مستنقع القهاوي إلي بطرف الغابة, عشرين بالمية في إستراحات الأشجار. خمس طعش بالمية يتسكعون بطرقات الغابة والأسواق. الأسد : شي طيب وجودهم بالأسواق يعلمهم أصول التجارة. ويرد عليه : لا ياطويل العمر هدفهم ملاحقة قطعان الغزلان, أما التجارة عندنا ماسكينها الضباع والخفافيش المتسترة. ويكمل:و سبعة بالمية من الشباب على الإنترنت (وتسعين بالمية من شباب الإنترنت في موقع الأقلاع) وإثنين بالمية يسرقون , وواحد بالمية إرهابيين أو جاهزين ليكونوا إرهابيين. والأسباب كما يلي: أولا : الفراغ , ثانيا أسباب أقتصادية. مع تقصير في دور البيت والمدرسة والإعلام. الأسد: أفتحوا المجال للشباب بالوظايف بس قبل كذا غيروا مناهج الدراسة إلى مناهج عملية مو بس نظرية, كثفوا الإنجليزي أبغاهم يتخرجون من المدارس عباقرة كمبيوتر وعلوم تطبيقية وتقنية, وقللوا تخصص العلوم الشرعية والأدبية من المدارس, وش أسوى إذا تخرجوا نص الطلاب علوم شرعية وماعندنا لهم إلا وظيفة قاضي , الشي الوحيد إللي بيخلينا نحتاج نص المتخرجين قضاة إن يكون النص الثاني كلهم مجرمين. وبالنسبة للمتطرفين والله من كثر الفراغ والطاقة , وأمرهم هين شبابنا ماشاء الله عليه عنده طاقة جبارة غير مستغلة , وبدال مايفرغون طاقاتهم ويقذفون بقذائف تزهق الأرواح بنزوجهم من بدري ونخليهم يقذفون قذائف تولد الأرواح.
أبغاكم تسوون صندوق لمساعدة الشباب على الزواج .كل شاب بيتزوج عطوه خمسين الف هبة وخمسين الف أقساط بدون فوائد. وإستحدثوا وظائف مؤقتة بالساعات بعد الوظائف الأساسية , برواتب مجزية , كثروا الأندية الرياضية وألحقوا فيها مراكز علمية يعنى التنافس بين الأندية مايكون بالرياضة بس بكل مجالات التكنلوجيا , يعنى مثلا نبغى نشوف مباراة بين فريق الجمال والصقر أو النمور والتماسيح على كاس أفضل إختراع. وأبغى وسائل الترفيه المباحة في كل مكان, والله إن شباب غابتنا طيبين وماقصروا , تخيلوا على كثر وقت الفراغ عندهم تلقى نسبة ضئيلة منحرفة مقارنة بالغابات الثانية, وبالنسبة للمتطرفين تراهم مهما كان عيالنا بس مغرر بهم, وإن شاء الله يهديهم, البلا من الرؤوس الكبار إلي يحذفون الشباب الصغير بالنار وعيالهم عندهم. والشاب إذا نشأ على التوعية الصحيحة وتوظف وتزوج وجا له عيال خلاص ماراح يجذبه أي تيار متطرف.
ويلتفت الأسد على الكنغر وزير الإقتصاد وإنت وش عندك ياوجه بن فهرة من تقارير؟ على حسب ماطلبتم فخامتكم تقرير أعلى الواردات كما يلي: أكثر بضاعة نستوردها هي القمح والسيارات, الأسد : أفا القمح وجبتنا الأساسية اليومية نستوردها. عندك حاجة من الثنتين خلال الخطة الخمسية الجاية , ياتزرعون القمح وتكتفون ذاتيا وإلا غيروا وجبتكم الأساسية إلي شي موجود عندنا , لابارك الله في أمة تاكل لقمة من غيرها. ويكمل الكنغر أما أكثر سلعة نستوردها بعد القمح هي وسائل النقل, الأسد خلال الخطة الخمسية الجاية : أبغى مصانع لتجميع وسائل النقل بغابتنا والخطة الخمسية إلي بعدها نصنعها
وإنت يأبو الفقراء والمساكين وش عندك من تقارير: التقرير يقول كل سنة ثلاثة بالمية من العوائل تنتقل من إسرة متوسطة الدخل إلي محدودة الدخل , والأسباب كثيرة من ضمنها عند تقاعد عائل الإسرة الوحيد تتحول الأسرة إلي ذات دخل محدود وخلال فترة بسيطة بعد تراكم الديون والأقساط لغلاء أساسيات المعيشة والإيجارات تصبح الأسرة فقيرة لعدم كفاية الراتب التقاعدي وبعد وفاة العائل تصبح الأسرة معدمة لأن الضمان الإجتماعي لايضمن للأسرة حياة كريمة. ويسأله الأسد كم عدد الأسرة الفقيرة عندك؟ عندي ياطويل العمر : تقريبا خمسمية ألف أسرة فقيرة.ويلتفت الأسد على وزير الإقتصاد : وإنت كم عندك من مزرعة بتزرعونها هالسنة ؟ عندنا خمس مزارع بتنزل للإكتتاب بمجموع خمسمية مليون بذرة والبذرة الوحدة تطلع مالا يقل عن عشرين ثمرة. الأسد: خلاص المزارع السنة هذي محصورة علي إلي أساميهم بالضمان الإجتماعي بس , وعيالهم لهم أولوية بالبعثات والوظائف. إذا توطف ولد واحد منهم بوظيفة مرموقة كفل لأهله حياة كريمة وقللنا عدد الفقراء. وبالنسبة لأساسيات المعيشة أبغاها أرخص ماتكون أما الكماليات تصرفوا إنتم.
