|
وش اسوي اروح والا ما اروح !!! السلام عليكم ورحمة الله وبركاته في الحقيقة ترددت كثيراً في كتابة مشكلتي ولكن بما أني لم أعد قادرة على تحملها احبيت أن أخذ نصيحتكم .. لعل أحد يفهمني .. مشكلتي أني انسانة نظيفة نظيفة نظيفة .. .. ( بمعنى أنا ما أقبل أحد يلمس لي حاجة ولو احد لمس لي حاجة أروح اغسلها واعقمها بمحلول طبي خاص بالتعقيم .. ما أحب المس يدين أحد ولا اقرب من أحد ودايم أحس أن الناس كلهم وسخين ..واتخيل فيهم ( روائح كريهة ..) قبل ما أكل اي حاجة لازم اشمها وافتح العلبة واقرأ تاريخاها ومكوناتها وبعدين اتقرف وتحام كبدي و( استفرغ ) ... في جيبي عطر ارشه كل ما دخلت مكان في البيت .. او بمنديل قبل ما أدخل على احد .. مااكل ولا اشرب عند أحد .. وفي الفترة الآخيرة أحس أن الامر زائد يعني ما ارتاح اغسل ملابسي واجلس مقابلتها لين تنشف وإذا احد مر من جنبها اروح واغسلها مرة ثانية .. اهلي يقولون انتي موسوسة وهذي اعراض مرض نفسي ولازم تروحين لآخصائية نفسية ويلحون علي وأنا رافضه معقولة أنا اروح لدكتورة نفسية !!!! بس تعبت و نفسيتي زفت .. ونحفت وعظامي على قولتهم قدرو يعدونها .. ومترددة اروح والا ما اروح .. رغم اني أشوف أنهُ امر عادي بس اهلي طيروها براسي .. وانا خفت .. وش رايكم !! اروح والا مااروح ..؟ وبصراحة أنا ما اصدق كلام الدكاترة احس انها بتقول انك محتاجة لعلاج وفيك مرض نفسي بس عشان تااخذ فلوس وانا احس ما فيني حاجة امرطبيعي وكل العالم مثلي ...... |
رد: وش اسوي اروح والا ما اروح !!! اذا كنتي متزوجة فهذا يسمى (الوحام )فأنتي متوحمة بلاشك واذا كنتي غير متزوجة او غير حامل فإذا كان الامر منذ الطفولة فلا علاج له واذا كان من موقف شاهدتيه وحامت عليك كبدك لقوة القذارة التي رأيتيها او شميتيها فهذا يحتاج الى طبيب نفساني يجعلك تتغلبين على الموقف الذي جعلك تتخذين طريق الوسوسة وهو مذكور بالقرأن الكريم ومنه الوسواس القهري والعلاج هو الحل مع ان هناك خصال جميلة ذكرتيها وهي من لب النظافة فلا تجعلي كل شيء وسوسة ودمتي بخير |
رد: وش اسوي اروح والا ما اروح !!! مرحباً بك واسعد الله صباحك كلام الاستاذ محمد صحيح اختي ولا يقتصر الامر عليك فهنالك شريحه من الناس لديها هذا الهاجس وهو يتعلق بطبيعتهم يستوجب الاجتهاد بتغيير هذه العاده وتقبل الحياه بكل مافيها .. لو تاملت بالكون لوجدت انه ملئ بالجراثيم والميكروبات مما يجعل الانسان يعاني من هذا الهاجس ولذا خلق الله سبحانه بجسم الانسان كريات دم بيضاء تحميه من ذلك .. ماعليك فعله اختي هو الاجتهاد بتقبل كل الامور بشكل عادي الا الامور المتعسره وفي حال استصعب عليك الامر فلابد من مراجعه الطبيب باسرع وقت وذلك حتى تزيد هذه الحاله معك . طبعا انا لست بطبيب ولكن اطلعت على بعض هذه الامور بحكم مجال عملي . تمنياتي لك بالسعاده |
