مجالس الرويضة لكل العرب - فترة الملكة.. المقبلات على الزواج - عشرة اشياء لايحبها الشاب في شريكة حياته

فترة الملكة.. المقبلات على الزواج - عشرة اشياء لايحبها الشاب في شريكة حياته
..

للمقبلات على الزواج اعرض لكم وجهة نظر واضع بين ايديكم هذه الخلاصة على شكل نقاط في الاشياء التي لايحبها الشاب ان تكون في شريكة حياته في فترة الملكة :

اولاً : اذا كانت لاترد على الاتصالات او الرسائل الا نادرا ( اذا كانت مسوية ثقل وهو يدور براسه الف سيناريو ليه ماترد علي ) .

ثانياً : اذا كانت لحوحة جدا لدرجة تبي الاخ فاضي لها 24 ساعه .

ثالثاً : اذا الزوجة فترة الملكة تشاوره في مساله معينه وفي بالها اتخذت القرار مسبقا ... لاتشاورينه افضل يكفي اعرضي عليه الموضوع باسلوب جيد وهو يتفهم افضل من يتجه الموضوع الى نقاش حاد بينكم .

رابعاً : اذا بتتصنع الحياء بزياده ويضيع وقت الملكة وهي تقول مستحية .. صحيح في اول اسبوع بالكثير اسبوعين وبعدها يكفي .. لان الشاب يحب انك تظهري بشخصيتك العادية حتى تساعدينه على ان يتجرأ اكثر ويتناقش معك باريحية ويدلعك ويتغزل فيك .

خامساً : انتبهي لاتسوين فيها ذكيه وتختبرين زوجك في حاجات مالها داعي في فترة الملكة مثلا (تسالينه متى نمت والا متى صحيت وحركات المراقبه بالواتس اب ) اكيد راح يفهمها وطبعا بيسوي انه ما انتبه لحركاتك.

سادساً : لاتكوني حساسة جدا من كلامه وتضعين لكل جمله عدة تفاسير مثلا ( قال كنت نايم وجاني مسج وصحاني ويروح بالها انها ترسل رسائل في اوقات غير مناسبة ) واعطيكم مثال لواحد من الشباب صار معه موقف يقول كنت اكلم زوجتي فترة الملكة وقلت بالاخير تصبحين على خير يا ... يا .. وبالاخير قال اسمها ( طبعا انا سالته قلت انت ضيعت اسمها قال: طبعا لا بس كنت بقول ياحبي لكن حسيت انه بدري على هالكلمه شوي وانا في بداية الملكة يقول حسيت ان زوجتي بعد هالكلمه تغيرت نبرة صوتها ) طبعا اكيد راح بالها انه غلطان باسمها.

سابعاً : طبعا اكثر شي يضايق الزوج فترة الملكة اذا قام يسالها عن رايها في حاجات كثيرة وبعدها يكتشف انها غيرت رايها .. والاخ على باله الكلام نهائي وطبعا رتب اموره وخلص حجوزاته وعزم ربعه وبالاخير كل شوي لها راي ... بيقول هذي من بدايتها الله يستر من تاليها ( نصيحة اي مسالة تحتاجين فيها للتفكير لاتترددين وقولي بفكر واردلك احسن من انك تعطينه راي متسرع وبعدين ترجعين في كلامك ).

ثامناً : اذا كنتي خايفه من ليلة الدخله فلا تلومي الزوج لان اللوم عليكي انتي .. المفترض تصارحينه قبل الزواج بفترة بسيطه وبطريقة وباسلوب فيه تلميح مثلا ( حاب اكون صريحه معك .. انا خايفه من ليلة الزواج و... عليك الباقي) لان بعض الشباب يعتقد لو مادخل عليها من اول ليلة ممكن هذا الشيء يقلل من قيمته امام زوجته وخصوصا اذا لم يلاحظ اي تلميح من زوجته .
عالم الحياة الزوجية، لحياة الزوجية

تاسعاً: لاتستعجلي الحب والرومانسية والكلام الحلو لان الموضوع اخذ ورد .. واذا كنتي مستحية ولا تتجاوبين معه فلا تتوقعي انه يستمر في الكلام الحلو والغزل لانه بيحس انه يكلم نفسه او راح يجي في باله انك تتضايقين من هذا الكلام.

عاشراً : امنحيه الثقه واستشيريه في اشياء خاصة جدا بك .. المواضيع الحساسه لا تجعله ينفر منك بالعكس سيقدر هذه الثقه التي منحتيه اياها بسؤاله واستشارته في امورك الخاصة حتى وان كانت حساسة بالنسبة لكي وضعي في بالك ان هذا الشخص هو الذي ستعيشي معه بقية حياتك ... لان الشاب اذا احس بانك منحتيه الثقه ستزداد ثقته بنفسه وبك.

واخيرا الله يسعدكم ويوفقكم ويرزقكم الذرية الصالحه .