يالله يالمعبود ياخير معبود=يافارج الشدات لوهي كبيره
يامدبر الافلاك يامجرى النود=ماخاب منهو خايفٍ يستجيره
يامرسلٍ يونس وموسى وداود=وفضل محمد بالرساله نذيره
بين طريق الخير للناس بحدود=وكل ٍ يحاسب في نوايا ضميره
تفرج لمن هو دونه الباب مردود=ورع ٍ يتيم وجاب بلوى خطيره
غره ابليس اللي مع الناس موعود=والورع الاخر جابها مستديره
ابوه شايب والبلاء فجعه العود=ياعبرها ياكبرها من كسيره
العود يبغى عياله زنود وعضود=بس القدر مكتوب شره وخيره
أي والله انه باخر الوقت مهجود=الارض ضاقت والمباني صغيره
حطو بحبس ٍ دونه قفول وجنود=والحبس دايم واقف ٍ له خفيره
لو قتلهم بيرد من مات ويزود !!=ايام من عمره عددها قصيره !!
قلنا فداكم نترك الدرب مسدود !!=بس الذي قد مات واجه مصيره !!
لاقبلها لابعدها شي ماجود=جهال بدراك العواقب غريره
والادمي تال الزمن قبر ولحود=ولاحد ٍ معمر في الحياة الحقيره
ياعزتي للام من علم ماكود=لاذيع بالتلفاز حاس المريره
تسهر طوال الليل والعالم رقود!!=وفي جوفها قامت تواقد سعيره !!
ام اليتاما زوجها قبل مفقود=وصارت من البلوى عجوز ٍ ضريره
الحكم صادر فيه والسيف مجرود=بس الآمل بالله مافيه غيره
ثم الرجال اللي لهم جاه وجهود=اللي مآثرهم بوسط الجزيره
قبيله ٍ تستاهل المدح والزود=شيمه وقيمه والمواقف شهيره
رجالهم بالطيب حاضر وموجود=وافعالهم في كل ديره وديره
فيما مضى والوقت طارد ومطرود=رجالهم ينطح وجيه المغيره
ياما وياما زبنو كل مضهود=يوم الليالي السود حرب وذخيره
يوم الزمن شعله وفتنه وبارود=والأمن ضايع والهبايب مثيره
فيهم وفاء فيهم كرم ماله حدود=وايضاً لهم فزعه وخوه وجيره
من نجد جيناكم جماعات ووفود=في موقف ٍ يحتاج عزم وبصيره
يابو سند تكفى ترا الجمع محشود=متأمل ٍ بالعفو منكم بريره
تكفون ثم تكفون والعلم مشهود=نبغى الشفاعه يالوجيه السفيره
والعفو عند المقدره طبع محمود=عسى الفرج يلفي علينا بشيره
وترى القبايل عندها الطيب معهود=واصل التسامح طبع ماتستعيره
والعفو عند الناس ماهوب مجحود=جماله ٍ بالاوله والاخيره
وغاية جميع الوفد كله ومقصود=يطلب رضاكم والعفو والستيره
والاجر عند اللي له العالم سجود=اللي يعرف البينه والسريره