رد: وش اسوي اروح والا ما اروح !!! اولاً اشكرك أخي محمد وعازف على التفاعل مع مشكلتي .. واولاً : مو وحام لاني بنت .. ثانياً : من كنت صغيرة وأنا حريصة على النظافة بس لي كم سنه وانا أشك في نظافة الناس كلهم احس انهم وسخين وكلهم جراثيم ومعدين ..واحس انهم بيعادوني بمرض وفعلاً احس مره كبدي تعورني مره بطني مره راسي .. ولا يطول الوجع ربع ساعة بالكثير ولا عاد يعورني شيء .. واحيانا احس اني انا متوهمة المرض .. ثالثاً : ما قد شفت مشهد مقرف حصل قدامي عشان أقول أن مشكلتي ردة فعل للي شفته .. أن احس عادي مو مشكلة بس اهلي كلهم يقولون أنتي موسوسة ولازم تروحين لدكتورة قبل مايزيد معك الأمر .. واول ما كنت اعبر كلامهم واضحك عليهم .. بس من كثر مايزنون على راسي ويثبتون لي مواقف كنت اسويها احس فعلاً ان تصرفي موطبيعي .. فمثلاً لو بسلم على أحد ادخل يدي جو الكم عشان ما المس يدينهم .. وبعطين اروح اغسل الكم .. وغير كذا مستحيل آكل طبخ بيت واذا اضطريت انا اصلح لنفسي , وأن كنت في مطعم لازم أقابل العامل حتى يخلص طلبي , ولو اضطريت أكل من طبخ أحد أجلس انبش في الصحن واشم الأكل وإذا تاكدت أن مافيه حاجة اكل بعدين أجلس دقايق وافكر وأقول في نفسي وشلون أكلت أخاف اللي طبخته مالبست قفاز ولامسه الاكل بيديها .. وبعدين أحس ان بطني يعورني ويصدع راسي .. و لما ابغى اغسل مثلاً كاس وما حصلت ديتول ما أشرب لين اشتري ديتول واغسل الكاس واشرب .. صح النظافة كويسة بس احس بزيادهـ وايقنت الحين ان عندي مشكلة .. بس المشكلة الاكبر اني ما تقبلت فكرة اروح لدكتورة نفسية .. وش يقولن عني الناس اللي يعرفوني لو درو .. وخصوصاً انهم يعتبروني شيء كبير .. اخواني وخواتي بيعايروني ان رحت .. وغير كذا مركزي العلمي .. واشياء كثيرة .. هذا اللي متعبني .. |
رد: وش اسوي اروح والا ما اروح !!! صباحك سكر اختي اقتباس:
اقتباس:
اقتباس:
اقتباس:
جميل جدا اقتباس:
كيف تعتقدين بان اكل المطاعم انظف من اكل البيت ؟ امر غربي اقتباس:
كلام منطقي اقتباس:
ايهما افضل اختي .. ان يقال تعالجت نفسيا وتمر الايام وينسى هذا الامر او ان يبتعد عنك الناس لانك بالفعل ستصبحين مريضه نفسياً وكما تشمئزين من الناس بالتاكيد هم سيبادلونك هذا الامر ويلاحظونه عليك . بمعنى اوضح انا لو لقيت احد يسلم علي باكمامه ماسلم عليه واعرف انه مايبي يلامس يدي ومع الايام تتغير معاك معامله الناس . اختي حتى اكون معاك صريح بالفعل بمجتمعنا مراجعه الطبيب النفسي امر صعب ولكن بامكانك السفر بالاجازه الى الخارج والسؤال عن هذا الامر عاجلاً . حكمي عقلك وخلال هذه الايام اجتهدي بان تجاري الواقع بدايه من شرب الماء وانت تكتمين انفاسك حتى لاتشمين رائحه الكاسه ومنها يوم بعد يوم اجتهدي وبإذن الله سيتغير الامر . تمنياتي لك بالسعاده |
رد: وش اسوي اروح والا ما اروح !!! الماسة الله يعافيك واعتقد أخي عازف أنه على حق يعني ياليت تهتمين شوي بالامر ولا تقعدين على ذا الحال دمتي بخير |
