أخذت في خاطري من واحدٍ غالـي=ماعاد ابـي النـاس قاصيهـا ودانيهـا
ماعاد ابي اللي ينشّدني عـن احوالـي=العزله ..ابـرك مـن الدنيـا ومافيهـا
اجلس لحالـي وانـادم نفسـي لحالـي=مهمـوم / وهمـومـي الله لايحييـهـا
اغيب عن مجتمع خلق الله أشـوا لـي=وادلّـه النفـس ..ليـن الله يسويـهـا
اضحك وانا الصدق .. لاداله ولا سالي=من ضيقـةٍ ماتجنّـب عـن حراويهـا
لا اونستها في ضلوعي كنها الصالي !=النـاس ماعـاد اناديـهـا بأساميـهـا
كنيتها لين شفـت الشـرّ فـي حالـي=عجزت لأهرج بها وازريت لا أخفيهـا
ان جيت ابهـرج بهـا شـيٍ ماينقالـي=وان جيت ابسكت ل( نارٍ من يصاليها )!
حتى تسـاوا مـذاق المـر و الحالـي=حسبـي علـى كلمـةٍ مانـي بناسيهـا
ياليتهـا مــن عدويـنـي وعـذالـي=والله ل( تلقى ) الجواب اللـي يدوايهـا
لكنهـا مـن حشيـمٍ منزلـه عـالـي=احترت فيها ولا ادري ويـن اوديهـا !
مردودهـا كــل مامـنّـه تهيّـالـي=شيّمـت نفسـي عـن اولهـا وتاليهـا
تمرنـي .. جعـل والله مالهـا والـي=ماكنـي اوحيتهـا مـن فـمّ راعيـهـا
واصد من دون لا أشـاور ولا أمالـي=بضاعـةٍ بـيـن بايعـهـا وشاريـهـا
ماني ب(ناقص ) غرابيـل اول وتالـي=روحـي مـن الوقـت فيهـا مايكفيهـا
سوالـفٍ كـل مامـرت علـى بالـي=سمحت مـن خيـرةٍ كنـت امتحريهـا
ياحـرّ كبـدي وياهـمـي وغربـالـي=مصيبـه ان كـان حاميهـا حراميـهـا
ضايق وضاقت بي فجوج الخلا الخالي=(والنار ماتحرق الا رجـل واطيهـا )
مهما يـدور الزمـان ويأمـن الجالـي=مايجرح الروح غيـر طعـون غاليهـا

{{ . ’ . مـشـعـان الـبـراقـ . ’ . }}

*