مجالس الرويضة لكل العرب - تنوعت مابـينهم كل الاسباب

ســلام ياحراً على راس مرقـــاب
. . .في راس رجمٍ مرتفع عن هضـــابه
راعيه ان هدّة على الصيد ماخاب
. . . ماطـــار من جول الحبـــاري عثــابه
يعجبك في كفّه الوافي ومخلاب
. . . ويعجبــك في فعلـه وسطــوة صــوابه
حراً ولد حراً إلى هـــــدّ ماهاب
. . . ماهــــــاب بالهــدّه وخصـمــه يـهـــابه
وانا وصفت الطير من حيث الاسباب
. . . اسباب من فعــله زهى في جنــابه
ياجلسة الشيبان يافزت الشاب
. . . يافرحــة اللــي طـــــاح محـدٍ درابه
ماكل من يبغا المعالي لقى البـاب
. . .وماكل شخصٍ فيه عزم وصلابه
تنوعت مابـينهم كل الاسباب
. . . والبعض فوق ودون وصف الذيــــــابه
منهم مر يح وبعضهم كلّه أتعاب
. . .والصنف الآخر كل ماقلت مـــابه
ومن دلّ دربه مابلش بالقمر غـاب
. . . يـمـشي وهـو واثـق بــدربٍ مشـــــابه
ومن وزّن الكلمه قبل نطقها طاب
...واللي بعكسه كل ناقد حكــابه
للطيب فيه أصحاب وللردى صحاب
. . .وكلٍ على كيفه برفقـة صحـــابه
وانا رافقت اقاربي ثم الاجنـاب
. . .وعرفت كيف أسأل واقول الاجابه
وانا درّسني قاسي الوقت بكتاب
. . .حتى عرفت أرسم حروف الكتابه
شعر / فضي الهدباني