ويجي دور زير النقل: ويقول الطرق عندنا ماش يبغى لها صيانة والمشكلة من مقاولين غابتنا , بصراحة مايستحون على وجيهم علشان غابتنا معطتهم الأوليه وضمنوا محد مشاركهم من برى الغابة يشتغلون شغل أي كلام تصدق يابوالليث إن عرض طبقة الأسفلت عندهم تقاس بالملي شكله بس صبغ أسود , وليته على كذا بس لما يسوون طريق جديد على ما يوصلون نهاية الطريق يرجعون يسوون صيانة لأوله وفايس فيرسا , ويلتفت النمر على الخرتيت يقاصيه (يشاوره) : يعني وشو فايس فيرسا. الخرتيت: فايس بالإنجليزي يعنى وجه وفيرسا يعنى أول, وقصده مايمديهم يخلصون نهاية الطريق إلا نكسوا وجيهم للجهة الأولى يصلحونها.ويقول ألأسد: خلاص المناقصات الجاية جيبوا شركات أجنبية من خارج غابة السفاري أهم ماعلينا راحة المواطنين السفاريين والهدف من السفرنة راحة المواطنين مهوب علشان مصحلة فئة قليلة من المواطنين التجار نضر بالمصلحة العامة. ويقول الأسد لوزير النقل: شف أهم شي نطور شبكات الطرق , أبغى في الخطه الخمسية الجاية سكك قطارات توصل لكل المدن الرئيسية موترو أنفاء وخوذوا مخطط طرق مستعمرة النمل إللي لعن إبو إبليسهم على كثرهم وصغر مساحتهم مايتصادمون زينا, خلاص من اليوم ورايح أبغى كل الطرق الرئيسية مزدوجة والشباب إللي يفحطون سووا لهم ساحات خاصة فيهم وفيها رالي وتطعيس وإللي يفلح خلوه يشارك ببطولات العالم للسيارات
وكل شوي الأسد يجيب أفكار غريبة بس عبقرية ,وكل وزير يشوف إنها الأفكار هذي ماتطلع إلا من واحد مسطل وكلها مستحلية ...بس بينه نفسه يقول ليش لا. وأثبتت التجارب إن مع التصميم على النجاح مافي شي مستحيل, وكل شوي جايب فكرة غريبة , حتى مرة سأل وزير الرياضة وش طموحك قال أوصل لكاس العالم , فصله على طوله , قال وش فرق لعيبتنا عن اللعيبة إللي ياخذون كاس العالم كلها كورة طقها وإلحقها مع شوية تدريب ومثابرة..ترى أفقر دول العالم أحسن منا بالكورة , لاتقول لي مستحيل إسأل نفسك ليش لا. لعنبوا إبليسك حتى الركض وش يبغى له يوم إنكم تعجزون عن الميدالية الذهبية ,عاذ هذي مايبغى له صناعة صاروخ , يعنى عجزتوا تلقون بالغابة كلها واحد سبوق.. ياخى عندكم طير شلوى هذا ويأشر على القهوجي الفهد الأسود. ويرد: لا ياطويل العمر أنا ميولي فنية.
