مجالس الرويضة لكل العرب - البارحة وش رد عيني عن النوم

البارحه وش رد عيني عن النوم ؟
غير الضمير اللي تداعت همومـه

كنّه على التعذيب يا ناس ملـزوم
والله يعلم خاطري ويـش قومـه

ماقومه الا صورتـاً تشغلـه دوم
وتغزيه حتى في صلاته وصومـه

خيالها بين السراجيـف مرسـوم
خيال بيّن في ضميـري رسومـه

تطري علي صورتك فالليل واليوم
يا صاحبي يابو الدلـع والنعومـه

يا مستكى يازهر نرجس ويشمـوم
شوفتك ترمي من عنى القلب كومه

في ديرتاً مـا طبهـا قبلنـا قـوم
وانقول ميعاد الفرج حـان يومـه

ما وصلها الا طايراً يكسر الحـوم
والا السما تبـدي علينـا نجومـه

لو كان ما نملك من الزاد مطعـوم
والجفن ياخـذ مـدةٍ عنـه نومـه

ماعندنـا الا سـدرةٍ طلعهـا دوم
ونأخذ من الهرج المسلي قسومـه

أخذ معك سجات وأخبار وعلـوم
وكلاً على الثانـي يبيّـن علومـه

وان طحت بين يديك ما ودي اقوم
جعله مطاحاً ما يجي منـه قومـه