مجالس الرويضة لكل العرب - اسولف عن بعض مابي

الشاعر العذب ناصر الضويحي

اترككم مع ومض حرفه

حسد كل الوجيه اللي تقابلني غضب وغبون

حسد كل العيون اللي تجاهلني وتقراني

يغبطوني علي جزل الكلام وصدقي المجنون
دراويش تسر اقلوبهم لو يقطع لساني

يحسدوني علي هم جعلني عكس مايبغون
وتماديهم بكرهي لو دروا ماقلل بشاني

يلوموني علي جرأة جنوني والجنون افنون
وأنا ما الومهم شافوا جديد الحرف يزهاني

مثل ما للقمر بالليل جيت وللحديث اشجون
اسولف عن بعض مابي واغيض اللي تناساني

بهز اعقول من هزوا علي لحن الكذوب امتون
وابغسل بالدموع احزان من شاركني احزاني

انا روح الوضوح بكل طعم وكل ريح ولون
عزاي اني صريح بين ربعي هم وعدواني

يضايقني كذوب يفرح بقاف يجي موزون
ويرضيني صدوق يكتب احساسي ويمحاني

تصلي ياحروفي فوق نار احقادهم يدرون
علي اني عظم في حلق البعيد اللي تحداني

عقرت اصغر همومي قبل ينبت في جماه اسنون
لعينك بس يابكر المشاعر يوم تنخاني

تحديت الليالي صبر ووجعت الضياع اطعون
غريب ومليت الغربه تودعني وتلقاني

احس اني بقايا رحمة في عالم ملعون
تناهشها صعاليك البشر من قاصي وداني

تموت بخافقي حسره ويبقي سرها مدفون
ويزعجني عليها الشعر لين ابوح بأشجاني

ينومسني شجاع لاقرا شعري صرخ مغبون
ويكفيني عنود تفرك الكبد وتمناني

بعد مانامت اعيون وصحيت للغافلين اعيون
ابترك جرتي وارحل واعيش بعالم ثاني

لقيت ان المكان اللي يناسبني فسيح الكون
مع نجوم السماء ماهو بصدر فلان وفلاني