رد: وش اسوي اروح والا ما اروح !!! هاه بشري عسى الأمور زينه الحين .. ولاتزعلين ياقلبي انا بنت عمي كانت نفسك وكانت تمنعنا ندخل بالجرم وانتي بكرامه ببيتهم يعني ندخل من باب الشارع نشيل الصندل على طول بعدين تطورت المشكلة معها حتى وصلت للوضوء.. يعني تعمل الوضوء ثلاث مرات واحياناً يطلع وقلت الصلاة والسبه الوضوء في البداية طنشتها والامر عادي شوي شوي تتتطور الحاله تدرين وش صرت اسوي لها .. الأشياء إلي تطلب إني اسويها ارفضها يعني صرت ادخل البيت بالصندل وما آشيله لانه الوضع معها تطور وصرت اوقف على راسها وهي تغسل للصلاة .. بالبداية انا تعبت معها كثير وهي كمان تعبت مني .. احياناً لما اقولها لاتعيدين الوضوء تجلس تصارخ بوجهي .. ومرت ايام كرهتني لاني اخالفها بس ماعلي منها .. وصرت اوقف على راسها وهي تغسل وتصلي هي جت ايام مانصلي إلا سوى وانا ادري انها تبيني اشوف صلاتها وكيف تسوي الوضوء بالنسبة للوضوء كثير ايام تترجى انها تعيده من 5 إلى 8 مرات بالوضوء الواحد بس انا ماعطيتها وجه واخليها تغسل كل الاعضاء 3 مرات ولما تنتهي من الوضوء اقولها خلاص يالله نصلي تقولي بعيده قلت خلاص انتي غسلي 3 مرات>> بصراخ طبعاً وكمان حاولت اشغلها ما آخليها بروحها علشان ماتفكر شوي شوي راحت عقدة الوضوء بعد معاناه 3 شهور وصرت عادي ادخل بالصندل ببيتهم>>حرام طيب صندلي جديد وبصراحه يبي لك وقت لاني انا عانت كثير مع بنت عمي والحين الحمدلله رجعت عاديه .. ورجعت المياه لمجاريها .. وللعلم المشكلة معها بدت عاديه وشوي شوي تطورت .. اني خلي اهلك يساعدونك او اختك بدال ماهم شاطرين يحطمون .. ياليتني عندك والله كان شهر بإذن الله وانتي زي القشطة .. طمنيني عن الوضع وإذا احتجتي شيء انا بالخدمه ياقلبي .. |
رد: وش اسوي اروح والا ما اروح !!! ماراح اقول اكثر من الي قاله محمد وعازف كفوو وفوو ورايي من رايي عازف عليك مراجعه طبيب نفسي وصديقيني يالغلا النفسي مو عيب او مافي احراج اذا كان هذا الشي راجع لي بمصلحتك وكلام الناس مايخلص ولو بتخافين من كلامهم وكذا ماراح تسويين شي وماراح تغيرين من حالك ويالغلا موب لازم اذا بتروحين المشفى النفسي يعرفون صديقاتك او اي احد تعرفينه خلي العلاج سري بينك وبين اهلك بس لانو اذا استمريتي على هذا راح تطور حالتك اكثر اكسري العصا من الوسط واتكلي على الله وراجعي طبيب واعطيه حالتك وشوفي شنو يقول لك وشنو تحتاجيين عشان تتغلبيين على هذا،، هذا الي اقدر اقوله لك واكيد لما تقررين انك تروحيين روحي وانتي مقتنعه ورايدهـ انك تروحيين وتكوني على ثقه انو لما تروحين تتقوليين اكيد راح اتعالج وراح اتخلص من الي انا فيه عشان تستجيبين للعلاج واهم شي اهي الارداهـ ارادتك كفيله انك تتغيرين وتتحسن حالتك الى الافضل،، ماتشوفين شر يعطيك العافيه،، وفا |
