بغيتها خيره .. وبالغت تأخيره
 

بغيتها خيره .. وبالغت تأخيره
يلين شاب العذر وشاخ به سنّه ..
ما عاد ينفع كثر شٓرحه وتبريره
اللي انكسر شي أكبر عنّك وعنّه ..
فـ ان كان باقي ندم عجّل تباشيره
لا تذخره عن صدى الآهات والونّه ..
من بادي الظلم لين آخر مساييره
لو تنبش القلب تلقى خافقه منّه ..
وان ضاق وجهْ الزمان وقَلْ تدبيره
يبكي على أيامه .. والأيام يبكنّه ..
مـ أبغيك تشره عليه ولا على غيره
خل الليالي .. يودنّه ويجيبنّه ..
والصاحب اللي لسانه يخون تعبيره
ما يحفظ السر .. ولا يقدر يكنّه ..
على حسب حشْمته بيكون تقديره
واللي شراته علومه !؟ ما يحشمنّه ..
واللي ما يحْسب حساب العمر والجيره
واللي جميله .. يموت بخنجر المنّه ..
لا تَامنه كان في شرّه وفي خيره
بُكره الحسايف على فعله يهدنّه ..
والحلم صادق بتصويره وتفسيره
ما دام غالي .. ولو غاليه شارنّه !!
والحزن وافي .. بتصغيره وتكبيره
ان شفت راعي الحزن عاشق وهاونّه ..
وغنّيت والصبح غنّت لي عصافيره
سمعتها ... لين جريت الغلا بفنّـه ..
فـ ان كان قلبك على الدنيا مشاويره
أنا خفوقي ما بين النار والجنّــه ..
وكانك تشوف ان صدّك بالغلا خيره
أنا أشوفه تمام الفرض والسنّـــه .....