الإنبهـار بالإزدهـار
بعـد خمس سنوات إزدهـرت غابة السفـارى وأصبحت من أغنى الغابات بالمنطقة بفضل عقول وسواعد شبابها , العقول تأتي بالفكرة والسواعد تطبقها لأن الأفكار بدون تطبيق عديمة الفائدة كالعلم بدون العمل به. ومع إن أغلب الغابات مقاطعتها إلا إن إعتمادها على نفسها ومحاولة الإستغناء عن الآخرين قدر الإمكان ساهم بقدركبير في تطورها في فترة وجيزة. وإستغربت باقي الغابات عن سر التغيير إلي حصل وخصوصا إنهم يعرفون إن الغابة في الفترة الآخيرة بعد ما إنغلقت على نفسها أو بمعنى أصح قاطعوها بسبب تصرفاتها الغريبة وأفكارها المجنونة تطورت بسرعة وإنبهروا بإزدهارها, وأرسل ملك السافنا مندوبه سرا علشان ماتدري الغابات الثانية إنه خرق المعاهدة, علشان يسال ملكم الأسد عن سر تطور غابة السفاري المفاجئ , وعند وصوله لقى مندوب كل غابة جاي لنفس السبب بدون مايعلم الغابة الثانية, حتى غابة الأمازون البعيدة عنهم مرسلة لهم النعامة سفير فوق العادة ويسألها الخرتيت إنتي سفيرة فوق العادة وإلا سفيرة فيك العادة. ويجمع الأسد كل المبعوثين وقال الله جابكم مرة وحدة علشان ماأكرر نفسي أنا بقولكم سر تطورنا, السر إنه بعد إحراق قوات الموزميق للحشيش إنتشر الدخان عندنا وصرنا نفكر أفكار غريبة تنفيذها مهمة شبه مستحيلة وفيها تحدي لنا لكنها قابلة للتطبيق مع صعوبة المهمة لكن افكارنا كانت بالنسبة لنا شبه مقدسة لاننا نعرف إذا طبقناها سوف نزدهر بسرعة أكثر مما لو طبقنا أفكار تقليدية لانواجه صعوبة في تطبيقها ولكنه تطور بطئ بسرعة السـلحفـ... وبغى يقول السلحفاة بس لمحها توها داخلة مع الباب وسكت. ويقول الخرتيت للكنغر: شفت السلحفاة هذي تراها جاية للمؤتمر إللي بأول الموضوع بس توها توصل ويفطس الكنغر من الضحك. ويسأل مندوب ملك الصنوبر الأسد: يعنى الحشيش إللى سوى فيكم كذا, الملك: طبعا لا, بذمتك شفت حشيش يطور مجتمع ! الحشيش هو بداية السقوط في الهاوية وإسترسل الأسد بكلامه: بعد ماأحرقت القوات الموزمبيقية الحشيش وكان بكمية صغيرة إنتشرت النيران في نوع من أنواع الأعشاب المفيدة مفعوله عكس الحشيش مفيد ويخلي الواحد يفكر صح ويجيب أفكار عبقرية. وكل مندوب يقول للأسد تكفى عطنا من الأعشاب نبغى ناخذها لغاباتنا علشان نتطور زيكم. قال الأسد بشرط ..لن أفصح عن نوع الأعشاب لأنها ماتنبت إلإ عندنا وأخاف يكثر تهريبها لكم , إنتم أكيد ناوين تطورون وإلا لا يعني لازم القرار يكون نابع من داخلكم.., قالوا أكيد أحد يتمنى إنه مايتطور, قال:أجل شوفوا بعطيكم الأعشاب المفيدة على شكل مسحوق علشان ماتعرفونها وخلال فترة قصيرة بتجيكم أفكار عبقرية بس لازم تطبقونها على طول لانه كل يوم بتجيكم فكرة وإذا ماطبقتوها تتراكم عليكم الأفكار وماعاد يمديكم تسوون أي فكرة يعنى أهم شي تنفيذ الفكرة بإختصار الفكرة على الأعشاب والتطبيق عليكم, . قالوا إنت عطنا المسحوق السحري ومالك إلا إللي بيطبق الأفكار على طول أحد يرفس النعمة برجله ونوعدك بنكرف ليل نهار علشان نتطور زيكم. وافق الأسد وقال خلاص بعطيكم المسحـوق بكمية تكفيكم لخمس سنوات إذا تطورتوا وإزدهرتوا زينا أعطيكم الدفعة الثانية بفلوس. قالوا تم, ,وكل مندوب غابة حمل معه أطنان من مسحوق الأعشاب السحري ورجع لغابته.
البذرة السحـرية
بعد ماأخذ كل وفد المسحوق السحري, صاروا كل فترة يحرقون كمية ويبخرون أهل الغابات منها وكل واحد منهم حاط نصب عينية إنهم بيتطورون زي غابة السفاري, وصارت مدارسهم كل صبح تجيب المسحوق تبخر طلابها وطالباتها ,وبالطابور كل واحد يمر على المدخن ويفحَـج عليه (يفشح يفوحش) ويروح على فصله, ومرة
