مجالس الرويضة لكل العرب - انا في مبسمك حيل مفتون

يابنت انا في مبسمك حيل مفتون
وفي ضحكتك سر الهوا يابنيه

ورموش عينك لاتلاقن بالهون
ياضيعتي مابين رمش وخويه

والشعر لامنه كسا ذيك المتون
مايشبهك ياكود بنت العبيه

لامن مشيتي غصب عنهم يفزون
وشلون لو شافوا جمالك شويه

في ذمتي لاتصير نكبات وطعون
هذا صويب العشق وهذا ضحيه

ويامن تقول الزين في الشام مضمون
الزين كله وسط نجد العذيه

ويابنت مهما صار ومهما يقولون
الزين في عيونك يحسم القضيه

يسعد صباح الكحل ورموش العيون
ويسعد مساء خدينك النرجسيه

ماشفتنا زيك رومنسي ومزيون
ياباقة ورود الغرام النديه

لاشفتكم دقات قلبي يزيدون
ياكيف لويدك تلامس يديه

ليت المشاعر ياغرامي يمونون
واحكيلك اسرار(ن) بقلبي خفيه

يامعشر العشاق تكفون تكفون
نبغي حلول(ن)للقلوب الشقيه

والله يزينها على اللي يحبون
وكل(ن)يعيش احلام عمره هنيه

كتبتنا ماصار للناس يقرون
قصة عشق بين بدوي وبدويه