مجالس الرويضة لكل العرب - عرض مشاركة واحدة

#1 (**permalink**) 28-12-2007, 02:18 AM

الحرمان بذرة الابداع
----------------------------

تعال
اسكن مساحات الخفوق
وودع الترحال

تعال
أشعل كلام الحب
واخمد ثورة سكاتي

تعال
وقبل (كيف الحال)
ناظر .. هو بقى بي حال ؟؟

تعال
وقبل (تسمعني جديدك)
إسمع آهاتي

تعال
وشيل من بالي هواجس
كنهن جبال

تعبت أخضع لهذا الإنهزام
ونكس راياتي !!

تعال وشوف ( نهم الحنايا )
وإسمع ( اليامال )

حزين مثل دمعات اليتامى
لإنكساراتي !!

لك الله ..
ما بقى جرح بروحي ما نزف أو سال

لك الله ..
ما بقى هم أعرفه ما ملى أوقاتي

أجيلك ممتطي صهوة حروفي
شاعر خيال
أبوصل للعيون اللي مساها
لملم شتاتي !

على جال التعب .. أرمي جراحي
وأحسب الآمال
ولا لي لالبس هالليل ثوبه
غير وناتي !

وش أقسى من هالذبول اللي تشوفه
لابكى رجال ؟
وش آخر هالأفول اللي تشوفه
بكل نجماتي ؟

دخيلك ..
هات لي [ قلب ] و [ صبر ]
ومعاهم [ بال ]
حس بجروحي .. ليتك تبكي لأناتي

دخيلك ..
إطعن غيابك .. تعبت أحايلك وأحتال

دخيلك ..
ملني هالطريق .. بروحاتي وجياتي

عشقتك !!
مثل مايعشق شعوري ضحكة الأطفال

عشقتك !!
مثل ما يعشق طموحي لمس غاياتي

عشقتك !!
مثل ما تعشق جروحي صرخة الموال

عشقتك !!
مثل ما تعشق عيوني حبس دمعاتي

عشقتك !!
مثل ما يعشق غرورك رغبة الإهمال

عشقتك !!
مثل ما يعشق خفوقي سجنك بذاتي

أنا بصبر ..
مدام لكل عقدة في ذا الزمن حلال

وإذا مت أنا ؟؟ يا آخر طموحي !!
{ عيش في أبياتي } ..

نقلتها لروعتها لكني لا أعلم من القائل ...!