رد: وش اسوي اروح والا ما اروح !!! الله يعطيكم العافية أشكركم على كلامكم المشجع .. والناس مايعلق في ذاكرتهم الا الاخبار السيئة ومشاكل العالم .. ومستحيل مع الوقت ينسونها الا بيذكرون الشخص بمشكلته .. والله يعيني لين الحين وانا مترددة .. لو انا ضامنة ان الجلسات راح تكون حكي ونصائح بتشجع وبروح .. بس الخوف أنهم يصرفون لي ادوية ساعتها احس اني بستخف وان مشكلتي خطرة صدق .. طيب انتم وش رايكم تشوفون تصرفاتي طبيعية او لا .. ؟ |
رد: وش اسوي اروح والا ما اروح !!! الماسه الحساسه اختي الغاليه انا ماعندي خلفيه عن الامراض ولكن يالغاليه الي اشوفه انج تستشيرين ناس مختصه يعني مافي عيب ان نروح لطبيب نفسي اذا كان العلاج بعد الله عنده ...ولا عيب ان نروح له والله يوفقج ان شاء الله |
رد: وش اسوي اروح والا ما اروح !!! كان الله في عونك لابد من زيارة |
رد: وش اسوي اروح والا ما اروح !!! الله يكون بعونك اختي .. وبصراحه الوضع اللي انتي فيه لا تحسدين عليه .. واعتقد تتعالجين عند طبيب نفسي افضل من يبتعدون عنك الناس وتتطور حالتك لوسواس هذا رايي واتمنى لك الاستفاده .. دمتِ بود |
رد: وش اسوي اروح والا ما اروح !!! الماسة وحساسة أختي الغالية أذا بتسمعي نصيحة أختك نور روحي لطبيب المرض إلي ندك اسمه الوسواس القهري وهذي حاله نفسيه بتصيب المريض من النظافة تخيل أشياء لا سمح الله الخوف من الموت وعدم النوم تخيل سماع أصوات أنا حدث معي وسواس النظافة خاصة مع الغبار أي شي بلامس يدي اجري وغسلها كان السبب برنامج أنعرض على القناة الأولى مريضه بتعاني من الوسواس القهري وربي أنعديت ووسوست مثلها لكن كانت حاله عرضيه نسيتها بعد مده لكن حالتك مطوره يا غالية روحي لطبيب والمرض مو عيب ولا حرام هذا ابتلاء من الله يشوف قوت أيمانك وتخفيف لذنوبك وزيادة لحسناتك لكن قال تعالى ولا تلقوا بيديكم لتهلكه عشان كذا ما تهملي نفسك وتوكل على ربك وروحي والأطباء مو غرضهم اخذ فلوس وبس يعني بربك كل أصابع يدك مثل بعض ولا تروحي خاص روحي عام وراح تشفي بأذن ربك و طمنينا عنك بعدين نور الحياة |
رد: وش اسوي اروح والا ما اروح !!! اقوووووووول هيا روووووووووقي بلا وسوسة انتي شكلك فيك حالة نفسية انا اقول تسمعين كلامهم وتروحين لدكتورة نفسية... تقبلي ردي بروح ريااااضية |
رد: وش اسوي اروح والا ما اروح !!! الغاليه الماسه وحساسه الجميع ماقصر .. وأن تطور الوضع أكثر .. أسمعي كلام أهلك ونسأل الله لك العافيه الوسواس مصيبه كبيره : ودمتي |
| الساعة الآن 02:01 AM. |
Powered by vBulletin® Version 3.8.7, Copyright ©2000 - 2026, Jelsoft Enterprises Ltd.
-
arab-line : Search Engine Friendly URLs by vBSEO 3.3.0 TranZ By
Almuhajir
... جميع الحقوق محفوظه لمجالس رويضة العرض لكل العرب ...
.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..