| |
12-05-2007, 05:15 AM
| |||||||||
| |||||||||
عادات اسرية منسية ...(يمنع الدخول أقل من 18 عام)عشان برستيجنا ما يهتز الله على ذيك الأيام ......كل ما اتذكرها احس بحنين غريب..  المشكلة ما كانت ايام عز ورخا زي هالأيام ...بس كنا نحس اننا ملوك  موب زي عيال هالجيل الأغبر اللي مايملا عينهم شي ولا يعجبهم العجب ! كان عندنا قناعة غريبة ...وكنا نرضى بالقليل ونحافظ علية زي عيوننا .. ............... ...... مثلا ..ما كنا نروح للسوق ونشتري ولا نختار حاجاتنا بنفسنا ... كان كل شي يشترونة لنا اهلنا ..ويعجبنا (وننجن علية بعد ) اهم شي يكون جديد ..ما يهم السعر ولا اللون ..ولا حتى المقاس (سمحين من اول )اللي ثوبها ينقز شوي واللي يسحب شويتين عاد هذا حكاية ..اذل صار لة حزام من ورا ربطوة بأقوى ما عندهم لين تتنابز عيون البنية (بس عشان يقصر شوي )ولا الكتوف حكاية خصوصا لاصارت البنت نحيفة ...من اول يحطون كتافات في الاكمام وزم على الكم ومقوي وحالة ...لين صار عاد الخصر مرعوص بالحزام صارت الكتوف الله وكيلك متناقزة (تصير البنية كنها قرندايزر ) هههههههههه ومبسوطةةةة ...تناقز في الاعياد والعزايم كنها برنسيسة ..  ولا عاد الاكسسوارات (الله يالدنيا ...)يجودة اللي يشري لبنتة شنطة وبكلات ...عاد مدري وش سنع ذا الشنطة بالذات في الاعياد لازم نشيلها ...حتى لو ماناسبت خلاقينا مو مشكلة ... تلقين البنية ثوبها زهري وشنطتها خضرا وفيها دندوشة حمراء (عادي ) والجزمة سودا (لا وتلمع كنها مدهونة بفازلين )والشراب سماوي عادي ........ بس اللي ابي اوصلة ..كمية القناعة والثقة والسعادة اللي كنا فيها .. ............... ... ويوم العيد عاد حكاية (الإجتماع والتواصل ...كل واحد قلبة عالثاني ومشتاق للثاني ويحب الثاني ...)موب زي الحين كل واحد يقابل الثاني بإبتسامة صفراء وقلبة مليان عالثاني .. كان العيد لة طعم ونكهة ...بالذات مع الطرطعان الاحمر المنقط ...  ............... ........ ولا عاد بداية العام الدراسي الجديد ...الله .... اذكر لادخلت امي ليلة المدرسة بالكرتون اللي فوق راسها جايبته من اوشيقر ههههههه ومانصدق تنزله في الارض عشان نهجم علية انا واخواني ونتقاسم اللي فية ما قد فكرنا نروح المكتبة ولا نختار شي بنفسنا ..كان اي شي يجينااا يعجبنا ...ونطير فية ..مع انها اشياء عادية ما تقارن بالبلاوي المهببة اللي الي يشترونها عيال هالوقت .والا لما نروح للمدرسه نروح جماعة واحد من الجيران يتبرع يودي كل بنات الحاره لا وراكبين بالصندوق<<<<< هذا لغير الناطقين بالبدوية هو السياره اللي لها صندوق من ورا للتحميل << ابووووووك يالوصف  ............... ومن اول ماغير بالشارع نلعب الي يشوفنا يقول مالهم بيوت اعز وقت عندي انا وخواني حزة المغرب عشان نلحق الددسن حق الفليت.. كله كوم وسيارة الفليت كوم .. ماتلاحظون ان اغلب هالجيل فيه ربو ؟؟ ......... والا رمضان زمان اول .. ومادراك مارمضان اذا جت ليلت رمضان نجلس صافين على التلفزيون ونحتري البرامج ( ومن زينها من برامج ) واهم شي الفوازير ............... ............... ... ومانوم الى تسع الصبح قاعدين على الكيرم كبيرنا وصغيرنا حتى الشيبان ..اخاف نحسبه من وجبات الصيام .... كنا في رمضان نطلع التلفزيون بالحوش طول رمضان وكنا تشترك في فوازير رمضان بس ماعمرنا فزنا ............ اعجبني ولطشته   |
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| سنن منسية في رمضان | الخفاش الأسود | روحانيات | 11 | 17-08-2009 04:55 PM |
| أيهم يوثر فيك دموع الرجل أو دموع المرأهـ | محمد | احتواء ما لا يحتوى | 10 | 01-06-2009 12:41 PM |
| قطوف اسرية | سلسبيل | احتواء ما لا يحتوى | 4 | 10-12-2008 02:05 PM |
| تكفون عشان ابطال الطائرة عشان ابطال الاباتشي | الهلالي | الرياضة والشباب | 10 | 05-05-2007 06:59 PM |
 |  |
العرض الشجري
