيلي من التحريات انتي غلطي ع رجال امن ولازم تتحاسبين ..
البنت متروعه : ............... ..........
سعيد : ماعليه ياراشد سامحها هالمره عسبي ..
راشد : لا ياسعيد .. اسف انا ماقدر ..
البنت : والله مكان قصدي بس المفروض انه التحريات مايغازلون ..
راشد : نحن كنا نمزح ..
البنت : انزين وانا بعد كنت امزح اسفه ..
راشد : ماعليه ماعليه جلبي ويهج .. وراحوا عنها ...
البنت حق اختها : تتدرين منوه هذيله ؟؟ ماشاء الله عليهم كل واحد احلى عن الثاني ..
الاخت : امنووووووه ؟؟ لا ماعرفهم ؟ تحريات صح ..
البنت : لا هب تحريات ركبي بخبرج في السياره ..

الجمعه
بيت بو محمد
الساعه 7 المغرب
اول ايام رمضان

اليازيه : يله يامايه عسب انسير انصلي في المسيد ..
ام محمد : يايه البس دليغاتيه ..
حصه : ههههههه امج بتسير المدرسه ؟؟..امايه لا تلبسين وردي بيخالفونج لبسي ابيض ..
اليازيه : ههههههههه ياويهج .. ههههه اشعنه تبين اتطبقين عليها الاحكام اللي تتطبق عليج ؟؟
حصه : هههههههه .. يزوي شو رايج عقب انخلي امايه اتودينا المارينا ..
اليازيه : هيه عسب مره مول اتحفر لج قبر واتحطج فيه اونه بتروح المارينا ..
حصه : والله يزوي انتي قوليلها انج تبين لج جلابيات من اليشمك حق الجامعه لانه رمضان وانتي تبين تلبسين جلابيات ..
اليازيه : انزين انا مفصله عند الخياط خمس جلابيات وياج ..
حصه : يالعنززززز عاده لا تستهبلين بلا سخافه خليهم حق عقب ..
اليازيه : انزين عاده انتي اشعنه تبين اتروحين ..؟؟
حصه :ابا اروح اشوفليه بدل حق العيد ..
اليازيه : ليكون حلمتي انج اتشوفين الشيخ خالد الخيلي اهناك وتبين اتروحين ..
حصه تفصخ انعالها : حوووووووووه مالج خص بالهنعال ترا ...
اليازيه :انزين بس انطمي .. بخبرها عقب مانظهر من المسيد ...
حصه : امايه يله يبونج اتاذنين في المسيد ..
ام محمد :يايه اعنبوكن ادخن ابوكن شو بلاكن قرصكن نيي ..
اليازبيه : حصوه اشويه عاده قرصج ..
حصه : هااااه .. هيه .. انزين ..
وراحن ام محمد وحصه واليازيه ايصلن التراويح والعشا في المسيد .. وقعدن حصه واليازيه ايحنن على امهن عسبت انهن ايروحن المارينا وخلاف ودتهن وطبعا كانت معصبه عليهن وحلفت عليهن انهن مايدشن غير ثلاث محلات ويظهرن .. .. وشلن لطيفه وياهن ..
في المارينا .
حصه وامها واليازيه ولطيفه كانوا يتمشون دشت حصه محل وخذتلها تنوره وخلاف ظهرت تبا ادورله قميص ..
ام محمد : تراج بس بتحدرين محل واحد عسبت القميص ..
اليازيه : انسير زارا اكيد بتحصلين كل الالوان اهناك ..
حصه : امايه انزين طالعي هالمحل تعالي بنطالع .. وطبعا هالمحل كان مجابل الكوفي اللي كانوا الشباب قاعدين وكانت طاوله مجبله هالمحل وقاعدين فيها 3 شباب ..
حصه اتاشر ع المحل اللي مجابل الكوفي : امايه اهنيه ..
ام محمد : امشي بسرعه يله تعالي وخلت حصه جدام باب المحل وخطفت عنها تمت حصه واقفه عند المحل وهي قافطه شويه ومشت عنهم وحدرت زارا وهي معصبه وشويه وبتصيح . وشويه ورن تلفون محمد ..
الريال : السلام عليج شحالج ..؟؟
الريم : وعليك السلام والرحمه ..بخير وسهاله .. اشحالك انته ؟؟
الريال : ابخير وسهاله .. ماشاء الله في المارينا جفت لطيفه وعرفتكم ..
الريم : اشعنه انته اهنيه .؟؟.
الريال : هي والله توني ظاهر ..

ظنكم منوه هالريال ؟؟؟
ظنكم البنت من وين اتعرف قوم راشد وبطي واحمد وسعيد ؟؟
ظنكم شو بيكون حال حصه من عقب ماسمعت كلام خالتها ؟؟
ظنكم شو الحال ع طحنون واليازيه ؟؟